ഇറാന്‍ സൈനിക കമാന്‍ഡര്‍ ഖാസിം സുലൈമാനിയെ 2020-ല്‍ കൊലപ്പെടുത്തിയതില്‍ പങ്കുള്ള മുന്‍ പ്രസിഡന്റ് ഡൊണാള്‍ഡ് ട്രംപ് ഉള്‍പ്പെടെയുള്ള മുന്‍ മുതിര്‍ന്ന യുഎസ് ഉദ്യോഗസ്ഥരെ കൊല്ലാന്‍ ഇറാന്‍ ശ്രമിക്കുന്നതായി റിപ്പോര്‍ട്ട്.
ഒരു ഉന്നത ഇസ്ലാമിക് റെവല്യൂഷണറി ഗാര്‍ഡ് കോര്‍പ്സ് കമാന്‍ഡര്‍ ആണ് ഇക്കാര്യം വെളിപ്പെടുത്തിയത്. ഡൊണാള്‍ഡ് ട്രംപിനെ കൊല്ലുമെന്ന് ഐആര്‍ജിസിയുടെ എയ്‌റോസ്‌പേസ് യൂണിറ്റ് മേധാവി അമീറലി ഹാജിസാദെ സ്റ്റേറ്റ് ടിവിയില്‍ പറഞ്ഞു.
2020 ജനുവരി 8 ന്, സുലൈമാനി കൊല്ലപ്പെട്ട് അഞ്ച് ദിവസത്തിന് ശേഷം, പടിഞ്ഞാറന്‍ ഇറാഖിലെ അമേരിക്കന്‍ സൈനികര്‍ക്ക് ആതിഥേയത്വം വഹിക്കുന്ന ഐന്‍ അല്‍-അസാദ് വ്യോമതാവളത്തിന് നേരെ ഇറാന്‍ നടത്തിയ മിസൈല്‍ ആക്രമണത്തെക്കുറിച്ച്‌ ചര്‍ച്ച ചെയ്യുന്നതിനിടെയാണ് ഹാജിസാദെയുടെ വിവാദ പരാമര്‍ശം. ആക്രമണത്തില്‍ ഒരു അമേരിക്കന്‍ സൈനികരും കൊല്ലപ്പെട്ടിരുന്നില്ല. ഐആര്‍ജിസിയുടെ വിദേശ വിഭാഗമായ ഖുദ്‌സ് ഫോഴ്‌സിനെ നയിച്ച സുലൈമാനി, ട്രംപിന്റെ നിര്‍ദേശപ്രകാരം ഇറാഖില്‍ യുഎസ് നടത്തിയ വ്യോമാക്രമണത്തില്‍ കൊല്ലപ്പെടുകയായിരുന്നു.
ഐന്‍ അല്‍ അസദിനെതിരായ ആക്രമണത്തിന് പ്രതികാരം ചെയ്യുമെന്ന് ഇറാന്‍ ഉദ്യോഗസ്ഥര്‍ ആവര്‍ത്തിച്ച്‌ പ്രതിജ്ഞയെടുത്തു. കഴിഞ്ഞ മാസം, സുലൈമാനിയുടെ കൊലപാതകത്തിന്റെ മൂന്നാം വാര്‍ഷികത്തില്‍ സംസാരിച്ച പ്രസിഡന്റ് ഇബ്രാഹിം റൈസി, സുലൈമാനിയോടുള്ള പ്രതികാരം ‘നിശ്ചയം’ എന്ന് പറഞ്ഞിരുന്നു.
