സന: യെമന് പൗരനെ കൊലപ്പെടുത്തിയ കേസില് മലയാളി നഴ്സ് നിമിഷപ്രിയയുടെ വധശിക്ഷ ഒഴിവാക്കാനുള്ള ശ്രമങ്ങള് ആരംഭിച്ചു.സേവ് നിമിഷപ്രിയ ഗ്ലോബല് ആക്ഷന് കമ്മിറ്റിയാണ് ഇക്കാര്യം അറിയിച്ചത്.
ദയാധനം നല്കി നിമിഷയെ മോചിപ്പിക്കാനുള്ള ശ്രമങ്ങളാണ് നടക്കുന്നത്. ദയാധനമായി രണ്ട് കോടി രൂപവരെ നല്കേണ്ടി വന്നേക്കുമെന്നാണ് ആക്ഷന് കമ്മിറ്റിയുടെ കണക്കുകൂട്ടല്.
ഒരു മാസത്തിനുള്ളില് ഈ തുക കണ്ടെത്തണം. നിമിഷയുടെ വധശിക്ഷക്കെതിരെ ഉടന് സുപ്രീം കോടതിയില് അപ്പീല് പോകുമെന്നും കമ്മിറ്റി വ്യക്തമാക്കി.
കഴിഞ്ഞ തിങ്കളാഴ്ചയാണ് യെമന് പൌരന് തലാല് അബ്ദുമഹ്ദിയെ കൊലപ്പെടുത്തിയ കേസില് പാലക്കാട് കൊല്ലങ്കോട് സ്വദേശി നിമിഷ പ്രിയയുടെ വധശിക്ഷ സനായിലെ അപ്പീല് കോടതി ശരിവെച്ചത്. വിചാരണക്കോടതി വിധിച്ച വധശിക്ഷയ്ക്കെതിരെയാണ് നിമിഷ പ്രിയ ഇന്ത്യന് എംബസിയുടെ സഹായത്തോടെ അപ്പീല് കോടതിയെ സമീപിച്ചത്. കേസിലെ വാദം കഴിഞ്ഞ ജനുവരിയില് പൂര്ത്തിയായിരുന്നു. സ്ത്രീയെന്ന പരിഗണന നല്കി കുറ്റവിമുക്തയാക്കുകയോ വധശിക്ഷയില് നിന്ന് ഒഴിവാക്കുകയോ വേണമെന്നായിരുന്നു നിമിഷ പ്രിയയുടെ ആവശ്യം. എന്നാല് വധശിക്ഷ കോടതി ശരിവെക്കുകയായിരുന്നു.
തലാല് അബ്ദുമഹ്ദിയുടെ കുടംബത്തിന് ബ്ലഡ് മണി നല്കി വധ ശിക്ഷ ഒഴിവാക്കാന് ശ്രമം നടത്തിയെങ്കിലും വിജയിച്ചില്ല. 2017 ജൂലൈ 25 നാണ് പാലക്കാട് കൊല്ലങ്കോട് സ്വദേശി നിമിഷ പ്രിയ യെമന്കാരനായ തലാല് അബ്ദുമഹ്ദിയെ കൊലപ്പെടുത്തി വീട്ടിലെ വാട്ടര് ടാങ്കില് ഒളിപ്പിച്ചത്.
തലാലിനൊപ്പം ക്ലിനിക് നടത്തുകയായിരുന്നു നിമിഷപ്രിയ. സ്വന്തമായി ക്ലിനിക് തുടങ്ങാന് സഹായ വാഗ്ദാനവുമായി വന്ന യെമന് പൌരന് തലാല് അബ്ദുമഹദി പാസ്പോര്ട്ട് പിടിച്ചെടുത്ത് നടത്തിയ ക്രൂര പീഡനമാണ് കൊലപാതകത്തിലേക്ക് നയിച്ചത് എന്നാണ് നിമിഷയുടെ വാദം. പാസ്പോര്ട്ട് പിടിച്ചുവെച്ച് നാട്ടില് വിടാതെ പീഡിപ്പിക്കുകയും ഭീഷണിപ്പെടുത്തുകയും ചെയ്തിരുന്നതായി നിമിഷര് ആരോപിച്ചിരുന്നു.