തിരുവനന്തപുരം: തിരുവനന്തപുരം വിമാനത്താവളത്തിലെ ജീവനക്കാരിയെ പീഡിപ്പിച്ചെന്ന കേസില് ചീഫ് എയര് പോര്ട്ട് ഓഫീസര് ഗിരി മധുസൂദന റാവുവിന്റെ അറസ്റ്റ് രേഖപ്പെടുത്തി.സഹപ്രവര്ത്തക നല്കിയ പരാതിയിലെടുത്ത കേസില് ഹൈക്കോടതി ജാമ്യം അനുവദിച്ചശേഷം അന്വേഷണ ഉദ്യോഗസ്ഥന് മുന്നില് ഹാജരാകാന് നിര്ദ്ദേശം നല്കിയിരുന്നു.
ഹര്ജിക്കാരനെ അറസ്റ്റു ചെയ്താല് ഒരുലക്ഷം രൂപയുടെ ബോണ്ടും തുല്യതുകയ്ക്കുള്ള രണ്ട് ആള്ജാമ്യവും വ്യവസ്ഥ ചെയ്ത് വിട്ടയയ്ക്കണമെന്ന് ജസ്റ്റീസ് പി. ഗോപിനാഥ് കഴിഞ്ഞ ദിവസം ഉത്തരവിട്ടിരുന്നു. ഇന്നു രാവിലെയാണ് മധുസൂദനറാവു അന്വേഷണ ഉദ്യോഗസ്ഥനു മുന്നില് ഹാജരായത്.
മധുസൂദന റാവുവിന്റെ മൊബൈല് ഫോണ് അടക്കം അന്വേഷണവുമായി ബന്ധപ്പെട്ട ഇലക്ട്രോണിക് ഉപകരണങ്ങള് പോലീസിന് കൈമാറണമെന്നും നിര്ദ്ദേശമുണ്ട്. ജനുവരി 31 വരെ എല്ലാ ദിവസവും ഇതേസമയം ചോദ്യം ചെയ്യലിന് എത്തണം. പാസ്പോര്ട്ട് കോടതിയില് ഹാജരാക്കണമെന്നും ഉത്തരവിലുണ്ട്.
ജനുവരി നാലിനു ഗിരി മധുസൂദന റാവു ഫ്ളാറ്റിലേക്ക് വിളിച്ചുവരുത്തി പീഡിപ്പിച്ചെന്ന ജീവനക്കാരിയുടെ പരാതിയെത്തുടര്ന്ന് റാവുവിനെ അദാനി ഗ്രൂപ്പ് അന്വേഷണ വിധേയമായി സസ്പെന്ഡ് ചെയ്തിരുന്നു.