തിരുവനന്തപുരം: കാരുണ്യ ആരോഗ്യ സുരക്ഷാ പദ്ധതിക്ക് 100 കോടി രൂപകൂടി അനുവദിച്ചതായി മന്ത്രി കെ.എന് ബാലഗോപാല് അറിയിച്ചു. ഏപ്രില് ആദ്യം 150 കോടി രൂപ നല്കിയിരുന്നു. കുടുംബത്തിന് പ്രതിവര്ഷം അഞ്ചു ലക്ഷം രൂപവരെ സൗജന്യ ചികിത്സ ഉറപ്പാക്കുന്നതാണ് പദ്ധതി. ദരിദ്രരും ദുര്ബലരുമായ 41.99 ലക്ഷം കുടുംബങ്ങള് ഗുണഭോക്താക്കളാണ്. സ്റ്റേറ്റ് ഹെല്ത്ത് ഏജന്സി വഴി നടപ്പാക്കിയ പദ്ധതിയില് 1050 രൂപ ഒരു കുടുംബത്തിന്റെ വാര്ഷിക പ്രീമിയമായി നിശ്ചയിച്ചിട്ടുള്ളത്. ഇതില് 631 രൂപ 20 പൈസ വീതം 23.97 ലക്ഷം കുടുംബങ്ങള്ക്ക് മാത്രമാണ് പ്രീമിയത്തില് കേന്ദ്ര സഹായമുള്ളത്. ഈ കുടുംബങ്ങള്ക്ക് ബാക്കി തുക സംസ്ഥാനം നല്കുന്നു. പുറമെയുള്ള 18.02 ലക്ഷം പേരുടെ പ്രീമിയത്തിന്റെ മുഴുവന് തുകയും സംസ്ഥാനമാണ് വഹിക്കുന്നത്.
കുടുംബാംഗങ്ങളുടെ എണ്ണമോ പ്രായപരിധിയോ നോക്കാതെയാണ് പദ്ധതിയില് അംഗത്വം നല്കുന്നത്. ഒരു കുടുംബത്തിലെ മുഴുവന് വ്യക്തികള്ക്കോ അല്ലെങ്കില് ഒരു വ്യക്തിക്കു മാത്രമായോ പദ്ധതിയിലൂടെ സഹായം ലഭിക്കും. ഇതിന് മുന്ഗണന മാനദണ്ഡങ്ങള് ഒന്നുമില്ല. അംഗത്വം നേടുന്നതിന് ഒരുവിധ ഫീസും ഈടാക്കുന്നില്ല. സേവനം പൂര്ണമായും സൗജന്യമാണ്.
197 സര്ക്കാര് ആശുപത്രികളും നാല് കേന്ദ്ര സര്ക്കാര് ആശുപത്രികളിലും 364 സ്വകാര്യ ആശുപത്രികളിലുമായി കേരളത്തിലുടനീളം നിലവില് പദ്ധതിയുടെ സേവനം ലഭ്യമാണ്. സര്ക്കാര്, സ്വകാര്യ ആശുപത്രി എന്ന പരിഗണനയില്ലാതെ തെരഞ്ഞെടുക്കപ്പെട്ട എല്ലാ സ്ഥാപനങ്ങളില് നിന്നും പണം ഈടാക്കാതെ ചികിത്സ ലഭിക്കും. മരുന്നുകള്, അനുബന്ധ വസ്തുക്കള്, പരിശോധനകള്, ഡോക്ടറുടെ ഫീസ്, ഓപ്പറേഷന് തീയറ്റര് ചാര്ജുകള്, ഐസിയു ചാര്ജ്, ഇംപ്ലാന്റ് ചാര്ജുകള് എന്നിവയും ഇതില് ഉള്പ്പെടും.
കാരുണ്യ പദ്ധതിക്ക് 100 കോടി രൂപകൂടി അനുവദിച്ചു
