ന്യൂയോര്‍ക്ക്: ന്യൂയോര്‍ക്ക് നഗരത്തിലെ അപ്പാര്‍ട്‌മെന്റിലുണ്ടായ വന്‍ തീപിടുത്തത്തില്‍ ഒന്‍പത് കുട്ടികള്‍ ഉള്‍പ്പെടെ 19 പേര്‍ മരിച്ചു.
60 ഓളം പേര്‍ക്ക് പരിക്കേറ്റു. ബ്രോന്‍ക്‌സിലെ 19 നിലകളുള്ള അപ്പാര്‍ട്‌മെന്റില്‍ തീ പടര്‍ന്നു പിടിക്കുകയായിരുന്നു. 30 ഓളം പേരുടെ നില ഗുരുതരമാണെന്നാണ് വിവരം. ഇരുന്നൂറിലധികം അഗ്നിശമന സേനാംഗങ്ങള്‍ ചേര്‍ന്നാണ് തീയണച്ചത്.
കെട്ടിടത്തില്‍ ഉണ്ടായിരുന്ന തകരാറിലായ ഇലക്ട്രിക് സ്‌പേസ് ഹീറ്ററാണ് തീപിടുത്തത്തിന് കാരണമെന്ന് ന്യൂയോര്‍ക്ക് സിറ്റി ഫയര്‍ ഡിപ്പാര്‍ട്‌മെന്റ് കമ്മീഷണര്‍ ഡാനിയല്‍ നിഗ്രോ പറഞ്ഞു. അപ്പാര്‍ട്‌മെന്റിലെ കിടപ്പുമുറിയില്‍ ഉണ്ടായിരുന്ന ഹീറ്ററില്‍ നിന്നും തീ പടര്‍ന്നു പിടിക്കുകയായിരുന്നു. ന്യൂയോര്‍ക്കിന്റെ ചരിത്രത്തിലെ ഏറ്റവും വലിയ തീപിടുത്തമാണ് കഴിഞ്ഞ ദിവസം നടന്നതെന്ന് മേയര്‍ എറിക് ആഡംസ് പറഞ്ഞു.
