ന്യൂഡല്‍ഹി: അമിതവണ്ണത്തിനെതിരെ പോരാട്ടത്തില്‍ നടന്‍ മോഹന്‍ലാലിനെ നാമനിര്‍ദ്ദേശം ചെയ്ത് പ്രധാനമന്ത്രി നരേന്ദ്രമോദി. കൂടാതെ ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ള, വ്യവസായി ആനന്ദ് മഹീന്ദ്ര തുടങ്ങി വിവിധ മേഖലകളില്‍ നിന്നുള്ള 10 പ്രമുഖ വ്യക്തികളെയാണ് പ്രധാനമന്ത്രി ഈ മാതൃകാ പദ്ധതിയിലേക്ക് നാമനിര്‍ദ്ദേശം ചെയ്തത്. ഭക്ഷണത്തില്‍ എണ്ണയുടെ ഉപയോഗം കുറയ്‌ക്കേണ്ടതിന്റെ ആവശ്യകതയെക്കുറിച്ച് ജനങ്ങളെ ബോധവല്‍ക്കരിക്കുകയും അമിതവണ്ണത്തിനെതിരായ പോരാട്ടം ശക്തിപ്പെടുത്തുകയും ചെയ്യുക എന്നതാണ് ഈ നീക്കത്തിന്റെ ലക്ഷ്യം.
പ്രധാനമന്ത്രി നാമനിര്‍ദ്ദേശം ചെയ്ത മറ്റ് പ്രമുഖരില്‍ ഭോജ്പുരി ഗായകനും നടനുമായ നിരാഹുവ, ഷൂട്ടിംഗ് ചാമ്പ്യന്‍ മനു ഭേക്കര്‍, ഭാരോദ്വഹന താരം മീരാഭായ് ചാനു, ഇന്‍ഫോസിസ് സഹസ്ഥാപകന്‍ നന്ദന്‍ നിലേകനി, നടന്‍ ആര്‍ മാധവന്‍, ഗായിക ശ്രേയ ഘോഷാല്‍, സുധാ മൂര്‍ത്തി, ബിജെപി നേതാവ് ദിനേഷ് ലാല്‍ യാദവ് എന്നിവരും ഉള്‍പ്പെടുന്നു. ഭക്ഷണത്തില്‍ എണ്ണയുടെ അളവ് കുറയ്ക്കണമെന്ന് ഞായറാഴ്ച തന്റെ മന്‍ കി ബാത്ത് പ്രസംഗത്തില്‍ പ്രധാനമന്ത്രി ആഹ്വാനം ചെയ്തിരുന്നു.
ഭക്ഷണത്തില്‍ എണ്ണ കുറയ്ക്കുന്നതും അമിതവണ്ണം നിയന്ത്രിക്കുന്നതും വ്യക്തിപരമായ തീരുമാനമല്ലെന്നും കുടുംബത്തോടുള്ള ഉത്തരവാദിത്തം കൂടിയാണെന്നും അദ്ദേഹം ഊന്നിപ്പറഞ്ഞു. ”ഡെറാഡൂണില്‍ നടന്ന ദേശീയ ഗെയിംസിന്റെ ഉദ്ഘാടന വേളയില്‍ വളരെ പ്രധാനപ്പെട്ട ഒരു വിഷയം ഞാന്‍ ഉന്നയിച്ചിരുന്നു. ഇത് രാജ്യത്ത് ഒരു പുതിയ ചര്‍ച്ചയ്ക്ക് തുടക്കമിട്ടിട്ടുണ്ട് – ആ വിഷയം ‘അമിതവണ്ണം’ ആണ്. ആരോഗ്യമുള്ള ഒരു രാജ്യമാകണമെങ്കില്‍ അമിതവണ്ണത്തിന്റെ വെല്ലുവിളിയെ നമ്മള്‍ തീര്‍ച്ചയായും നേരിടേണ്ടതുണ്ട്…” മോദി പറഞ്ഞു.
കഴിഞ്ഞ വര്‍ഷങ്ങളില്‍ അമിതവണ്ണ കേസുകള്‍ ഇരട്ടിയായതായും കുട്ടികളില്‍ ഇത് നാലിരട്ടിയായി വര്‍ദ്ധിച്ചതായും ചൂണ്ടിക്കാണിച്ച പ്രധാനമന്ത്രി ഇത് കൂടുതല്‍ ആശങ്കാജനകമാണെന്നും കൂട്ടിച്ചേര്‍ത്തു. നിലവില്‍ നാമനിര്‍ദ്ദേശം ചെയ്തവര്‍ ഓരോരുത്തരും മറ്റ് 10 പേരെ ഈ മാതൃകാ പദ്ധതിയിലേക്ക് നാമനിര്‍ദ്ദേശം ചെയ്യണമെന്ന് പ്രധാനമന്ത്രി അഭ്യര്‍ത്ഥിച്ചു.
