തിരുവനന്തപുരം: വിവാദമായ തന്റെ പ്രസംഗം വളച്ചൊടിക്കപ്പെട്ടുവെന്നും ഭരണഘടനയെ ബഹുമാനിക്കുന്നുവെന്നും മുന്‍ മന്ത്രി സജി ചെറിയാന്‍.
ചട്ടം 64 അനുസരിച്ച്‌ നിയമസഭയില്‍ നടത്തിയ പ്രത്യേക പ്രസ്താവനയിലാണ് ഇദ്ദേഹം ഇക്കാര്യം പറഞ്ഞത്. ഭരണഘടന ആമുഖം വായിച്ച സജി ചെറിയാന്‍ ഭരണഘടനാ മൂല്യങ്ങളെ ഉയര്‍ത്തി പിടിക്കുന്ന ആളാണ് താനെന്നും വ്യക്തമാക്കി. മൗലിക അവകാശങ്ങള്‍ സംരക്ഷിക്കപ്പെടണമെന്നതായിരുന്നു പ്രസംഗത്തിന്റെ ഉള്ളടക്കമെന്നും ഭരണഘടന മൂല്യങ്ങള്‍ വെല്ലുവിളിക്കപ്പെടുന്നുവെന്ന ആശങ്കയാണ് താന്‍ പങ്കുവെച്ചതെന്നും അദ്ദേഹം പറഞ്ഞു.
ഭരണഘടനക്ക് അവമതിപ്പ് ഉണ്ടാക്കാന്‍ ശ്രമിച്ചിട്ടില്ലെന്നും തെറ്റായി വ്യാഖ്യാനിക്കപ്പെട്ടതില്‍ ഖേദം പ്രകടിപ്പിക്കുന്നുവെന്നും വ്യക്തമാക്കി. ധാര്‍മ്മികത ഉയര്‍ത്തിപ്പിടിച്ചാണ് രാജി വെച്ചതെന്നും നീതിന്യായ വ്യവസ്ഥയെ ബഹുമാനിക്കുന്നുവെന്നും സജി ചെറിയാന്‍ പറഞ്ഞു.
അംബേദ്കറിനെ പോലും അപമാനിച്ചു എന്ന് പ്രചരിപ്പിച്ചുവെന്നും പറയാത്ത കാര്യങ്ങളാണ് പ്രചരിപ്പിച്ചതെന്നും ഇതില്‍ ദു:ഖവും ഖേദവുമുണ്ടെന്നും അദ്ദേഹം വ്യക്തമാക്കി. ഇനിയും പൊതുപ്രവര്‍ത്തന രംഗത്ത് സജീവമായി ഉണ്ടാകുമെന്നും 43 വര്‍ഷം ഒരു പാട് അക്രമങ്ങള്‍ നേരിടേണ്ടി വന്നുവെന്നും സജി ചെറിയാന്‍ പറഞ്ഞു.
