പട്ന: രാജ്യത്ത് കോവിഡ് പ്രതിരോധ വാക്സിന്‍റെ രണ്ടാം ഡോസ് ലഭിക്കാത്ത നിരവധി പേരുണ്ടെന്നാണ് കണക്ക്.
അതിനിടെ 11 തവണ വാക്സിനെടുത്തെന്ന അവകാശവാദവുമായി എത്തിയിരിക്കുകയാണ് ബിഹാറിലെ 84കാരന്‍. 12-ാം തവണ വാക്സിനെടുക്കാന്‍ ശ്രമിക്കുന്നതിനിടെയാണ് വയോധികന്‍ പിടിക്കപ്പെട്ടത്.
മധേപുര ജില്ലയിലെ ഒറൈ ഗ്രാമത്തിലുള്ള ബ്രഹ്മദേവ് മണ്ഡല്‍ എന്നയാളാണ് വിചിത്ര അവകാശവാദമുന്നയിച്ചത്. ഇത്രയധികം തവണ അധികൃതരെ കബളിപ്പിച്ച്‌ എങ്ങനെയാണ് അയാള്‍ വാക്സനെടുത്തതെന്ന് കണ്ടെത്താനായി അന്വേഷണം പ്രഖ്യാപിച്ചിരിക്കുകയാണ്.
”എനിക്ക് വാക്‌സിനില്‍ നിന്ന് വളരെയധികം പ്രയോജനം ലഭിച്ചു. അതിനാലാണ് ഞാന്‍ അത് ആവര്‍ത്തിച്ച്‌ എടുക്കുന്നത്”, തപാല്‍ വകുപ്പില്‍ നിന്ന് വിരമിച്ച ജീവനക്കാരനായ മണ്ഡല്‍ ഇന്ത്യ ടുഡേയോട് പറഞ്ഞു.
2021 ഫെബ്രുവരി 13-നാണ് അദ്ദേഹം തന്റെ ആദ്യ ഡോസ് എടുത്തത്. മാര്‍ച്ച്‌, മെയ്, ജൂണ്‍, ജൂലൈ, ഓഗസ്റ്റ് മാസങ്ങളില്‍ ഓരോ തവണ വീതവും കുത്തിവെച്ചു. സെപ്റ്റംബറില്‍ മൂന്ന് തവണയാണ് കുത്തിവയ്പ്പ് നടത്തിയതത്രേ. ഡിസംബര്‍ 30-നകം പൊതു ആരോഗ്യ കേന്ദ്രത്തില്‍ വെച്ച്‌ 11 ഡോസുകളെടുക്കാന്‍ മണ്ഡലിന് കഴിഞ്ഞു. സര്‍ക്കാര്‍ ഒരു അത്ഭുതകരമായ കാര്യം ചെയ്തെന്നാണ് വാക്സിനെ കുറിച്ച്‌ അദ്ദേഹം പറയുന്നത്.
വാക്സിനെടുക്കാനായി തന്റെ ആധാര്‍ കാര്‍ഡും ഫോണ്‍ നമ്ബറും എട്ട് തവണ സമര്‍പ്പിച്ച മണ്ഡല്‍ ബാക്കി മൂന്നെണ്ണത്തില്‍ തന്റെ വോട്ടര്‍ ഐഡി കാര്‍ഡും ഭാര്യയുടെ ഫോണ്‍ നമ്ബറും ഉപയോഗിച്ചതായാണ് റിപ്പോര്‍ട്ട്. എങ്ങനെയാണ് മണ്ഡലിന് ഇത്രയധികം ഡോസുകള്‍ വാക്‌സിന്‍ എടുക്കാന്‍ കഴിഞ്ഞത് എന്നറിയാന്‍ വിഷയം അന്വേഷിക്കുമെന്ന് മധേപുര ജില്ലയിലെ സിവില്‍ സര്‍ജന്‍ അമരേന്ദ്ര പ്രതാപ് ഷാഹി പറഞ്ഞു.
