തിരുവനന്തപുരം: തൃശ്ശൂര് പൂരം കലക്കല് വിവാദത്തില് അന്വേഷണത്തിന് പ്രത്യേക സംഘത്തെ നിയോഗിച്ചു. ക്രൈം ബ്രാഞ്ച് മേധാവി എച്ച് വെങ്കിടേഷിന് കീഴിലുള്ള സംഘമാകും വിവാദത്തില് അന്വേഷണം നടത്തുക. ഡി.ഐ.ജി തോംസണ് ജോസ്, കൊല്ലം റൂറല് എസ്പി സാബു മാത്യു, കൊച്ചി എ.സി.പി പി രാജ്കുമാര് വി.ജി, ഡി.വൈ.എസ്.പി ബിജു വി നായര്, ഇന്സ്പെകര്മാരായ ചിത്തരഞ്ചന്, ആര് ജയകുമാര് എന്നിവരാണ് സംഘത്തിലുള്ളത്.
രഹസ്യസ്വഭാവമുള്ള രേഖയാണെന്ന് വ്യക്തമാക്കി പൂരം കലക്കല് വിവാദത്തില് എഡിജിപി എം ആര് അജിത്ത് കുമാര് നടത്തിയ അന്വേഷണത്തിന്റെ റിപ്പോര്ട്ട് പുറത്ത് വിടാനാകില്ലെന്ന് സംസ്ഥാന സര്ക്കാര് വ്യക്തമാക്കിയിരുന്നു.ലോക്സഭാ തെരഞ്ഞെടുപ്പില് തൃശ്ശൂരിലെ സിപിഐ സ്ഥാനാര്ത്ഥിയായിരുന്ന വി.എസ് സുനില് കുമാറിന്റെ വിവരാവകാശ അപേക്ഷയിലാണ് മറുപടിയായി സംസ്ഥാന സര്ക്കാര് ഇക്കാര്യം വ്യക്തമാക്കിയിരിക്കുന്നത്. ആഭ്യന്തര വകുപ്പുമായി ബന്ധപ്പെട്ട രഹസ്യ സ്വഭാവമുള്ളതിനാല് റിപ്പോര്ട്ട് നല്കാനാവില്ലെന്നാണ് മറുപടി നല്കിയത്. സുനില് കുമാറിന് അപ്പീല് നല്കാമെന്നും മറുപടിയില് പറയുന്നു.
തൃശ്ശൂര് പൂരം കലക്കലില് ഗൂഢാലോചന നടന്നിട്ടുണ്ടെന്ന് മുഖ്യമന്ത്രി തന്നെ പരസ്യ നിലപാട് സ്വീകരിച്ചിരുന്നു. എന്നാല്, ഈ ഗൂഢാലോചനയ്ക്ക് പിന്നിലാരാണെന്നും എന്ത് തരത്തിലാണ് ഇത് നടത്തിയതെന്നും വെളിപ്പെടുത്തുന്ന റിപ്പോര്ട്ടാണ് പൂഴ്ത്തിയിരിക്കുന്നത്. വിവരാവകാശ നിയമത്തിലെ സെക്ഷന് 24/4 അനുസരിച്ച് രഹസ്യസ്വഭാവമുള്ള രേഖയായി പരിഗണിച്ചാണ് ഈ റിപ്പോര്ട്ട് ആഭ്യന്തര വകുപ്പ് പുറത്തുവിടാത്തത്.
ഇക്കാര്യത്തില് ഗൂഢാലോചന നടന്നിട്ടുണ്ടെങ്കില് ഇത് സംബന്ധിച്ച വിവരങ്ങള് പുറത്തുവരണമെന്ന നിലപാടാണ് ഇരു ദേവസ്വങ്ങളും സ്വീകരിച്ചത്. പൂരം കലക്കലുമായി ബന്ധപ്പെട്ട കേസ് ഹൈക്കോടതിയില് ഉള്പ്പെടെ നിലനില്ക്കുന്നുണ്ടെങ്കിലും അവിടെയൊന്നും സര്ക്കാര് ഈ റിപ്പോര്ട്ട് സമര്പ്പിച്ചിട്ടില്ല. അതുകൊണ്ടുതന്നെ വിവരാവകാശ നിയമം മുഖേന മാത്രമേ ഈ റിപ്പോര്ട്ട് പുറത്തുവരാനുള്ള സാധ്യതയുള്ളൂ.
വിവരാവകാശ നിയമത്തിലെ 24/4 സെക്ഷന് അനുസരിച്ച് രാജ്യതാത്പര്യത്തെ മുന്നിര്ത്തി രാജ്യസുരക്ഷയെ ബാധിക്കുന്ന രഹസ്യ സ്വഭാവമുള്ള കാര്യങ്ങള്, ഇന്റലിജന്സ് രേഖകള് എന്നിവയാണ് വിവരാവകാശ നിയമം വഴി പുറത്തുവിടേണ്ടാത്തവ. ഇത്തരം വിവരങ്ങള് കൈകാര്യം ചെയ്യുന്ന സെക്ഷനുകളെ വിവരാവകാശ നിയമത്തിന്റെ പരിധിയില് നിന്ന് ഒഴിവാക്കിയിട്ടുണ്ട്. ഇത്തരത്തില് ഇന്റലിജെന്സ് രേഖകള്, സെന്സിറ്റീവ് റെക്കോഡുകള് എന്നിവയാണ് ആഭ്യന്തര വകുപ്പിലെ ആര്.ടി.ഐ. പരിധിയില് വരാത്ത രേഖകള്.