ടിക് ടോക്കിലെ തർക്കം: 14 കാരനെ സഹപാഠി കുത്തിക്കൊന്നു, അൽബേനിയയിൽ ടിക് ടോക്ക് നിരോധിച്ചു

ടിരാന (അൽബേനിയ) : ടിക് ടോക്കിലുണ്ടായ തർക്കത്തിനെന്റെ പേരിൽ 14 വയസുകാരനെ സഹപാഠി കുത്തിക്കൊന്നതിനു പിന്നാലെ സമൂഹമാധ്യമമായ ടിക്ടോക് ഒരു വർഷത്തേക്കു നിരോധിച്ച് യൂറോപ്യൻ രാജ്യമായ അൽബേനിയ. കഴിഞ്ഞ മാസം ഇരുവരും തമ്മിൽ ടിക്ടോക്കിലൂടെ ഉണ്ടായ തർക്കമാണു കൊലപാതകത്തിൽ കലാശിച്ചതെന്നു വ്യക്തമായതോടെയാണു നടപടി. ഒട്ടേറെ കുട്ടികൾ കൊലപാതകത്തെ ടിക്ടോക്കിലൂടെ പിന്തുണയ്ക്കുകയും ചെയ്തു. നിരോധനം അടുത്ത വർഷമാദ്യം നിലവിൽ വരും.സംഭവത്തെക്കുറിച്ച് അന്വേഷണം ആരംഭിച്ചതായി ടിക്ടോക് അറിയിച്ചു.എന്നാൽ ഇരു വിദ്യാർഥികൾക്കും ടിക്ടോക്കിൽ അക്കൗണ്ട് ഇല്ലെന്നാണ് ടിക് ടോക്കിന്റെ വാദം. ഫ്രാൻസ്, ജർമനി, ബൽജിയം എന്നീ രാജ്യങ്ങളും കുട്ടികൾ സമൂഹമാധ്യമങ്ങൾ ഉപയോഗിക്കുന്നതിൽ കർശന നിയന്ത്രണം ഏർപ്പെടുത്താൻ ആലോചിക്കുന്നുണ്ട്. കഴിഞ്ഞ മാസം ഓസ്ട്രേലിയ 14 വയസ്സിൽ താഴെയുള്ള കുട്ടികൾ സമൂഹമാധ്യമങ്ങൾ ഉപയോഗിക്കുന്നതിൽ വിലക്കേർപ്പെടുത്തി.