കൊച്ചി : നടിയെ ആക്രമിച്ച കേസില്‍ സാക്ഷികളെ വീണ്ടും വിസ്തരിക്കാന്‍ മതിയായ കാരണം വേണമെന്ന് ഹൈക്കോടതി. കേസിലെ പ്രതികള്‍ക്കും അവകാശങ്ങള്‍ ഉണ്ട്.
അതും സംരക്ഷിക്കപ്പെടേണ്ടതുണ്ടെന്നും ഹെക്കോടതി അറിയിച്ചു. കേസില്‍ സാക്ഷികളെ വിസ്തരിച്ച്‌ മാസങ്ങള്‍ക്ക് ശേഷം വീണ്ടും വിസ്തരിക്കണമെന്ന് പ്രോസിക്യൂഷന്‍ ആവശ്യം ഉന്നയിച്ചതിന് പിന്നാലെയാണ് ഹൈക്കോടതിയുടെ ഈ പരാമര്‍ശം.
പ്രോസിക്യൂഷന്റെ പാളിച്ചകള്‍ മറികടക്കുന്നതിനാകരുത് സാക്ഷികളെ വീണ്ടും വിസ്തരിക്കുന്നത്. ഇത് പ്രോസിക്യൂഷന്റെ കേസിന് അനുസൃതമായി സാക്ഷിമൊഴികളുണ്ടാക്കാനാണെന്ന് സംശയിക്കുന്നതായും കോടതി പറഞ്ഞു
ബാലചന്ദ്ര കുമാറിന്റെ വെളിപ്പെടുത്തലുകളും കേസും തമ്മില്‍ എന്ത് ബന്ധമാണ് ഉള്ളതെന്നും കോടതി ചോദിച്ചു. ഇയാളുടെ വെളിപ്പെടുത്തലുകള്‍ കേസിനെ എങ്ങനെയാണ് സഹായിക്കുക എന്നായിരുന്നു കോടതിയുടെ ചോദ്യം. വിചാരണക്കോടതി നടപടിക്കെതിരായ പ്രോസിക്യൂഷന്‍ ഹര്‍ജിയിലാണ് ഹൈക്കോടതി പരാമര്‍ശങ്ങള്‍.
നടന്‍ ദിലീപ് അടക്കമുള്ളവര്‍ കേസിനെ അട്ടിമറിക്കാന്‍ ശ്രമിക്കുന്നതായി സംവിധായകന്‍ ബാലചന്ദ്രകുമാര്‍ ശബ്ദരേഖ പുറത്തുവിട്ടിരുന്നു. അതിനു പിന്നാലെയാണ് കോടതിയുടെ പ്രസ്താവന. കേസില്‍ സംവിധായകന്റെ മൊഴി രേഖപ്പെടുത്തുന്നതിനായി എറണാകുളം ജുഡീഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതി നോട്ടീസ് നല്‍കിയിട്ടുണ്ട്.
