തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളത്തില്‍ നടന്ന അപൂര്‍വമായ സംഭവം വിമാനയാത്രയുടെ സുരക്ഷയെക്കുറിച്ച് ഗൗരവമായ ചോദ്യങ്ങള്‍ ഉയര്‍ത്തുന്നു. ആരോ പറത്തിവിട്ട ഒരു പട്ടം മൂലം ആറ് വിമാനങ്ങളുടെ സര്‍വീസ് തടസപ്പെട്ടു. റണ്‍വേയ്ക്ക് അടുത്തുള്ള ഒരു ഉയരത്തില്‍ പറന്ന പട്ടം വിമാനങ്ങളുടെ ഇറക്കവും പറക്കലും തടസ്സപ്പെടുത്തി. ഇത് വിമാനയാത്രക്കാര്‍ക്ക് വലിയ അസ്വസ്ഥതയും ദുരിതവും ഉണ്ടാക്കി.
എന്താണ് തിരുവനന്തപുരം അന്താരാഷ്ട്ര വിമാനത്താവളത്തില്‍ സംഭവിച്ചത്..?
റണ്‍വേക്ക് മുകളില്‍ പറന്ന പട്ടം ആണ് ആറ് വിമാനങ്ങളുടെ വഴിമുടക്കയത്. ശനിയാഴ്ച വൈകിട്ട് അഞ്ചുമണിയോടെ വിമാനത്താവളത്തിലെ മുട്ടത്തറ പൊന്നറ പാലത്തിനടുത്തുള്ള റണ്‍വേ 32-ന്റെയും വള്ളക്കടവ് സുലൈമാന്‍ തെരുവിനും ഇടയ്ക്കുള്ള ഭാഗത്തെ ആകാശത്തില്‍ 200 അടി ഉയരത്തിലാണ് പട്ടം പറന്നത്. റണ്‍വേയ്ക്ക് മുകളില്‍ പട്ടം പറന്നത് കാരണം രണ്ടുമണിക്കൂറോളം വ്യോമഗതാഗതം തടസ്സപ്പെട്ടു.
നാല് വിമാനങ്ങള്‍ വഴിതിരിച്ചു വിടുകയും രണ്ട് വിമാനങ്ങളുടെയാത്ര താത്കാലികമായി നിറുത്തി വച്ച് ബേയില്‍ തുടരാന്‍ നിര്‍ദ്ദേശം നല്‍കുകയും ചെയ്തു. വൈകിട്ട് 4.20-ന് തിരുവനന്തപുരത്ത് ലാന്‍ഡ് ചെയ്യേണ്ടിയിരുന്ന മസ്‌കറ്റില്‍ നിന്നെത്തിയ എയര്‍ ഇന്ത്യ എക്‌സ്പ്രസ്, അതിനുശേഷമുള്ള ഷാര്‍ജയില്‍ നിന്നെത്തിയ എയര്‍ അറേബ്യ, ഡല്‍ഹിയില്‍ നിന്നെത്തിയ എയര്‍ ഇന്ത്യ, ബാംഗ്ലൂരില്‍ നിന്നെത്തിയ ഇന്‍ഡിഗോ എന്നീ വിമാനങ്ങളാണ് ഇറങ്ങാനിരുന്നത്.
റണ്‍വേയ്ക്ക് മുകളില്‍ പട്ടം കണ്ടതോടെ ഈ വിമാനങ്ങള്‍ ലാന്‍ഡ് ചെയ്യാതെ ആകാശത്ത് തങ്ങുന്നതിനുള്ള ഗോ എറൗണ്ട് നിര്‍ദ്ദേശം പൈലറ്റുമാര്‍ക്ക് എയര്‍ ട്രാഫിക് കണ്‍ട്രോളില്‍ നിന്ന് നല്‍കുകയായിരുന്നു. രാജീവ് ഗാന്ധി അക്കാഡമിയുടെ വിമാനത്തിന്റെ പരിശീലന പറക്കലും ഇതു കാരണം തടസ്സപ്പെട്ടു. നാലരയ്ക്ക് ഹൈദരാബാദിലേക്ക് പുറപ്പെടേണ്ടിയിരുന്ന എയര്‍ ഇന്ത്യ എക്‌സ്പ്രസ്, ബെംഗളൂരുവിലേയ്ക്ക് പോകാനിരുന്ന ഇന്‍ഡിഗോ എന്നീ വിമാനങ്ങളുടെ യാത്ര താത്കാലികമായി നിറുത്തിവച്ച് ബേയില്‍ നിറുത്തിയിടാനും നിര്‍ദ്ദേശം നല്‍കിയിരുന്നു.
അപകടകരമായ രീതിയില്‍ പട്ടം പറക്കുന്നത് ശ്രദ്ധയില്‍പ്പെട്ടതിനെ തുടര്‍ന്ന് എയര്‍പോര്‍ട്ട് അധികൃതര്‍ ജാഗ്രത നിര്‍ദേശം പുറപ്പെടുവിച്ചിരുന്നു. വിമാനത്താവളത്തിലെ അഗ്‌നി രക്ഷാ സേനയും ഏപ്രണലിലെ ഉദ്യോഗസ്ഥരും ചേര്‍ന്ന് പട്ടത്തെ താഴെ ഇറക്കാനുള്ള ശ്രമം നടത്തി. പട്ടം നില്‍ക്കുന്ന ഭാഗത്തേക്ക് അഗ്‌നിരക്ഷാ വാഹനത്തില്‍ നിന്നും ഉയരത്തില്‍ വെള്ളം ചീറ്റിക്കുകയും പക്ഷികളെ തുരത്തിയോടിക്കുന്ന ബേര്‍ഡ്‌സ് സ്‌കെയേഴ്‌സ് ജീവനക്കാര്‍ പട്ടം ലക്ഷ്യമാക്കി റോക്കറ്റുകള്‍ അയച്ചുവെങ്കിലും ലക്ഷ്യം കണ്ടില്ല.
റണ്‍വേയുടെ പരിസരത്ത് പൊലീസ് പരിശോധന നടത്തിയെങ്കിലും പട്ടം പറത്തിയവരെ കണ്ടെത്താനായില്ല. വിമാനത്താവളത്തിലെ ഓപ്പറേഷന്‍ കണ്‍ട്രോള്‍ സെന്ററില്‍ നിന്നാണ് റണ്‍വേയ്ക്ക് മുകളില്‍ പറക്കുന്ന പട്ടത്തിന്റെ വിവരം അറിയിച്ചത്. റണ്‍വേയില്‍ ലാന്‍ഡ് ചെയ്യുന്ന വിമാനങ്ങള്‍ക്ക് പട്ടവും അതിന്റെ നൂലും അപകട ഭീഷണി ആവുന്നതിനെത്തുടര്‍ന്ന് അടിയന്തര സുരക്ഷാ സന്നാഹങ്ങള്‍ ഏര്‍പ്പെടുത്തുകയായിരുന്നു. വൈകിട്ട് 6.20-ഓടെ പട്ടം തനിയെ റണ്‍വേയിലേക്ക് പതിച്ച തുടര്‍ന്ന് സുരക്ഷ ഉറപ്പാക്കിയതിന് ശേഷമാണ് വിമാന സര്‍വീസുകള്‍ പുനരാരംഭിച്ചത്.
ശനിയാഴ്ച വൈകിട്ട്, തിരുവനന്തപുരം വിമാനത്താവളത്തിനടുത്തുള്ള റണ്‍വേയില്‍ ഒരു പട്ടം ഉയര്‍ന്നു പറന്നു. ഏകദേശം 200 അടി ഉയരത്തില്‍ പറന്ന ഈ പട്ടം വിമാനങ്ങളുടെ സുരക്ഷയ്ക്ക് ഭീഷണിയായി. തുടര്‍ന്ന് വിമാനത്താവള അധികൃതര്‍ അടിയന്തര നടപടികള്‍ സ്വീകരിച്ചു. നാല് വിമാനങ്ങള്‍ വഴി തിരിച്ചുവിടുകയും രണ്ട് വിമാനങ്ങള്‍ താല്‍ക്കാലികമായി പിടിച്ചിടുകയും ചെയ്തു. വൈകിട്ട് ആറരയോടെ പട്ടം തനിയെ നിലംപതിച്ചു.
എങ്ങനെയാണ് പട്ടം വിമാനത്തെ ബാധിക്കുന്നത്..?
റണ്‍വേയ്ക്ക് സമീപം പട്ടം പറത്തുന്നത് ഒരു നിഷ്‌കളങ്കമായ വിനോദമായി തോന്നിയേക്കാം. എന്നാല്‍ ഇത് ഗുരുതരമായ അപകടങ്ങള്‍ക്ക് കാരണമാകും എന്നത് മനസ്സിലാക്കേണ്ടതാണ്. ഒരു ചെറിയ പട്ടം പോലും വിമാനത്തെ തകര്‍ക്കാനും നിരവധി ജീവനുകള്‍ക്ക് ഭീഷണിയാകാനും ഇടയാക്കും.
*എന്‍ജിനില്‍ കുടുങ്ങുക: വിമാനം ടേക്ക് ഓഫ് ചെയ്യുന്നതിനോ ലാന്‍ഡ് ചെയ്യുന്നതിനോ മുമ്പായി പട്ടം എന്‍ജിനില്‍ കുടുങ്ങിയാല്‍ എന്‍ജിന്‍ തകരാറിലാകും. ഇത് വിമാനം അപകടത്തിലാകാന്‍ കാരണമാകും.
*വിന്‍ഡ്ഷീല്‍ഡില്‍ ഇടിക്കുക: പൈലറ്റിന്റെ കാഴ്ച മറയ്ക്കുന്ന വിധത്തില്‍ പട്ടം വിന്‍ഡ്ഷീല്‍ഡില്‍ ഇടിച്ചാല്‍ വിമാനം നിയന്ത്രണാതീതമാകും.
*റഡാര്‍ സിസ്റ്റം തകരാറിലാക്കുക: റഡാര്‍ സിസ്റ്റം വിമാനങ്ങളുടെ സ്ഥാനം നിര്‍ണ്ണയിക്കാന്‍ സഹായിക്കുന്നു. പട്ടം റഡാര്‍ സിസ്റ്റം തകരാറിലാക്കിയാല്‍ വിമാനങ്ങള്‍ തമ്മിലുള്ള അകലം കൃത്യമായി അളക്കാന്‍ കഴിയാതെ വരും. ഇത് കൂട്ടിയിടികള്‍ക്ക് കാരണമാകും.
*വിമാനത്താവള പ്രവര്‍ത്തനങ്ങള്‍ തടസ്സപ്പെടുത്തുക: പട്ടം വിമാനത്താവളത്തിലെ പ്രവര്‍ത്തനങ്ങളെ തടസ്സപ്പെടുത്തിയാല്‍ വിമാനങ്ങള്‍ക്ക് ഇറങ്ങാനോ പറക്കാനോ കഴിയാതെ വരും.
അതേസമയം, തിരുവനന്തപുരം വിമാനത്താവളത്തില്‍ വിമാന സുരക്ഷ ഉറപ്പാക്കുന്നതിന് വിവിധ നടപടികള്‍ സ്വീകരിച്ചിട്ടുണ്ട്. വിമാനത്താവളത്തിന് അഞ്ച് കിലോമീറ്റര്‍ ചുറ്റളവില്‍ ബലൂണുകളും പട്ടങ്ങളും പറത്തുന്നതും ലേസര്‍ ലൈറ്റുകള്‍ വിമാനത്തിലേക്ക് അടിക്കുന്നതും ഉയരത്തില്‍ കരിമരുന്നു പ്രയോഗം നടത്തുന്നതും കര്‍ശനമായി നിരോധിച്ചിരിക്കുന്നു.
