കൊച്ചി: ബ്രഹ്മപുരം മാലിന്യ പ്ലാന്റ് തീപിടിത്തവുമായി ബന്ധപ്പെട്ട് രൂക്ഷ വിമര്ശനവുമായി കേരള ഹൈക്കോടതി. ഗ്യാസ് ചേംബറില് അകപ്പെട്ട അവസ്ഥയിലാണ് കൊച്ചിക്കാരെന്നും ഹൈക്കോടതി വിമര്ശിച്ചു.
വിഷയത്തില് കൊച്ചി കോര്പറേഷന് സെക്രട്ടറിയോട് ഇന്ന് ഉച്ചയ്ക്ക് 1.45 ന് നേരിട്ട് കോടതിയില് ഹാജരാവാന് നിര്ദ്ദേശിച്ചു. രേഖകളും ഹാജരാക്കണം.
ഓരോ ദിവസവും നിര്ണായകമാണ്. ഭാവിയില് ഇത്തരം അപകടങ്ങള് ഉണ്ടാകാതിരിക്കാനാണ് കോടതി ശ്രമിക്കുന്നത്. ഇതിനായി എല്ലാവരുടെയും കൂട്ടായ പ്രവര്ത്തനം വേണം. വിഷയത്തില് കര്ശന ഇടപെടല് ഉണ്ടാകുമെന്നും കോടതി പറഞ്ഞു. തീപിടുത്തത്തിന് ഉത്തരവാദികളായവരെ കണ്ടെത്തി തക്കതായ ശിക്ഷ നല്കുമെന്നും കോടതി വാക്കാല് പരാമര്ശം നടത്തി.
സര്ക്കാരിനായി എജിയും കോടതിയില് ഹാജരായി. കേസ് വാദം കേട്ട എല്ലാ ജഡ്ജിമാരും ജസ്റ്റിസ് ദേവന് രാമചന്ദ്രന് എഴുതിയ കത്തിനെ പിന്തുണക്കുന്ന സവിശേഷ സാഹചര്യം ഇന്ന് കോടതിയില് ഉണ്ടായി. ശക്തമായ നടപടികള് സ്വീകരിക്കാന് ഉദ്ദേശിക്കുന്നുവെന്ന് കോടതി പറഞ്ഞു.