മോഹൻലാലും (Mohanlal) രവീന്ദ്രനും (Ravindar Elias) കൈകോർത്തുകൊണ്ട് മലയാള സിനിമയിൽ ഒരു സ്വതന്ത്ര ആന്തോളജി ചിത്രത്തിന്റെ നിർമാണം ആരംഭിക്കുന്നു. മോഹൻലാൽ ചെയർമാനും രവീന്ദ്രൻ സി.ഇ.ഒയുമായ കൊച്ചി മെട്രോ ഷോർട്ട് ഫിലിം ഫെസ്റ്റിന്റെ (Kochi Metro Short Film Fest) ആഭിമുഖ്യത്തിൽ സ്വതന്ത്ര സിനിമയായ ‘ഫാമിലി സ്റ്റോറീസ്’ നിർമിക്കും. അമ്മയിൽ അംഗങ്ങളായവരെ മാത്രം ഉൾപ്പെടുത്തിയാണ് ചിത്രം ഒരുക്കുന്നത്. അവാർഡ് ജേതാക്കളായ പ്രശസ്തരുടെ കൂട്ടായ്മയിലാണ് നിർമാണം.
മെക്കാർട്ടിൻ, എം.പത്മകുമാർ, ജി.എസ്.വിജയൻ, രമേശ് പിഷാരടി, ജിബു ജേക്കബ് തുടങ്ങിയവരായിരിക്കും അഞ്ച് കുടംബ കഥകളെ ആസ്പദമാക്കിയുള്ള ആന്തോളജി സിനിമയുടെ സംവിധായകർ. മലയാളത്തിലെ പ്രമുഖ ഛായഗ്രഹൻമാരായ അളഗപ്പൻ, പി. സുകുമാർ എന്നിവരാണ് ചിത്രത്തിന് ക്യാമറ ചലിപ്പിക്കുന്നത്. മലയാളസിനിമയിലെ പ്രമുഖരായ പട്ടണം റഷീദ് മേക്കപ്പും അരുൺ വർമ്മ സൗണ്ട് ഡിസൈനിംഗും ദീപക് വി.എഫ്.എക്‌സും സന്തോഷ് വർമ്മ ഗാനരചനയും നിർവ്വഹിക്കും.
ഈ സംരംഭത്തിൽ പ്രതിഭകളായ പുതിയ എഴുത്തുകാരുടെ കഥകൾ ഉപ്പെടുത്തും. പ്രശസ്തരായവർക്കൊപ്പം പ്രവർത്തിക്കാൻ പ്രതിഭകളായ സിനിമാ വിദ്യാർത്ഥികൾക്ക് അവസരമൊരുക്കും.
ചിത്രത്തിന്റെ അഡ്വൈസർമാരായി പ്രവർത്തിക്കുന്നത് സിബി മലയിൽ, കമൽ, രൺജി പണിക്കർ, പി. ചന്ദ്രകുമാർ, ജി. സുരേഷ് കുമാർ എന്നിവരാണ്. മലയാള സിനിമാ മേഖലയിലെ പ്രബല സംഘടനകളായ അമ്മ, ഫെഫ്ക, മാക്ട, ഫിലിം ചേമ്പർ, പ്രൊഡ്യൂസഴ്സ് അസ്സോസിയേഷൻ എന്നിവരുടെ സഹരണത്തോടെയാണ് നിർമാണം. കൊച്ചി മെട്രോ ഷോർട്ട് ഫിലിം ഫെസ്റ്റാണ് ഈ സംരഭത്തിന് നേതൃത്വം നൽകുന്നത്.
കൊച്ചി മെട്രോ ഷോർട്ട് ഫിലിം ഫെസ്റ്റ്
മലയാള ഭാഷയിലെ ഹ്രസ്വചിത്രങ്ങൾക്കായി കൊച്ചിയിൽ നടന്നുവന്ന വാർഷിക ചലച്ചിത്രമേളയാണ് കൊച്ചി മെട്രോ (മലയാളം) ഷോർട്ട് ഫിലിം ഫെസ്റ്റ്. ആനിമേഷൻ ചിത്രങ്ങൾ, വിദ്യാർത്ഥി ചിത്രങ്ങൾ, പരീക്ഷണ സിനിമകൾ, ഡോക്യുമെന്ററി ചിത്രങ്ങൾ എന്നിവ ഇവിടെ പ്രദർശിപ്പിക്കുന്നു. 2014 ൽ ഗോൾഡ് സൂക്ക് ഗ്രാൻഡ് കൊച്ചിയിൽ രവീന്ദ്രൻ മുൻകൈയെടുത്താണ് ഈ ഫെസ്റ്റിവൽ ആരംഭിച്ചത്.
2014 ഡിസംബർ 26 മുതൽ 2015 ജനുവരി 11 വരെ നടന്ന ഈ മേളയിൽ 360 ലധികം ഹ്രസ്വചിത്രങ്ങൾ പ്രദർശിപ്പിച്ചു. വനിതാ സംവിധായകരുടെ ഹ്രസ്വചിത്രങ്ങളും പ്രേക്ഷകർക്കായി പ്രദർശിപ്പിച്ചു. മോഹൻലാൽ, മഞ്ജു വാര്യർ, ചലച്ചിത്ര സംവിധായകൻ സത്യൻ അന്തിക്കാട് എന്നിവർ പങ്കെടുത്തു
ഷാർജ, അബുദാബി, ദുബായ് എന്നിവിടങ്ങളിലെ ഷോർട്ട് ഫിലിം നിർമ്മാതാക്കൾക്ക് നല്ലൊരു വേദി ഒരുക്കുക എന്ന ലക്ഷ്യത്തോടെ പ്രവാസികളെ ലക്ഷ്യമിട്ട് 2016 സെപ്റ്റംബർ 23 ന് ഫെസ്റ്റിവൽ അതിന്റെ യുഎഇ ചാപ്റ്ററും ആരംഭിച്ചു. പരിചയസമ്പന്നരായ ചലച്ചിത്ര പ്രവർത്തകർക്കായി പ്രവാസം (പ്രവാസി ജീവിതത്തെക്കുറിച്ച്), സ്നേഹം (പ്രണയം) എന്നീ രണ്ട് തീം അധിഷ്ഠിത മത്സരങ്ങൾ നടത്തിയിരുന്നു.
