ന്യൂഡല്‍ഹി: മഥുരയിലെ ബി.ജെ.പി സ്ഥാനാര്‍ഥി ഹേമ മാലിനിക്കെതിരെ ലൈംഗിക ചുവയുള്ള പരാമര്‍ശം നടത്തിയതിന് കോണ്‍ഗ്രസ് വക്താവ് രണ്‍ദീപ് സുര്‍ജെവാലക്ക് ഹരിയാന വനിത കമീഷന്റെ നോട്ടീസ്. ഹരിയാനയിലെ തെരഞ്ഞെടുപ്പു പ്രചാരണത്തിനിടെ നടത്തിയ പരാമര്‍ശത്തില്‍ ഈ മാസം ഒമ്പതിന് നേരിട്ട് ഹാജരായി വിശദീകരണം നല്‍കാനാണ് നിര്‍ദേശം.
സുര്‍ജെവാലയുടെ പരാമര്‍ശം ബി.ജെ.പി വിവാദമാക്കിയതിന് പിന്നാലെയാണ് കമീഷന്‍ ഇടപെടല്‍. ഹേമമാലിനിയെ പോലുള്ളവര്‍ക്ക് എം.പി സ്ഥാനം കൊടുക്കുന്നതുമായി ബന്ധപ്പെട്ട് സുര്‍ജെവാല നടത്തിയ പരാമര്‍ശത്തിന്റെ വിഡിയോ ‘എക്‌സി’ല്‍ പങ്കുവെച്ച് ബി.ജെ.പി ഐ.ടി സെല്‍ മേധാവി അമിത് മാളവ്യയാണ് വിവാദത്തിന് തിരികൊളുത്തിയത്.
ആരോപണം നിഷേധിച്ച സുര്‍ജെവാല, തന്റെ പ്രസംഗത്തിന്റെ ഒരു ഭാഗം മാത്രം നല്‍കി വളച്ചൊടിച്ച് ബി.ജെ.പി ഐ.ടി സെല്‍ വ്യാജ വാര്‍ത്ത പ്രചരിപ്പിക്കുകയാണെന്ന് ആരോപിച്ചു. പ്രസംഗത്തിന്റെ ബാക്കി ഭാഗം കൂടി പങ്കുവെച്ച സുര്‍ജെവാല ഹേമമാലിനിയെ ആദരിക്കുന്നുവെന്നാണ് താന്‍ പ്രസംഗിച്ചതെന്ന് പ്രതികരിച്ചു.
