ന്യൂഡല്ഹി: കോവിഡ് പ്രതിരോധത്തിന് ഒപ്പം കോവിഡ് അനാഥമാക്കിയ കുട്ടികളെയും കേരളം സംരക്ഷിക്കണം എന്ന് സുപ്രീം കോടതി. കോവിഡ് അനാഥമാക്കിയ 399 വിദ്യാര്ത്ഥികള് സ്വകാര്യ സ്കൂളുകളില് പടിക്കുന്നതായി സംസ്ഥാന സര്ക്കാര് സുപ്രീം കോടതിയെ അറിയിച്ചു.
ഇവരുടെ പഠനം മുടങ്ങാതിരിക്കാന് നടപടി സ്വീകരിക്കണം എന്ന് കോടതി സംസ്ഥാന സര്ക്കാരിനോട് നിര്ദേശിച്ചു.
അനാഥരായ കുട്ടികള്ക്ക് 18 വയസ് വരെ പ്രതി മാസം 2000 രൂപ സഹായ ധനമായി നല്കുമെന്ന് കേരളം സുപ്രീം കോടതിയെ അറിയിച്ചു. ഡിഗ്രി പൂര്ത്തിയാകുന്നത് വരെയുള്ള വിദ്യാഭ്യാസത്തിന്റെ ചെലവ് സര്ക്കാര് വഹിക്കുമെന്നും സംസ്ഥാന സര്ക്കാര് സുപ്രീം കോടതിയെ അറിയിച്ചു.
ഇത് വരെ നടപ്പിലാക്കിയ പദ്ധതികളുടെ വിശദാംശങ്ങള് വ്യക്തമാക്കി മൂന്ന് ആഴ്ചയ്ക്ക് ഉള്ളില് സത്യവാങ്മൂലം ഫയല് ചെയ്യാന് സംസ്ഥാന സര്ക്കാരിനോട് സുപ്രീം കോടതി നിര്ദേശിച്ചു.
മാതാപിതാക്കള് നഷ്ടപ്പെട്ട് അനാഥരായ വിദ്യാര്ത്ഥികളുടെ വിശദശാംശങ്ങള് ബാല് സ്വരാജ് വെബ്സൈറ്റില് പതിനഞ്ച് ദിവസത്തിനകം അപ്ലോഡ് ചെയ്യാന് സംസ്ഥാന സര്ക്കാരിനോട് കോടതി നിര്ദേശിച്ചു. അപ്ലോഡ് ചെയ്ത വിവരങ്ങള് വെബ്സൈറ്റില് പ്രതിഭലിക്കുന്നില്ല എന്ന് സംസ്ഥാന സര്ക്കാര് അഭിഭാഷകന് ജി പ്രകാശ് കോടതിയെ അറിയിച്ചു.
അതിനിടെ കോവിഷീല്ഡ് വാക്സിന്റെ രണ്ടാം ഡോസിന്റെ ഇടവേള കൂട്ടിയത് ഫലപ്രാപ്തിക്കു വേണ്ടിയാണെന്ന് കേന്ദ്രസര്ക്കാര് ഹൈക്കോടതിയില്. ഇടവേള 84 ദിവസമാക്കിയത് വാക്സിന്ക്ഷാമം കൊണ്ടല്ലെന്നും കേന്ദ്രം വിശദീകരിച്ചു. മൂന്നാംഡോസ് വാക്സിന് നല്കാന് നിലവില് വ്യവസ്ഥയില്ലെന്നും കേന്ദ്രസര്ക്കാര് ഹൈക്കോടതിയെ അറിയിച്ചു.
കോവിഡ് വാക്സിനുമായി ബന്ധപ്പെട്ട് ഇന്ന് രണ്ടു ഹര്ജികളാണ് ഹൈക്കോടതി മുന്പാകെ വന്നത്. ഇതിലൊന്ന് കിറ്റക്സ് കമ്പനി നല്കിയതായിരുന്നു.
തങ്ങളുടെ ജീവനക്കാര്ക്ക് കോവിഷീല്ഡിന്റെ വാക്സിന്റെ ആദ്യ ഡോസ് നല്കിയെന്നും അതു കഴിഞ്ഞ് 45 ദിവസമായിട്ടും രണ്ടാം ഡോസ് കുത്തിവെപ്പ് നല്കാന് അനുമതി നല്കുന്നില്ല എന്നായിരുന്നു കിറ്റക്സിന്റെ പരാതി. വാക്സിന് എടുക്കാന് അനുമതി നല്കണമെന്ന് ആവശ്യപ്പെട്ടാണ് കിറ്റക്സ് ഹൈക്കോടതിയെ സമീപിച്ചത്.
