ദില്ലി: ഇന്ത്യയും പാകിസ്ഥാനും തമ്മിൽ സംഘർഷം മൂർച്ഛിക്കുന്നതിനിടെ യുഎസ് സ്റ്റേറ്റ് സെക്രട്ടറി മാർക്കോ റൂബിയോ വിദേശകാര്യ സെക്രട്ടറി എസ് ജയ്ശങ്കറിനെയും പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫിനെയും ഫോണിൽ വിളിച്ചു. ഇരു രാജ്യങ്ങളും തമ്മിലുള്ള നേരിട്ടുള്ള സംഭാഷണത്തിന് പിന്തുണ അറിയിക്കുകയും സംഘർഷം കുറയ്ക്കാൻ നടപടി സ്വീകരിക്കണമെന്നും ചെയ്യണമെന്ന് അദ്ദേഹം ആവശ്യപ്പെട്ടു.
പാകിസ്ഥാനിൽ നിന്നുള്ള പ്രകോപനങ്ങളെ ഇന്ത്യ ശക്തമായി നേരിടുമെന്ന് റൂബിയോയോട് വിദേശകാര്യമന്ത്രി ജയ്ശങ്കർ അറിയിച്ചു. നിലവിലെ സംഘർഷത്തിൽ സാധാരണക്കാരുടെ ജീവൻ നഷ്ടപ്പെട്ടതിൽ ദുഃഖം പ്രകടിപ്പിച്ച റൂബിയോ, തീവ്രവാദ ഗ്രൂപ്പുകൾക്കുള്ള എല്ലാ പിന്തുണയും അവസാനിപ്പിക്കാൻ പാകിസ്ഥാൻ കൃത്യമായ നടപടികൾ സ്വീകരിക്കണമെന്ന് ആവർത്തിച്ചാവശ്യപ്പെട്ടു. ഭീകരതയ്‌ക്കെതിരായ യുഎസ് പിന്തുണയെ അഭിനന്ദിച്ച ജയ്ശങ്കർ, അതിർത്തി കടന്നുള്ള ഭീകരതയ്‌ക്കെതിരായ ഇന്ത്യയുടെ പ്രതികരണത്തെ അടിവരയിട്ട്, പാകിസ്ഥാന്റെ ഏത് പ്രകോപന ശ്രമങ്ങളെയും ഇന്ത്യ ശക്തമായി ചെറുക്കുമെന്ന് അറിയിച്ചു. വ്യാഴാഴ്ച വൈകി ഇന്ത്യയും പാകിസ്ഥാനും തമ്മിൽ പുതിയ ഏറ്റുമുട്ടലുകൾ ഉണ്ടായതിന്റെ പശ്ചാത്തലത്തിലായിരുന്നു സംഭാഷണം. സംഘർഷം രൂക്ഷമായതോടെ വൈകുന്നേരം ജയ്ശങ്കർ തന്റെ യൂറോപ്യൻ യൂണിയൻ, ഇറ്റലി പ്രതിനിധികളുമായി സംസാരിച്ചു.
ഇന്ത്യ സൈനിക നടപടി ശക്തിപ്പെടുത്താൻ ഉദ്ദേശിക്കുന്നില്ലെന്നും, എന്നാൽ ഇന്ത്യയ്‌ക്കെതിരെ എന്തെങ്കിലും സൈനിക ആക്രമണം ഉണ്ടായാൽ, ശക്തമായ മറുപടി നൽകുമെന്നും ജയ്ശങ്കർ തന്റെ ഇറാൻ വിദേശകാര്യ മന്ത്രി അബ്ബാസ് അരഖ്ചിയോട് പറഞ്ഞു. സൗദി അറേബ്യയുടെ വിദേശകാര്യ മന്ത്രി ആദേൽ അൽജുബൈറിനെയും ജയ്ശങ്കർ കണ്ടു.
ഭീകരപ്രവർത്തനങ്ങളിൽ നിന്ന് തങ്ങളുടെ പൗരന്മാരെ സംരക്ഷിക്കാൻ ഓരോ രാജ്യത്തിനും നിയമപരമായി കടമയും അവകാശവുമുണ്ടെന്ന് യൂറോപ്യൻ യൂണിയൻ പ്രസ്താവനയിൽ പറഞ്ഞു. ഇരു കക്ഷികളും സംയമനം പാലിക്കാനും സംഘർഷങ്ങൾ ലഘൂകരിക്കാനും സാധാരണക്കാരുടെ ജീവൻ സംരക്ഷിക്കുന്നതിന് കൂടുതൽ ആക്രമണങ്ങളിൽ നിന്ന് വിട്ടുനിൽക്കാനും യൂറോപ്യൻ യൂണിയൻ ആഹ്വാനം ചെയ്തു.
