പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോയുടെ ഒരു അനൗൺസ്മെന്റാണ് ഇപ്പോൾ ഇന്റർനെറ്റിൽ തരംഗമായി മാറിക്കൊണ്ടിരിക്കുന്നത്. തന്റെ യുട്യൂബ് ചാനലിലെത്തുന്ന അടുത്ത അതിഥി ഇന്റര്‍നെറ്റിന് തീ പടര്‍ത്തുമെന്നാണ് താരം പറഞ്ഞത്.മാഞ്ചെസ്റ്റര്‍ യുണൈറ്റഡിലെ മുന്‍ സഹതാരമായിരുന്ന റിയോ ഫെര്‍ഡിനാന്‍ഡിനോടാണ് വീഡിയോയില്‍ റൊണാൾഡോ സംസാരിക്കുന്നത്. അടുത്ത അതിഥി ആരാണെന്ന ചോദ്യത്തിന് അയാള്‍ ഫെര്‍ഡിനാന്‍ഡിനേക്കാള്‍ പ്രശസ്തനാണെന്നാണ് ക്രിസ്റ്റ്യാനോ മറുപടി നല്‍കുന്നത്.
ഞങ്ങള്‍ ഇന്റര്‍നെറ്റില്‍ തരംഗം സൃഷ്ടിക്കുമെന്നും ക്രിസ്റ്റ്യാനോ പറയുന്നു. ഈ വീഡിയോ നിമിഷനേരംകൊണ്ട് ആരാധകര്‍ക്കിടയില്‍ വൈറലായി. ആരാണ് ആ അതിഥി എന്നതിനെ സംബന്ധിച്ച് ചര്‍ച്ചകളും തുടങ്ങിക്കഴിഞ്ഞു.ഈ വർഷം ആഗസ്റ്റിലാണ് ക്രിസ്റ്റ്യാനോ റൊണാൾഡോ യുട്യൂബ് ചാനൽ തുടങ്ങുന്നത്. ഒരു ദിവസത്തിനുള്ളിൽ തന്നെ 20 മില്യൺ സബ്സ്ക്രൈബേഴ്സാണ് റൊണാൾഡോക്ക് ലഭിച്ചത്. 67 മില്യൺ ആളുകളാണ് റൊണാൾഡോയുടെ യുട്യൂബ് ചാനൽ സബ്സ്ക്രൈബ് ചെയ്തിരിക്കുന്നത്.
നേരത്തേ യുട്യൂബ് ചാനൽ തുടങ്ങി മണിക്കൂറുകള്‍ക്കുള്ളില്‍ ഗോള്‍ഡ് പ്ലേ ബട്ടണും ഡയമണ്ട് പ്ലേ ബട്ടണും ക്രിസ്റ്റ്യാനോ സ്വന്തമാക്കിയിരുന്നു. ചാനലില്‍ കുടുംബം, ആരോഗ്യം, പോഷകാഹാരം, വിദ്യാഭ്യാസം തുടങ്ങിയ ഉള്ളടക്കങ്ങളുണ്ടാകുമെന്ന് റൊണാൾഡോ വ്യക്തമാക്കിയിരുന്നു.
