ഗ്രൂപ്പ് സിയിലെ ആദ്യ മത്സരത്തില്‍ സൗദി അറേബ്യക്ക് മുന്നില്‍ അടിയറവ് പറഞ്ഞ ലുസൈല്‍ സ്റ്റേഡിയത്തില്‍ അര്‍ജന്റീന ഇന്ന് ജീവന്‍ മരണ പോരാട്ടത്തിന്.
മെക്സിക്കൊയാണ് ലയണല്‍ മെസിയുടെ ലോകകപ്പ് ഭാവികള്‍ നിര്‍ണയിക്കുന്ന മത്സരത്തിലെ എതിരാളികള്‍. ജയമല്ലാതെ മറ്റൊരു ഫലം രണ്ടാം മത്സരത്തിനിറങ്ങുന്ന അര്‍ജന്റീന മുന്നില്‍ ഉണ്ടാകില്ല.
പ്രതീക്ഷിച്ച തുടക്കം ലഭിക്കാത്ത മെസിപ്പടയ്ക്ക് ഇനിയുള്ള രണ്ട് മത്സരങ്ങളിലും ജയം നേടിയാല്‍ ആത്മവിശ്വാസത്തോടെ ക്വാര്‍ട്ടറിലേക്ക് കടക്കാന്‍ കഴിയും. ടീമില്‍ അടിമുടി മാറ്റങ്ങളുണ്ടായേക്കുമെന്ന സൂചനകള്‍ സൗദിയോടേറ്റ തോല്‍വിക്ക് പിന്നാലെ ഉയര്‍ന്നിരുന്നു. ലയണല്‍ സ്കലോണിയുടെ തന്ത്രങ്ങള്‍ നിര്‍ണായക മത്സരത്തില്‍ എന്തായിരിക്കുമെന്ന് ഉറ്റുനോക്കുകയാണ് ലോകം.
മറുവശത്ത് കരുത്തരായ പോളണ്ടിനെ സമനിലയില്‍ തളച്ചതിന്റെ ആത്മവിശ്വസം മെക്സിക്കൊയ്ക്ക് ഉണ്ടാകും. അര്‍ജന്റീനയെപ്പോലെ തന്നെ മെക്സിക്കൊയ്ക്കും മത്സരം നിര്‍ണായകമാണ്. തോല്‍വി വഴങ്ങിയാല്‍ ലോകകപ്പ് സാധ്യതകള്‍ മങ്ങും.
അര്‍ജന്റീന – മെക്സിക്കൊ ലോകകപ്പ് മത്സരം ഇന്ത്യന്‍ സമയം പുലര്‍ച്ചെ 12.30-ന് ആരംഭിക്കും.
