തൃശൂര്‍: കെ റെയില്‍ പദ്ധതി നടപ്പാക്കുന്ന കാര്യത്തില്‍ പുനരാലോചന നടത്തണമെന്ന് പരിസ്ഥിതി പ്രവര്‍ത്തക മേധാ പട്കര്‍ ആവശ്യപ്പെട്ടു.
ഇക്കാര്യം മുഖ്യമന്ത്രി പിണറായി വിജയനോട് കൈ കൂപ്പി അഭ്യര്‍ഥിക്കുകയാണ് എന്ന് മേധാ പട്കര്‍ പറഞ്ഞു. തൃശൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍.
സില്‍വര്‍ ലൈന്‍ പദ്ധതി പശ്ചിമ ഘട്ടത്തെ അപകടത്തിലാക്കും. പ്രകൃതി വിഭവങ്ങളുടെ മൂല്യം ഭരണാധികാരികള്‍ മനസ്സിലാക്കുന്നില്ല. ജലമൊഴുക്ക് തടസ്സപ്പെടും. ഇതിന്റെ ഭവിഷ്യത്ത് കേരളം ഇപ്പോള്‍തന്നെ അനുഭവിച്ചുകഴിഞ്ഞു. ഒരുലക്ഷം കോടിയുടെ പദ്ധതി എങ്ങനെ പ്രകൃതിയെ ബാധിക്കുമെന്ന് പഠനം പോലും നടന്നിട്ടില്ലെന്നും മേധാ പട്കര്‍ കൂട്ടിച്ചേര്‍ത്തു. മേധാ പട്കര്‍ നാളെ കോഴിക്കോട് കെ റെയില്‍ സര്‍വേ പ്രദേശങ്ങള്‍ സന്ദര്‍ശിക്കും.
