സൂപ്പര്‍സ്റ്റാര്‍ രജിനികാന്തിനെ നായകനാക്കി ടി ജെ ജ്ഞാനവേല്‍ രചിച്ച് സംവിധാനം ചെയ്ത ചിത്രമാണ് വേട്ടയ്യന്‍. മാസ്സ് ആക്ഷന്‍ ത്രില്ലറായാണ് ചിത്രം ഒരുക്കിയിരിക്കുന്നത്. ഒക്ടോബര്‍ 10 – നാണ് ആഗോള റിലീസായി ചിത്രം പ്രേക്ഷകരുടെ മുന്നിലെത്തുന്നത്. രജിനികാന്തിനൊപ്പം ഫഹദ് ഫാസില്‍, മഞ്ജു വാര്യര്‍ എന്നീ മലയാള താരങ്ങളും, ബോളിവുഡ് താരം അമിതാബ് ബച്ചനും ചിത്രത്തിലുണ്ട്. ചിത്രത്തില്‍ രജിനികാന്തിന്റെ നായികയായാണ് മഞ്ജു വാര്യര്‍ എത്തുന്നത്. മഞ്ജു നായികയായി ചിത്രത്തിലെത്തിയതിനേ കുറിച്ച് തുറന്നുപറഞ്ഞിരിക്കുകയാണ് രജിനികാന്ത് ഇപ്പോള്‍. നായികയായി മഞ്ജു വാര്യര്‍ എത്തിയാല്‍ നന്നാകുമെന്ന് സംവിധായകന്‍ ജ്ഞാനവേലാണ് തന്നോട് പറഞ്ഞതെന്ന് രജിനികാന്ത് പ്രതികരിച്ചു. സിനിമയുടെ ഓഡിയോ ലോഞ്ചിനിടെയാണ് താരത്തിന്റെ പ്രതികരണം.
നടി ആരാകണമെന്ന് സംവിധായകന്‍ ജ്ഞാനവേലുമായി നടത്തിയ ചര്‍ച്ചയ്ക്കിടെയാണ് ജ്ഞാനവേല്‍ ഈ നിര്‍ദേശം മുന്നോട്ടുവെച്ചതെന്ന് രജിനികാന്ത് പറഞ്ഞു. ഒരു 20 വര്‍ഷം മുമ്പായിരുന്നുവെങ്കില്‍ സിനിമയിലെ നായിക ആരാണെന്ന് ഞാന്‍ ആദ്യം തന്നെ ചോദിക്കാറുണ്ടായിരുന്നു. എന്നാല്‍ ഇപ്പോള്‍ അങ്ങനെ ചോദിക്കാന്‍ തോന്നാറില്ല. കഥാപാത്രങ്ങളെ കുറിച്ച് സംസാരിക്കുന്നതിനിടയില്‍ നായികയുടെ റോള്‍ മഞ്ജു വാര്യര്‍ ചെയ്താല്‍ നന്നാകുമെന്ന് സംവിധായകന്‍ പറഞ്ഞു.- രജിനികാന്ത് പറഞ്ഞു.
മഞ്ജുവിന്റെ കൂടുതല്‍ സിനിമകളൊന്നും ഞാന്‍ കണ്ടിട്ടില്ല. ആകെ കണ്ടത് അസുരനാണ്. പ്രായമായ കഥാപാത്രമാണത്. ഈ സിനിമയില്‍ നായികമായി മഞ്ജു ഉചിതമായിരിക്കുമെന്ന് തോന്നി. മഞ്ജു വാര്യര്‍, വാട്ട് എ ലേഡി,വാട്ട് എ ജെന്റില്‍ ലേഡി. ഡിഗ്‌നിഫൈഡ്. രജനികാന്ത് പറഞ്ഞു. സദസില്‍ നിന്ന് എഴുന്നേറ്റ് കൈകൂപ്പിയാണ് മഞ്ജു ഇതിനോട് പ്രതികരിച്ചത്.
കേരളത്തില്‍ വമ്പന്‍ റിലീസായാണ് ചിത്രമെത്തുന്നത്. സെന്‍സറിംഗ് പൂര്‍ത്തിയാക്കിയ ചിത്രത്തിന് യു.എ സര്‍ട്ടിഫിക്കറ്റാണ് ലഭിച്ചത്. റാണ ദഗ്ഗുബതി, ശര്‍വാനന്ദ്, ജിഷു സെന്‍ഗുപ്ത, അഭിരാമി, രീതിക സിങ്, ദുഷാര വിജയന്‍, രാമയ്യ സുബ്രമണ്യന്‍, കിഷോര്‍, റെഡ്ഡിന് കിങ്സ്ലി, രോഹിണി, രവി മരിയ, റാവു രമേശ്, രാഘവ് ജൂയാല്‍, രമേശ് തിലക്, ഷാജി ചെന്‍, രക്ഷന്‍, സിങ്കമ്പുലി, ജി എം സുന്ദര്‍, സാബുമോന്‍ അബ്ദുസമദ്, ഷബീര്‍ കല്ലറക്കല്‍ എന്നിവരുമാണ് ചിത്രത്തിലെ മറ്റ് പ്രധാന താരങ്ങള്‍.
