സ്മാര്‍ട്‌ഫോണിന്റെയും മറ്റു ഡിജിറ്റല്‍ ഉപകരണങ്ങളുടെയും ദീര്‍ഘകാലത്തെ ഉപയോഗം ശാരീരികവും മാനസികവുമായ നിരവധി പ്രശ്‌നങ്ങളുണ്ടാക്കുമെന്നത് തെളിയിക്കപ്പെട്ട കാര്യമാണല്ലോ. എന്നാല്‍, ഇത് വയോധികരിലാണെങ്കില്‍ ഗുണമുണ്ടാക്കുമെന്നാണ് പുതിയ പഠനം പറയുന്നത്.
ആഗോളാടിസ്ഥാനത്തില്‍ നടത്തിയ പഠനങ്ങളുടെ അവലോകനത്തില്‍, സ്മാര്‍ട്ട്ഫോണുകളും മറ്റ് ഡിജിറ്റല്‍ ഉപകരണങ്ങളും പതിവായി ഉപയോഗിക്കുന്ന പ്രായമായവര്‍ക്ക് തലച്ചോറിന്റെ ആരോഗ്യം മെച്ചപ്പെടാന്‍ സാധ്യതയുണ്ടെന്നാണ് കണ്ടെത്തിയിരിക്കുന്നത്.
ഡോ. ജാരെഡ്, ബെന്‍ഗെ, ഡോ. മൈക്കല്‍ സ്‌കുള്ളിന്‍ എന്നിവരുടെ നേതൃത്വത്തിലെ ഗവേഷകരുടെ സംഘം 50 വയസ്സിന് മുകളില്‍ പ്രായമുള്ള 4,00,000ത്തിലധികം ആളുകളില്‍നിന്നുള്ള ഡാറ്റയാണ് പഠിച്ചത്. 57 മേഖലകളില്‍ വിശകലനം ചെയ്ത ശേഷമാണ്, സ്മാര്‍ട്‌ഫോണുകള്‍, കംപ്യൂട്ടറുകള്‍ അല്ലെങ്കില്‍ ഇന്റര്‍നെറ്റ് എന്നിവ പതിവായി ഉപയോഗിക്കുന്നവരുടെ തലച്ചോര്‍ സജീവമായി നില്‍ക്കുന്നെന്ന് കണ്ടെത്തിയത്.
സാങ്കേതികവിദ്യ ആളുകളെ മടിയന്മാരാക്കുന്ന ഡിജിറ്റല്‍ ഡിമന്‍ഷ്യ പ്രവണതക്ക് വിപരീതമാണ് പുതിയ കണ്ടെത്തല്‍. തലച്ചോറിനെ ദോഷകരമായി ബാധിക്കുന്നതിന് പകരം സജീവമാക്കുകയാണത്രെ ചെയ്യുന്നത്. വാര്‍ത്തകള്‍ വായിക്കുക, പ്രശ്‌നോത്തരികള്‍ ചിന്തിക്കുക, സുഹൃത്തുക്കളുമായുള്ള ചാറ്റുകള്‍ തുടങ്ങിയവയാണ് ഇതിന് സഹായിക്കുന്നത്.
