ഡോ. മാത്യു ജോയിസ്
ബിജു മേനോനും സുരാജ് വെഞ്ഞാറമൂടും പ്രധാന വേഷങ്ങളില്‍ അഭിനയിച്ച വിഷ്ണു നാരായണന്‍ സംവിധാനം ചെയ്ത മലയാളം ഹാസ്യനാടക ചിത്രമാണ് ‘നടന്ന സംഭവം’.
ലിജോമോള്‍ ജോസ്, ശ്രുതി രാമചന്ദ്രന്‍, സുധി കോപ്പ, ജോണി ആന്റണി, ലാലു അലക്സ്, നൗഷാദ് അലി എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു. ‘നടന്ന സംഭവം’ 2024 ജൂണ്‍ 21-ന് തിയേറ്ററുകളില്‍ റിലീസ് ചെയ്തുകഴിഞ്ഞു. വലിയ പരസ്യങ്ങള്‍ ഇല്ലാതെ റിലീസ് ചെയ്തത് കൊണ്ടായിരിക്കും, വലിയ ഇടിയും തള്ളുമൊന്നും ആദ്യ ഷോയില്‍ കണ്ടില്ല.
സ്വകാര്യതയിലേക്കുള്ള ഒളിഞ്ഞുനോട്ടം എത്രത്തോളം അസഹനീയമാണെന്ന് ‘നടന്ന സംഭവം’ എന്ന സിനിമ നമ്മോട് പറയുന്നു. അഭിനേതാക്കളുടെ മികവാര്‍ന്ന സംസാരങ്ങളും പ്രകടനവും സംഭവത്തെ വളരെ പ്രസക്തവും പ്രശംസനീയവുമായ ഒരു സിനിമയാക്കി മാറ്റി.
സമീപകാല സിനിമകളില്‍ നിന്ന് വ്യത്യസ്തമായി, സംഭവത്തില്‍ സ്ത്രീ കഥാപാത്രങ്ങളുടെ ഒരു നീണ്ട നിര കാണാം.
സംവിധായകന്‍ വിഷ്ണു നാരായണനും തിരക്കഥാകൃത്ത് രാജേഷ് ഗോപിനാഥനും ഏറെ പ്രസക്തമായ വിഷയം ചിരിയോടെ അവതരിപ്പിച്ചു. തമാശകള്‍ ചിന്തനീയവും ആകര്‍ഷകവുമായിരുന്നു. പക്ഷേ വിഷയത്തിന്റെ ഗൗരവം തീരെ കൈവിട്ടിട്ടില്ല എന്നത് കൈയ്യടി അര്‍ഹിക്കുന്നു. പാട്ടിന് വലിയ പ്രാധാന്യമില്ലെന്നു തോന്നിയാലും, അങ്കിത് മേനോന്റെ പാട്ടും പശ്ചാത്തല സംഗീതവും എടുത്തു പറയേണ്ടതാണ്. മനേഷ് മാധവന്റെ വീഡിയോഗ്രാഫി വളരെ ഹൃദ്യവും കാണാന്‍ സുഖമുള്ളതായിരുന്നു, പ്രത്യേകിച്ചും ഡോള്‍ബി സ്റ്റീരിയോ സൗണ്ട് സിസ്റ്റം കൂടിയാകുമ്പോള്‍ ഒട്ടും അരോചകമല്ല.
അഭിനയപാടവങ്ങളിലേക്കു വരുമ്പോള്‍, യഥാക്രമം ഉണ്ണിയേയും അജിത്തിനെയും അവതരിപ്പിച്ച ബിജു മേനോന്‍, സുരാജ് വെഞ്ഞാറമ്മൂട് എന്നിവരില്‍ നിന്ന് ആരംഭിക്കാം. പാവത്താനായ, എല്ലാവരെയും സ്‌നേഹിക്കുന്ന ഉണ്ണി, ബിജു മേനോന്റെ കൈകളില്‍ സുരക്ഷിതനായിരുന്നു. സുരാജിന്റെ കരിയറില്‍ ഇതുവരെ ചെയ്തതില്‍ വെച്ച് ഏറ്റവും വ്യത്യസ്തമായ കഥാപാത്രമായിരിക്കും അജിത്. ജീവിതത്തില് ഭാര്യയ്ക്ക് വില കല് പ്പിക്കാത്ത അജിത്തിനെ മറ്റുള്ളവര് ക്കിടയില് മിസ്റ്റര്‍ പെര്‍ഫെക്റ്റ് ആക്കിയിരിക്കുകയാണ് സുരാജ്. രണ്ട് നായകന്മാര്‍ക്കിടയില്‍ അല്‍പ്പം നെഗറ്റീവ് ഷേഡുള്ള കഥാപാത്രം കൂടിയാണ് സുരാജിന്റേത്, അടി കൊള്ളാന്‍ യോഗ്യതയുള്ള കഥാപാത്രം.
അജിത്തിന്റെ ഭാര്യ ധന്യയായി ലിജോ മോള്‍ മികച്ച പ്രകടനമാണ് കാഴ്ചവെച്ചത്. ഭര്‍ത്താവില്‍ നിന്നുള്ള അവഗണനയും കുടുംബജീവിതത്തിലെ സംതൃപ്തിയുടെ അഭാവവും അവര്‍ പക്വതയോടെ അവതരിപ്പിച്ചു. മറുവശത്ത് ഉണ്ണിയുടെ ഭാര്യയായി എത്തിയ ശ്രുതി രാമചന്ദ്രന്റെ കഥാപാത്രം പുരോഗമന ചിന്താഗതിക്കാരിയും, വേണ്ട റൊമാന്‌സും ചേരും പടി ചേര്‍ത്ത് ഭര്‍ത്താവിനൊപ്പം നില്‍ക്കുന്നതുമാണ്.
നഗരത്തിലെ സമ്പന്നര്‍ താമസിക്കുന്ന ഒരു പാര്‍പ്പിട സമുച്ചയത്തിലാണ് കഥ ആരംഭിക്കുന്നത്. മറൈന്‍ എഞ്ചിനീയറായ ശ്രീകുമാരന്‍ ഉണ്ണിയും കുടുംബവും വാടകയ്ക്ക് ഒരു വില്ലയില്‍ താമസിക്കാന്‍ വരുന്നു. ശ്രീകുമാരന്‍ ഉണ്ണി വര്‍ഷത്തില്‍ ആറുമാസം കടലിലും ബാക്കി ആറുമാസം കരയിലും ജീവിച്ചു ജീവിതം കഴിയുന്നത്ര മനോഹരമായി ജീവിക്കാന്‍ ശ്രമിക്കുന്ന സാക്ഷാല്‍ ബിജു മേനോന്‍ കഥാപാത്രമാണ്.
നഗരത്തിലെ ഈ ഹൗസിംഗ് കോളനിയിലെ ചില സംഭവങ്ങള്‍ രസകരമാണെങ്കിലും, ഗൗരവ്വത്തില്‍ ചിന്തിക്കാന്‍ ഒരുപാട് കാര്യങ്ങള്‍ അവശേഷിപ്പിക്കുന്നു.
കോളനിയിലെ സ്ത്രീകള്‍ ഉണ്ണിയുടെ ആരാധകരായി മാറുന്നത് അജിത്തിനും കൂട്ടര്‍ക്കും സഹിക്കാനാവില്ല. സംവിധായകന്‍ വിഷ്ണു നാരായണന്‍ സൃഷ്ടിച്ച സംഘട്ടനങ്ങളെ അടിസ്ഥാനമാക്കിയുള്ളതാണ് ഈ ചിത്രത്തിന്റെ കഥാതന്തു.
‘സെല്‍ഫി’ എന്ന പുത്തന്‍ സങ്കല്‍പം പോലെ നര്‍മ്മ മുഹൂര്‍ത്തങ്ങള്‍ സൃഷ്ടിക്കുമ്പോഴും, മഞ്ഞ പത്രപ്രവര്‍ത്തകന്റെ വികൃതിയായ തിരിമറികള്‍ സൃഷ്ടിക്കുമ്പോഴും, വിഷയത്തിന്റെ ഗൗരവം ചോര്‍ന്നിട്ടില്ല എന്നത് തിരക്കഥാകൃത്തിന്റെയും സംവിധായകന്റെയും വിജയമാണ്.
നമുക്ക് ചുറ്റുമുള്ള പല സംഭവങ്ങളിലേക്കും ഒരിക്കല്‍ കൂടി നോക്കാനും അയല്‍ക്കാരായ യുവാക്കളോട് കൂടുതല്‍ ശ്രദ്ധാലുവായിരിക്കാനും ഈ ചിത്രം നമ്മെ പ്രേരിപ്പിക്കും. സിനിമയില്‍ ഉടനീളം ചാര്‍ജ് ചെയ്യാവുന്ന ഒരുപാട് കുറ്റകൃത്യങ്ങള്‍ നമ്മള്‍ കാണുന്നു, പക്ഷേ അതിശയകരമെന്നു പറയട്ടെ, അവസാനം വരെ പരാതിയില്ല. അതാണ് സംവിധായകന്റെ അതുല്യ വൈദഗ്ധ്യത്തിന്റെ ട്വിസ്റ്റ്!
