ലക്നോ: ഉത്തര് പ്രദേശിലെ ഒരു സ്വകാര്യ ആശുപത്രിയില് രോഗിക്കു രക്തത്തിനു പകരം ജ്യൂസ് കുത്തിവച്ചു. ഗുരുതരാവസ്ഥയിലായ രോഗി മരിച്ചതിനെ തുടര്ന്ന് ആശുപത്രിയില് സംഘര്ഷം.
അന്വേഷണം പ്രഖ്യാപിച്ച സര്ക്കാര് ആശുപത്രി താല്ക്കാലികമായി അടച്ചു പൂട്ടാന് തീരുമാനിച്ചു. പ്രയാഗ്രാജിലെ സ്വകാര്യ ആശുപത്രിയിലാണ് നടുക്കുന്ന സംഭവം.
ഡെങ്കിപ്പനി ബാധിച്ച് ചികിത്സയിലായിരുന്ന രോഗിയാണു മരിച്ചത്.
ഇയാളുടെ രക്തത്തില് പ്ലേറ്റ്ലറ്റുകളുടെ എണ്ണം അപകടകരാമാം വിധം താഴ്ന്നു. തുടര്ന്ന് പ്ലേറ്റ്ലെറ്റ് കുത്തിവയ്ക്കാന് ഡോക്റ്റര് നിര്ദേശിച്ചു. നഴ്സിംഗ് അസിസ്റ്റന്റാണ് കുത്തി വയ്പ് നടത്തിയതെന്നു പറയുന്നു. ഇയാള് രക്തത്തിനു പകരം ജ്യൂസ് ആണു രോഗിക്കു കുത്തിവച്ചതെന്നു കണ്ടെത്തി. ജീവനക്കാര് ഉപയോക്കാന് സൂക്ഷിച്ച ജ്യൂസ് ആണിതെന്നാണ് പൊലീസ് പറയുന്നത്. ഇതു രക്തം സൂക്ഷിച്ചിരുന്ന ഫ്രീസറില് ആണോ വച്ചിരുന്നതെന്ന് അന്വേഷിക്കുകയാണ്.
സംഭവത്തെക്കുറിച്ച് അന്വേഷിക്കാന് മുഖ്യമന്ത്രി യോഗി ആദിത്യനാഥ് നിര്ദേശം നല്കി. അന്വേഷണ റിപ്പോര്ട്ട് പറത്തു വരുന്നതു വരെ ആശുപത്രി പ്രവര്ത്തക്കരുതെന്നും ആവശ്യപ്പെട്ടു. തുടര്ന്ന് ആരോഗ്യ വകുപ്പ് അധികൃതരെത്തി ആശുപത്രി പൂട്ടി സീല് ചെയ്തു.