ജെസ്സ്‌മോന്‍ പുറമഠം
ചിക്കാഗോ: 2023 സെപ്റ്റംബര്‍ 4-ാം തീയതി നടക്കുന്ന ചിക്കാഗോ സോഷ്യല്‍ ക്ലബ്ബിന്റെ 9-ാമത് ഇന്റര്‍നാഷണല്‍ വടംവലിയുടെ ചെയര്‍മാനായി ശ്രീ സിറിയക് കൂവക്കാട്ടിലിന്റെ നേതൃത്വത്തിലുള്ള ഒരു നാലംഗ കമ്മിറ്റിയെ തെരഞ്ഞെടുത്തു. ശ്രീ. മാനി കരികുളം വൈസ് ചെയര്‍മാന്‍, ശ്രീ. മാത്യു തട്ടാമറ്റം ജനറല്‍ കണ്‍വീനര്‍, ശ്രീ. ബിനു കൈതക്കത്തൊട്ടി ഫൈനാന്‍സ് കമ്മിറ്റി ചെയര്‍മാന്‍.
ശ്രീ. സിറിയക് കൂവക്കാട്ടില്‍ ഇത് നാലാം തവണയാണ് ചിക്കാഗോ വടംവലിയുടെ ചെയര്‍മാനായി തെരഞ്ഞെടുക്കുന്നത്. ശ്രീ. സിറിയക് കൂവക്കാട്ടിലിനെപ്പറ്റി പറഞ്ഞാല്‍ നോര്‍ത്ത് അമേരിക്കയിലെ കലാ-കായിക-സാംസ്‌കാരിക-രാഷ്ട്രീയ രംഗത്തെ നിറസാന്നിദ്ധ്യമാണ്. നോര്‍ത്ത് അമേരിക്കയില്‍ പകരം വയ്ക്കാനില്ലാത്ത സംഘാടകമികവ് മുന്‍ കെ.സി.എസ്. പ്രസിഡന്റ്, മുന്‍ കെ.സി.സി.എന്‍.എ. പ്രസിഡന്റ്, ഇല്ലിനോയി മലയാളി അസോസിയഷന്‍ മുന്‍ ഭാരവാഹി, ചിക്കാഗോയില്‍ നടന്ന ജിമ്മി ജോര്‍ജ്ജ് മെമ്മോറിയല്‍ വോളിബോള്‍ ടൂര്‍ണമെന്റിന്റെ ചെയര്‍മാന്‍, ചിക്കാഗോയില്‍ വച്ച് നടന്ന എന്‍.കെ. ലൂക്കോസ് മെമ്മോറിയല്‍ വോളിബോള്‍ ടൂര്‍ണമെന്റിന്റെ ജനറല്‍ കണ്‍വീനര്‍ അങ്ങനെ അങ്ങനെ എണ്ണിയാല്‍ തീരാത്ത പദവികള്‍ വഹിച്ച ശ്രീ. സിറിയക് കൂവക്കാട്ടില്‍ നല്ലൊരു കായികതാരവും കായികപ്രേമിയും ചിക്കാഗോയിലെ ഒരു ലീഡിംഗ് ബിസിനസ്മാന്‍ കൂടിയാണ്. ഇതിനെല്ലാമുപരി നല്ലൊരു ഈശ്വരവിശ്വാസിയുമാണ്.
ശ്രീ. മാനി കരികുളം ചിക്കാഗോ സോഷ്യല്‍ ക്ലബ്ബിന്റെ മുന്‍ ട്രഷററും, ചിക്കാഗോയില്‍ മുമ്പ് നടന്ന വടംവലിയുടെ ഫൈനാന്‍സ് കമ്മിറ്റി ചെയര്‍മാനും, എല്ലാവരെയും ഒരു കുടക്കീഴില്‍ കൊണ്ടുവന്ന് ഈ വടംവലി ടൂര്‍ണമന്റിനെ വിജയത്തിലെത്തിക്കാന്‍ കഴിവുള്ള നല്ലൊരു സംഘാടകനും ഇതിനെല്ലാമുപരി നല്ലൊരു മനുഷ്യസ്‌നേഹിയുമാണ്. സോഷ്യല്‍ ക്ലബ്ബിന്റെ ഈ വടംവലി മത്സരത്തിന്റെ വിജയത്തിന് അദ്ദേഹം നല്ലൊരു മുതല്‍ക്കൂട്ടായിരിക്കും.
ഈ ടൂര്‍ണമെന്റിന്റെ ജനറല്‍ കണ്‍വീനറായി തെരഞ്ഞെടുക്കപ്പെട്ട ശ്രീ. മാത്യു തട്ടാമറ്റത്തെപ്പറ്റി പറയുകയാണെങ്കില്‍ ചിക്കാഗോ സോഷ്യല്‍ ക്ലബ്ബിന്റെ ഫൗണ്ടിംഗ് എക്‌സിക്യൂട്ടീവില്‍ തുടങ്ങി കഴിഞ്ഞ 10 വര്‍ഷക്കാലമായി എല്ലാ എക്‌സിക്യൂട്ടീവിന്റെയും കൂടെ നിഴലായി പ്രവര്‍ത്തിക്കുകയും, ഈ വടംവലി ടൂര്‍ണമെന്റിനെ ഏഴാംകടലിനുമപ്പുറമെത്തിച്ച് അന്താരാഷ്ട്ര നിലവാരത്തിലേക്ക് എത്തിച്ചതില്‍ ഒരു മുഖ്യ പങ്കു വഹിക്കുകയും, കൂടാതെ സോഷ്യല്‍ ക്ലബ്ബ് എന്ന ഈ പ്രസ്ഥാനത്തെയും അതിന്റെ പ്രവര്‍ത്തനങ്ങളെയും ലോകപ്രശസ്തിയിലെത്തിക്കുവാന്‍ പ്രയത്‌നിച്ച വ്യക്തി കൂടിയാണ്.
ഈ ടൂര്‍ണമെന്റിന്റെ ഫൈനാന്‍സ് കമ്മിറ്റി ചെയര്‍മാനായി തെരഞ്ഞെടുത്ത ശ്രീ. ബിനു കൈതക്കത്തൊട്ടി സോഷ്യല്‍ ക്ലബ്ബിന്റെ ഫൗണ്ടിംഗ് എക്‌സിക്യൂട്ടീവ് വൈസ് പ്രസിഡന്റ് മുതല്‍ പ്രസിഡന്റ് പദവി വരെ അലങ്കരിക്കുകയും ഈ ഇന്റര്‍നാഷണല്‍ വടംവലിയെ ലോകനെറുകയില്‍ എത്തിച്ചതില്‍ മുഖ്യപങ്കു വഹിക്കുകയും, ചിക്കാഗോയിലെ മലയാളി സമൂഹത്തില്‍ ഒരു നിറസാന്നിദ്ധ്യവും കൂടിയാണ് അദ്ദേഹം.
ഈ നാലു പേരെയും ഈ വര്‍ഷത്തെ ഇന്റര്‍നാഷണല്‍ വടംവലിയുടെ നേതൃത്വത്തിലേക്ക് കിട്ടിയതോടുകൂടി ഈ വര്‍ഷവും ഈ വടംവലി ടൂര്‍ണമെന്റ് അവിസ്മരണീയമായിത്തീരും എന്നതില്‍ യാതൊരു സംശയവുമില്ലെന്ന് സോഷ്യല്‍ ക്ലബ്ബ് എക്‌സിക്യൂട്ടീവ് കമ്മിറ്റി അംഗങ്ങളായ സിബി കദളിമറ്റം (പ്രസിഡന്റ്), സിബി കൈതക്കത്തൊട്ടിയില്‍ (സെക്രട്ടറി), ജെസ്സ്‌മോന്‍ പുറമഠം (വൈസ് പ്രസിഡന്റ്), ജോമോന്‍ തൊടുകയില്‍ (ട്രഷറര്‍), സാബു പടിഞ്ഞാറേല്‍ (ജോയിന്റ് സെക്രട്ടറി) എന്നിവര്‍ സംയുക്തമായി പറഞ്ഞു.
