സ്പാനിഷ് ഇതിഹാസം ചാവി ഹെര്ണാണ്ടസിന്റെ പേരില് സമര്പ്പിക്കപ്പെട്ട വ്യാജ അപേക്ഷ ഉള്പ്പെടെ വിവാദങ്ങളുടെ പശ്ചാത്തലത്തില്, ഇന്ത്യന് ഫുട്ബോള് ടീമിന്റെ പുതിയ കോച്ചിനെ കണ്ടെത്താനുള്ള തിരച്ചില് അവസാനഘട്ടത്തിലേക്ക്. ലോകമെമ്പാടുമുള്ള 170ഓളം അപേക്ഷകള് വന്നിരിക്കുന്ന മത്സരത്തിനൊടുവിൽ, അഖിലേന്ത്യാ ഫുട്ബാള് ഫെഡറേഷന്റെ (AIFF) ടെക്നിക്കല് കമ്മിറ്റിയുടെ ശിപാര്ശ പ്രകാരം മൂന്ന് പേരുടെ അന്തിമ പട്ടിക രൂപം കിട്ടിയിട്ടുണ്ട്. ആഗസ്റ്റ് ഒന്നിന് പുതിയ കോച്ചിന്റെ പ്രഖ്യാപനം നടക്കും.
മുമ്പ് ഇന്ത്യന് ടീമിനായി കളിച്ചും ഐ.എസ്.എല് ക്ലബ്ബുകള്ക്ക് പരിശീലകനായും പ്രവര്ത്തിച്ച ഖാലിദ് ജമീല് ആണ് പട്ടികയിലെ മുന് നിര സ്ഥാനാര്ഥി. മുന് ഇന്ത്യന് കോച്ചായ ഇംഗ്ലണ്ടുകാരന് സ്റ്റീഫന് കോണ്സ്റ്റന്റൈന്, സ്പെയിനിലെ സ്റ്റെഫാന് ടര്ക്കോവിച് എന്നിവരാണ് മറ്റെരുവരും.
ഐ.എം വിജയന് അധ്യക്ഷനായ ടെക്നിക്കല് കമ്മിറ്റി പട്ടിക മുന്നോട്ട് വെച്ചതോടെ, അഖിലേന്ത്യാ ഫുട്ബോള് ഫെഡറേഷന് എക്സിക്യൂട്ടീവ് കമ്മിറ്റിയുടെ യോഗം വെള്ളിയാഴ്ച തീരുമാനമെടുക്കും.
48 വയസ്സുള്ള ഖാലിദ് ജമീല് നിലവില് ജാംഷഡ്പൂര് എഫ്.സിയുടെ ഹെഡ് കോച്ചാണ്. മുൻ ഇന്ത്യൻ മധ്യനിര താരമായ ഖാലിദ് എ.എഫ്.സി പ്രൊ ലൈസൻസുള്ള പരിശീലകനാണ്. രണ്ടു തവണ AIFF മികച്ച കോച്ചിനുള്ള പുരസ്കാരം നേടിയിട്ടുണ്ട്. അടുത്ത ഒക്ടോബറില് ഏഷ്യന് കപ്പ് യോഗ്യതാ മത്സരങ്ങളുള്ളതിനാല് പുതിയ കോച്ച് വേഗത്തില് സ്ഥാനമേറ്റെടുക്കും.
മനോലോ മാർക്വസിന്റെ രാജിയോടെയാണ് കോച്ച് സ്ഥാനത്ത് ഒഴിവുണ്ടായത്. എഫ്.സി ഗോവയുടെയും ഇന്ത്യന് ദേശീയ ടീമിന്റെയും ചുമതല ഒരേസമയം വഹിച്ചിരുന്ന മാര്ക്വസിന്റെ സ്ഥാനത്ത് നിവൃത്തിയുള്ള സ്ഥാനാര്ഥിയെ തെരഞ്ഞെടുത്തേക്കും.
Indian Football Coach Selection in Final Stage; Khalid Jamil Among Three Shortlisted Candidates
