ആരോഗ്യപ്രശ്നങ്ങള്‍ അലട്ടിയ കുട്ടിക്കാലത്ത് കരുത്തായത് കുടുംബം’; അനന്തിന്‍റെ വാക്കുകൾ കേട്ട് വികാരാധീനനായി മുകേഷ് അംബാനി.

കുട്ടിക്കാലത്തെ ആരോ​ഗ്യപ്രശ്നങ്ങളേക്കുറിച്ച് പറഞ്ഞുതുടങ്ങിയ അനന്ത് അംബാനി കുടുംബം നല്‍കിയ അകമഴിഞ്ഞ പിന്തുണയേക്കുറിച്ച് വാചാലനായി. തനിക്കുവേണ്ടി കഴിയുന്നതെല്ലാം ചെയ്ത കുടുംബമാണ് തന്റേതെന്നു പറഞ്ഞ അനന്ത് അംബാനി ജീവിതത്തിൽ പലകാര്യങ്ങളും അത്ര എളുപ്പമായിരുന്നില്ലെന്നും കൂട്ടിച്ചേര്‍ത്തു. കുട്ടിക്കാലംമുതൽ ഒട്ടേറെ ആരോ​ഗ്യപ്രശ്നങ്ങള്‍ തന്നെ അലട്ടിയിരുന്നു, പക്ഷേ ആ യാത്രയിലുടനീളം തന്റെ കുടുംബത്തിന്റെ ശക്തമായ പിന്തുണ കൂടെയുണ്ടായിരുന്നു.

‘എന്‍റെ വിവാഹത്തിന്റെ ഒരുക്കങ്ങളെല്ലാം ചെയ്തത് അമ്മ നിത അംബാനിയാണ്. നാലുമാസത്തോളമായി ദിവസവും പതിനെട്ടും പത്തൊമ്പതും മണിക്കൂറുകൾ ഒരുക്കങ്ങൾക്കായി അമ്മ നീക്കിവെച്ചിരുന്നു. രണ്ടുമൂന്നുമാസമായി കുടുംബത്തിലെ എല്ലാവരും മൂന്നുമണിക്കൂറിൽ കുറവാണ് ഉറങ്ങിയിട്ടുള്ളത്’- അനന്ത് പറഞ്ഞു.

രാധികയെ വധുവായി ലഭിക്കുന്നതില്‍ താൻ അതീവ ഭാ​ഗ്യവാനാണെന്ന് അനന്ത് പറഞ്ഞു. കഴിഞ്ഞ ഏഴുവർഷമായി പരിചയമുണ്ടെങ്കിലും ഇന്നലെ കണ്ടതുപോലെയാണ് തോന്നാറുള്ളതെന്നും അദ്ദേഹം പറഞ്ഞു.

ആഘോഷങ്ങളില്‍ പങ്കെടുക്കാന്‍ ഷാരൂഖ് ഖാൻ, സൽമാൻ ഖാൻ, ആമിർ ഖാൻ, അർജുൻ കപൂർ, അനിൽ കപൂർ, ആദിത്യ റോയ് കപൂർ തുടങ്ങി നിരവധി ബോളിവുഡ് താരങ്ങൾ ജാംനഗറിൽ എത്തിയിട്ടുണ്ട്.  ബോളിവുഡിലെ താരദമ്പതികളായ ദമ്പതികളായ രൺവീർ സിംഗ്, ദീപിക പദുക്കോൺ, വിക്കി കൗശൽ, കത്രീന കൈഫ് എന്നിവരും എത്തിയിട്ടുണ്ട്.

തായ്, ജാപ്പനീസ്, മെക്‌സിക്കൻ, പാഴ്‌സി, പാൻ ഏഷ്യൻ തുടങ്ങിയ  2500-ഓളം വിഭവങ്ങൾ ഉള്ള ഇന്‍റര്‍നാഷണല്‍ മെനുവാണ് മൂന്ന് ദിവസത്തെ പരിപാടിക്കായി ഒരുക്കിയിരിക്കുന്നത്. അതിഥികള്‍ക്കായി വിവിധ പൂക്കള്‍കൊണ്ട് അലങ്കരിച്ച ഗ്രീന്‍ റൂമുകളാണ് സജ്ജമാക്കിയിരിക്കുന്നത്. സെലബ്രിറ്റികളും ലോകത്തിലെ പ്രമുഖരായ വ്യവസായികളും എത്തുന്നതിനാല്‍ കനത്ത സുരക്ഷയാണ് ആഘോഷപരിപാടികള്‍ നടക്കുന്നിടത്ത് ഏര്‍പ്പെടുത്തിയിരിക്കുന്നത്.