ന്യൂഡല്‍ഹി: അതീഖ് അഹ്മദിന്റെ ഭാര്യ ഷായിസ്ത പര്‍വീണിനെ പിടികിട്ടാപുള്ളിയായി പ്രഖ്യാപിച്ച് യു.പി പൊലീസ്. ഉത്തര്‍പ്രദേശ് പൊലീസ് തിരയുന്ന ക്രിമിനലുകളുടെ ലിസ്റ്റില്‍ അതീഖിന്റെ ഭാര്യയേയും ഉള്‍പ്പെടുത്തി. ഇവരെ കുറിച്ച് വിവരം നല്‍കുന്നവര്‍ക്ക് യു.പി പൊലീസ് ഇനാം പ്രഖ്യാപിച്ചിട്ടുണ്ട്.
അതീഖിന്റെ കുടുംബത്തില്‍ ഷായിസ്ത പര്‍വീണ്‍ മാത്രമാണ് ഇപ്പോള്‍ പുറത്തുള്ളത്. അതീഖിന്റെ നാല് മക്കള്‍ നിലവില്‍ ജയിലിലാണ്. ഒരു മകന്‍ അസദ് അഹമ്മദിനെ ഏറ്റുമുട്ടലില്‍ വധിച്ചിരുന്നു. അതീഖ് അഹ്മദ് കൊല്ലപ്പെട്ടതിന് പിന്നാലെ ഒളിവിലുള്ള അദ്ദേഹത്തിന്റെ ഭാര്യക്കായുള്ള തെരച്ചില്‍ യു.പി പൊലീസ് ഊര്‍ജിതമാക്കിയിരുന്നു.
ഷായിസ്ത പര്‍വീണിന്റെ തലക്ക് 50,000 രൂപയാണ് യു.പി പൊലീസ് ഇനാം പ്രഖ്യാപിച്ചിരിക്കുന്നത്. ഉമേഷ് പാല്‍ വധക്കേസില്‍ ഉള്‍പ്പടെ പല കേസുകളിലും ഷായിസ്തക്ക് പങ്കുണ്ടെന്നാണ് യു.പി പൊലീസ് പറയുന്നത്. സബര്‍മതി ജയിലിലെത്തി അതീഖുമായി കൂടികാഴ്ച നടത്തിയ ഷായിസ്ത പര്‍വീണ്‍ അവിടെ നിന്നാണ് ഉമേഷ് പാലിന്റെ കൊലപാതകം ആസൂത്രണം ചെയ്തതെന്നും പൊലീസ് വ്യക്തമാക്കുന്നു. ഷായിസ്തക്കെതിരെ നാല് കേസുകള്‍ നിലവിലുണ്ടെന്ന് യു.പി പൊലീസ് അറിയിച്ചു. ഇതില്‍ ഒരു കൊലപാതക? കേസും നാല് വഞ്ചന കേസുമുണ്ട്.
