മാത്യുക്കുട്ടി ഈശോ
ന്യൂയോര്‍ക്ക്: നോര്‍ത്ത് അമേരിക്കയിലെ ഏറ്റവും വലിയ സി.എസ്.ഐ. ഇടവകകളില്‍ ഒന്നായ സീഫോര്‍ഡ് സി.എസ്.ഐ ഇടവകയുടെ 2024-ലെ വാര്‍ഷിക സുവിശേഷ കണ്‍വെന്‍ഷന്‍ ആഗസ്റ്റ് 30, 31 (വെള്ളി, ശനി) ദിവസങ്ങളില്‍ വൈകിട്ട് 7 മണി മുതലും സെപ്റ്റംബര്‍ 1 ഞായര്‍ രാവിലെ 10 മണി മുതലും സ്ഫോര്‍ഡിലുള്ള പള്ളി അങ്കണത്തില്‍(3833 Jerusalem Avenue, Seaford, NY 11783) വച്ച് നടത്തപ്പെടുന്നു. തിരുവല്ലയില്‍ നിന്നുള്ള പ്രശസ്ത സുവിശേഷ പ്രാസംഗികനായ ചെറി ജോര്‍ജ് ചെറിയാന്‍ സുവിശേഷ യോഗങ്ങള്‍ക്ക് നേതൃത്വം നല്‍കുന്നു. ‘തകര്‍ക്കപ്പെട്ട മതിലുകള്‍ പുനര്‍നിര്‍മ്മിക്കുക’ (REBUILD THE BROKEN WALLS)
എന്ന ഈ വര്‍ഷത്തെ മുഖ്യ ചിന്താവിഷയം ആസ്പദമാക്കിയുള്ള അനുഗ്രഹീതമായ പ്രസംഗങ്ങള്‍ ശ്രവിക്കുവാനും അതിലൂടെ ആത്മീയ അനുഗ്രഹങ്ങള്‍ നേടുവാനും സഭാ വ്യത്യാസമില്ലാതെ എല്ലാവരെയും സീഫോര്‍ഡ് സി.എസ്.ഐ. പള്ളിയിലേക്ക് സ്വാഗതം ചെയ്യുന്നു. ഈ അനുഗ്രഹീത സുവിശേഷകന്റെ ന്യൂയോര്‍ക്കിലെ ഒരേയൊരു സുവിശേഷ യോഗമാണ് സി.എസ്.ഐ പള്ളിയില്‍ ക്രമീകരിച്ചിരിക്കുന്നത്.
1950-കളില്‍ ആരംഭിച്ച ക്രിസ്തീയ പ്രസിദ്ധീകരണമായ ‘നവജീവോദയം’ മാസികയുടെ പ്രസാധകനും നവജീവോദയം ബൈബിള്‍ സ്‌കൂളിന്റെ സ്ഥാപകനുമായ പ്രശസ്ത സുവിശേഷകന്‍ പരേതനായ നവജീവോദയം കെ. വി. ചെറിയാന്റെ കൊച്ചുമകനും, തിരുവല്ല ആസ്ഥാനമായി പ്രവര്‍ത്തിക്കുന്ന ‘മിഷന്‍സ് ഇന്ത്യ – നവജീവോദയം’ എന്ന ക്രിസ്തീയ മിഷനറി പ്രസ്ഥാനത്തിന്റെ സ്ഥാപകനായ പ്രശസ്ത സുവിശേഷകന്‍ ജോര്‍ജ് ചെറിയാന്റെ മകനുമായ യുവ സുവിശേഷകന്‍ ചെറി ജോര്‍ജ് ചെറിയാന്‍ ഇന്ന് ലോകമെമ്പാടും അനുഗ്രഹീത ദൈവ വചനങ്ങളിലൂടെ അനേകരെ ആല്മീയ നിറവിലേക്ക് ആകര്‍ഷിക്കുന്ന സുവിശേഷകനാണ്. ബാംഗ്ലൂര്‍ ആസ്ഥാനമായി പ്രവര്‍ത്തിക്കുന്ന ഒരു മള്‍ട്ടി നാഷണല്‍ കമ്പനിയിലെ തന്റെ ഉദ്യോഗത്തോടൊപ്പം യുവജനങ്ങളുടെ ഇടയിലെ ദൈവവവചന പ്രഘോഷണത്തിലൂടെയും സംഗീത ശുശ്രൂഷയിലൂടെയും അനുഗ്രഹീത ദൈവവേല നിര്‍വഹിക്കുന്ന ചെറി ന്യൂയോര്‍ക്കിലെ യുവജനങ്ങള്‍ക്കായി 31-ന് ശനിയാഴ്ച രാവിലെ പത്തു മണി മുതല്‍ ഉച്ചയ്ക്ക് 1 മണി വരെ പ്രത്യേക യോഗവും പള്ളി അങ്കണത്തില്‍ നടത്തുന്നുണ്ട്. സഭാ വ്യത്യാസമില്ലാതെ എല്ലാ യുവജനങ്ങള്‍ക്കും ശനിയാഴ്ചത്തെ യോഗത്തില്‍ പങ്കെടുക്കാവുന്നതാണ്.
സീഫോര്‍ഡ് സി.എസ്.ഐ. ഇടവകയുടെ കണ്‍വെന്‍ഷന്‍ ഗായക സംഘത്തിന്റെ അതിമനോഹരമായ ഗാന ശുശ്രൂഷയോടൊപ്പം ചിന്താദീപ്തമായ ദൈവ വചന ശുശ്രൂഷയുടെ അനുഗ്രഹങ്ങള്‍ പ്രാപിപ്പാനും ഈ അവസരം എല്ലാ വിശ്വാസികളും വിനിയോഗിക്കണമെന്ന് സംഘാടകര്‍ അഭ്യര്‍ത്ഥിക്കുന്നു. ഞായറാഴ്ച രാവിലെ പത്തുമണിക്ക് ആരംഭിക്കുന്ന വിശുദ്ധസംസര്‍ഗ്ഗ ശുശ്രൂഷയോടൊപ്പം കണ്‍വെന്‍ഷന്‍ യോഗങ്ങള്‍ സമാപിക്കുന്നതാണ്. ഞായറാഴ്ച ആരാധനക്ക് ശേഷം ഇടവകയുടെ ആദിഫലപ്പെരുന്നാള്‍ കൊണ്ടാടുന്നതുമാണ്.
അടുത്ത മൂന്നു ദിവസങ്ങളിലായി (വെള്ളി, ശനി വൈകിട്ട് 7-മണിക്കും ഞായറാഴ്ച രാവിലെ 10-മണിക്കും) നടത്തപ്പെടുന്ന കണ്‍വെന്‍ഷന്‍ യോഗങ്ങളില്‍ സഭാ വ്യത്യാസം ഇല്ലാതെ എല്ലാവരെയും ഇടവക കണ്‍വെന്‍ഷന്‍ സംഘാടക സമിതി സീഫോര്‍ഡ് സി.എസ്.ഐ. പള്ളിയിലേക്ക് ക്ഷണിക്കുന്നു. കൂടുതല്‍ വിവരങ്ങള്‍ക്ക് ബന്ധപ്പെടുക: (1) റെവ. ജിബിന്‍ തമ്പി (ഇടവക വികാരി) – (516) 3993534 (2) മാത്യു ജോഷ്വ – (516) 7612406 (3) സിജി തോമസ് – (516) 5287462.
