ന്യൂയോര്ക്ക്: കാബൂള് വിമാനത്താവളത്തില് വീണ്ടും ഭീകരാക്രമണത്തിനു സാധ്യതയെന്നു യുഎസ്. യുഎസ് പ്രസിഡന്റ് ജോ ബൈഡനാണു മുന്നറിയിപ്പ് നല്കിയത്. ദേശീയ സുരക്ഷാ സമിതിയുമായി ചര്ച്ചകള് നടത്തിയശേഷമായിരുന്നു ബൈഡന്റെ പ്രതികരണം.
‘ അതീവ അപകടകരമാണ് അഫ്ഗാനില് നിലവിലെ സാഹചര്യം. കാബൂള് വിമാനത്താവളത്തില് വീണ്ടും ഭീകരാക്രമണത്തിനു സാധ്യത വളരെ കൂടുതലാണ്. 24–36 മണിക്കൂറിനകം കാബൂളില് ഭീകരാക്രമണം ഉണ്ടായേക്കാമെന്നാണു യുഎസ് കമാന്ഡര്മാര് എന്നെ അറിയിച്ചത്’– ബൈഡന് മാധ്യമങ്ങളോടു പറഞ്ഞു.
വൈറ്റ് ഹൗസില് ബൈഡന്റെ അധ്യക്ഷതയില് നടന്ന അടിയന്തര സുരക്ഷാ യോഗത്തില് സേനയിലെ ഉന്നത കമാന്ഡര്മാരും പങ്കെടുത്തു. യുഎസ് ദൗത്യത്തിലെ ഏറ്റവും അപകടകരമായ സന്ദര്ഭമാണു വരുന്ന ദിവസങ്ങളെന്നും വൈറ്റ് ഹൗസ് വ്യക്തമാക്കി.
കാബൂള് രാജ്യാന്തര വിമാനത്താവളത്തിലേക്ക് താലിബാന് കൂടുതല് ഭടന്മാരെ നിയോഗിച്ചു. വീണ്ടും ചാവേര് ആക്രമണമുണ്ടാകുമെന്ന മുന്നറിയിപ്പു പരിഗണിച്ചു വിമാനത്താവള കവാടങ്ങളില് കൂട്ടംകൂടുന്നതു വിലക്കി. വിമാനത്താവള റോഡുകളില് കൂടുതല് ചെക് പോസ്റ്റുകള് സ്ഥാപിച്ച താലിബാന്, കൂടുതല് സുരക്ഷാക്രമീകരണങ്ങളും ഏര്പ്പെടുത്തി.
നിലവില് സഖ്യസേനയ്ക്കാണു വിമാനത്താവളത്തിനകത്തെ സുരക്ഷാച്ചുമതല. ഒഴിപ്പിക്കല് ദൗത്യം മിക്കവാറും രാജ്യങ്ങള് പൂര്ത്തിയാക്കി. ഒരുലക്ഷത്തിലേറെപ്പേരെ ഒഴിപ്പിച്ച യുഎസ് ദൗത്യവും അവസാനഘട്ടത്തിലേക്കു നീങ്ങി.
