ടെക്സസ്: ടെസ്‌ല, സ്പേസ് എക്‌സ് സിഇഒ ഇലോൺ മസ്ക് ടെക്‌‌സസിൽ വോട്ടു രേഖപ്പെടുത്തി. ബ്രൗൺസ്‌വില്ലെയിലെ ബോബ് ക്ലാർക്ക് സോഷ്യൽ സർവീസ് സെൻ്ററിന് പുറത്ത് മറ്റ് നാല് ആളുകളുമൊത്തുള്ള ഒരു ചിത്രം മസ്ക് എക്സിൽ പോസ്റ്റ് ചെയ്തിരുന്നു. കാമറൂൺ കൗണ്ടി വെബ്‌സൈറ്റിൽ ലിസ്റ്റ് ചെയ്തിട്ടുള്ള 60-ലധികം വോട്ടിംഗ് ലൊക്കേഷനുകളിൽ ഒന്നാണ് ബോബ് ക്ലാർക്ക് സോഷ്യൽ സർവീസ് സെൻ്റർ .
“ടെക്സസിലെ കാമറൂൺ കൗണ്ടിയിൽ, സ്റ്റാർബേസിൻ്റെ ഭവനത്തിൽ വോട്ട് ചെയ്തു!” ഫോട്ടോയുടെ അടിക്കുറിപ്പിൽ മസ്ക് പറഞ്ഞു.
പ്രസിഡൻഷ്യൽ തിരഞ്ഞെടുപ്പ് പ്രചാരണത്തിലുടനീളം, മുൻ പ്രസിഡൻ്റ് ഡൊണാൾഡ് ട്രംപിനെ മസ്ക് പരസ്യമായി പിന്തുണച്ചിരുന്നു. ന്യൂയോർക്കിലെ മാഡിസൺ സ്‌ക്വയർ ഗാർഡനിൽ സംഘടിപ്പിച്ച റാലി ഉൾപ്പെടെ ഒന്നിലധികം റാലികളിലും അദ്ദേഹം പങ്കെടുത്തിട്ടുണ്ട്. ട്രംപിന്റെ തിരഞ്ഞടുപ്പ് പ്രചാരണത്തിനായി കോടിക്കണക്കിന് ഡോളറാണ് മസ്ക് സംഭാവനയായി നൽകിയത്.
