ന്യൂഡല്‍ഹി: രാജസ്ഥാനിലും മധ്യപ്രദേശിലും ബിജെപി അധികാരം ഉറപ്പിച്ചു. മധ്യപ്രദേശില്‍ കോണ്‍ഗ്രസ് അധികാരം പിടിക്കുമെന്ന് പ്രവചനങ്ങളുണ്ടായെങ്കിലും വലിയ പരാജയത്തിലേക്കാണ് പാര്‍ട്ടി കൂപ്പുകുത്തുന്നത്. നൂറ്റിയമ്പതോളം സീറ്റുകളിലാണ് ബിജെപി മുന്നിട്ടു നില്‍ക്കുന്നത്. ഇതോടെ തുടര്‍ഭരണം ഏറെക്കുറെ ഉറപ്പിച്ചു. 90 സീറ്റുകളിലാണ് കോണ്‍ഗ്രസ് മുന്നിട്ടു നില്‍ക്കുന്നത്.
രാജസ്ഥാനില്‍ ബിജെപി അധികാരം പിടിക്കുമെന്ന് ഏറെക്കുറെ ഉറപ്പായിരുന്നു. നൂറ്റിയിരുപതോളം സീറ്റുകളില്‍ ലീഡ് ചെയ്യുന്ന ബിജെപി രാജസ്ഥാനും പിടിക്കുമെന്ന് ഉറപ്പിച്ചു. ഹിന്ദി ഹൃദയഭൂമിയിലെ സുപ്രധാന സംസ്ഥാനങ്ങളെല്ലാം ഇതോടെ ബിജെപിയുടെ കീഴിലായി.
ഛത്തീസ്ഗഡില്‍ ബിജെപിയും കോണ്‍ഗ്രസും കനത്ത പോരാട്ടമാണ്. 60 സീറ്റുകളില്‍ കോണ്‍ഗ്രസ് ലീഡു ചെയ്യുന്നുണ്ട്. നാല്‍പത് സീറ്റുകളിലാണ് ബിജെപി ലീഡ്. എന്നാല്‍ ലീഡ് നില മാറിമറിയുന്ന കാഴ്ചയാണ് ഛത്തീസ്ഗഡില്‍.
അതേസമയം, തെലങ്കാനയില്‍ കോണ്‍ഗ്രസ് വന്‍ തിരിച്ചുവരവാണ് നടത്തിയിരിക്കുന്നത്. എഴുപതിലധികം സീറ്റുകളില്‍ മികച്ച മുന്നേറ്റമാണ് നടത്തുന്നത്. തുടര്‍ഭരണം നടത്തുമെന്ന് ഉറപ്പിച്ചു പറഞ്ഞിരുന്ന ബിആര്‍എസ് 40 സീറ്റുകളില്‍ മാത്രമാണ് മുന്നേറുന്നത്. നിലവില്‍ കോണ്‍ഗ്രസിന് തെലങ്കാന മാത്രമാണ് ആശ്വാസം. ഇവിടെ ബിജെപി പത്ത് സീറ്റുകളില്‍ മാത്രമാണ് മുന്നേറുന്നത്. ഒരു സീറ്റില്‍നിന്നാണ് ബിജെപിയുടെ ഈ മുന്നേറ്റം.
ലോക്സഭാ തിരഞ്ഞെടുപ്പിന് മുന്നോടിയായിട്ടുള്ള സെമി ഫൈനല്‍ എന്ന വിശേഷിപ്പിക്കുന്ന, അഞ്ചു സംസ്ഥാനങ്ങളിലേക്ക് നടന്ന നിയമസഭാ തിരഞ്ഞെടുപ്പിലെ നാലു സംസ്ഥാനങ്ങളിലെ ഫലങ്ങളാണ് പുറത്തുവരുന്നത്.
എക്‌സിറ്റ് പോളുകള്‍ ഛത്തീസ്ഗഡിലും തെലങ്കാനയിലും കോണ്‍ഗ്രസിന്റെയും രാജസ്ഥാനില്‍ ബിജെപിയുടെയും മുന്നേറ്റമാണ് പ്രവചിച്ചത്. മധ്യപ്രദേശില്‍ 4 വീതം എക്‌സിറ്റ് പോളുകള്‍ ബിജെപിക്കും കോണ്‍ഗ്രസിനും മുന്‍തൂക്കം നല്‍കി. രാജസ്ഥാനും ഛത്തീസ്ഗഡും കോണ്‍ഗ്രസും മധ്യപ്രദേശ് ബിജെപിയുമാണു ഭരിക്കുന്നത്. തെലങ്കാനയില്‍ ബിആര്‍എസും മിസോറമില്‍ മിസോ നാഷനല്‍ ഫ്രണ്ടുമാണ് അധികാരത്തില്‍. മിസോറാമിലെ ഫലം നാളെ പുറത്തുവരും.
