ന്യൂജേഴ്സി : മലബാർ ഗോൾഡ് ആൻഡ് ഡയമൻഡ്സ് മിത്രാസ് ഫെസ്റ്റിവൽ ആൻഡ് അവാർഡ് നൈറ്റിന്റെ ഒരുക്കങ്ങൾ പൂർത്തിയായി വരുന്നതായി സംഘാടകർ അറിയിച്ചു. നോർത്ത് അമേരിക്കയിലെ ഏറ്റവും വലിയ കലാമാമാങ്കങ്ങളിലൊന്നായ മിത്രാസ് ഇന്ത്യൻ ഫെസ്റ്റിവൽ ആൻഡ് അവാർഡ് നൈറ്റ് ഈ വർഷം അരങ്ങേറുന്നത് ന്യൂ ജേഴ്സിയിലുള്ള ക്ലിഫ്ടൺ നഗരം വേദിയാക്കിയാണ് .
![](https://nerkazhcha.online/wp-content/uploads/2024/06/malabar_2.jpg)
കന്യാകുമാരി മുതൽ കാശ്മീർ വരെ എന്ന് നാമകരണം ചെയ്തിരിക്കുന്ന ഈ നിറവർണങ്ങളുടെ ഉത്സവത്തിനു മാറ്റ് കൂട്ടുന്നതിനായി നോർത്ത് അമേരിക്കയിലെ അനുഗ്രഹീത കലാകാരന്മാരോടൊപ്പം പ്രസിദ്ധ അഭിനേത്രികളായ മാന്യയും, സുവർണയും, പിന്നണിഗായകൻ ഫ്രാങ്കോയും, കൂടാതെ സെലിബ്രിറ്റി ഡാൻസറും കോറിയോഗ്രാഫറും ആയ നീരവ് ബവ്ലേച്ഛയും അണിനിരക്കുന്നു.
![](https://nerkazhcha.online/wp-content/uploads/2024/06/malabar_3.jpg)
നോർത്ത് അമേരിക്കൻ ഇന്ത്യക്കാർ നിർമിച്ച ഷോർട് ഫിലിം അവാർഡ് ഫെസ്റ്റിവലും ഇതിനോടനുബന്ധിച്ചു സംഘടിപ്പിച്ചിരികുന്നു . ഈ വർഷം മുപ്പത്തിരണ്ടോളം സിനിമകൾ മത്സര രംഗത്തുള്ളതായി അവാർഡ് ജൂറി ചെയർപേഴ്സൺ ദീപ്തി നായർ അറിയിച്ചു. സിനിമ മേഖലയിൽനിന്നുമുള്ള എഡിറ്റർ ശ്രീജിത്ത് സാരംഗ്, അഭിനേത്രിമാരായ മാന്യ നായിഡു, സുവർണ്ണ മാത്യു, നടനും നിർമിതാവുമായ ടോം ജോർജ് , അവാർഡ് ജൂറി കമ്മിറ്റിഅംഗങ്ങൾ എന്നിവർ അവാർഡ് നിർണയം അവസാനഘട്ടത്തിലെത്തിയെന്നു അറിയിച്ചു.
![](https://nerkazhcha.online/wp-content/uploads/2024/06/malabar_4.jpg)
മലബാർ ഗോൾഡ് ആൻഡ് ഡയമണ്ട്സ് മിത്രാസ് ഫെസ്റ്റിവലിന്റെ ഈ വർഷത്തെ സ്പോണ്സർമാരായി മലബാർ ഗോൾഡിനോടൊപ്പം ഹെഡ്ജ് ന്യൂയോർക്കും, ടേസ്റ്റ് ഓഫ് കേരളയും, സാജ് ഹോട്ടൽസ് ആൻഡ് റിസോർട്ടും, ലോവി റീയൽറ്റിയും കൂടി ചേരുന്നു. ഈ വർഷത്തെ അവാർഡ് നൈറ്റ് മറ്റു വർഷങ്ങളിൽ നിന്നും തികച്ചും വ്യത്യസ്തമായ അനുഭവമായിരിക്കും പ്രേക്ഷകർക്ക് സമ്മാനിക്കുകയെന്നു പ്രോഗ്രാമിന്റെ ഡയറക്ടർമാരായ സ്മിത ഹരിദാസ് , പ്രവീണ മേനോൻ, ജെംസൺ കുര്യാക്കോസ്, ശാലിനി രാജേന്ദ്രൻ, ശോഭ ജേക്കബ് എന്നിവരറിയിച്ചു.
ഈ വർഷത്തെ അവാർഡ് നൈറ്റ് വൻ വിജയമാക്കുവാൻ എല്ലാവരും ഒരുമിച്ചു നിൽക്കണമെന്നും, വിജയത്തിനായുള്ള എല്ലാ സഹായങ്ങളും എല്ലാവരും നൽകണമെന്നും, പരിപാടിയിലേക്ക് ഏവരേയും സാദരം ക്ഷണിക്കുന്നതായും അവാർഡ് നെറ്റിന്റെ ഗുഡ് വിൽ അംബാസിഡർമാരായ ദീത്ത നായർ, ബോബിബാൽ, ഡോക്ടർ എലിസബത്ത് മാമൻ എന്നിവരറിയിച്ചു.
![](https://nerkazhcha.online/wp-content/uploads/2024/06/malabar_5.jpg)
ജാതിമതസംഘടനാ വ്യത്യാസങ്ങൾക്കു അതീതമായി കലയേയും, കലാകാരന്മാരെയും അകമഴിഞ്ഞ് സ്നേഹിക്കുന്ന എല്ലാ കലാസ്വാദകരേയും ഉൾകൊള്ളിച്ചുകൊണ്ട് അമേരിക്കയിലുള്ള തനതായ കലാകാരന്മാരെ വളർത്തി കൊണ്ടുവരുന്നതിന് വേണ്ടി 2011-ൽ സ്ഥാപിതമായ മിത്രാസ് ആർട്സ് ചുരുങ്ങിയ കാലംകൊണ്ട് തന്നെ മികച്ചൊരു കലാ സംഘടനയായി അമേരിക്കയിൽ പേരെടുത്തു കഴിഞ്ഞു . തുടർന്നും മിത്രാസ് അമേരിക്കൻ കലാകാരന്മാരുടെ വളര്ച്ചയ്ക്ക് വേണ്ടി തങ്ങളാൽ ആവുന്നതെല്ലാം ചെയ്യുമെന്നു അറിയിച്ചു.
ഈ കലാ സംരംഭത്തിന്റെ തയ്യാറെടുപ്പുകൾ തുടങ്ങി അവസാനം വരെ ഒരു കുടുംബം പോലെ മിത്രാസിനോടൊപ്പം പ്രവർത്തിക്കുന്ന എല്ലാ മാധ്യമങ്ങളോടും, കല,സാംസ്ക്കാരിക, സാമൂഹിക സംഘടനകളോടും ഉള്ള നന്ദിയും കടപ്പാടും പറഞ്ഞാൽ തീരാത്തതാണെന്നു മിത്രാസ് അറിയിച്ചു.