അഹമ്മദാബാദ് : മാനനഷ്ടക്കേസില് കോണ്ഗ്രസ് നേതാവ് രാഹുല് ഗാന്ധി നല്കിയ ഹര്ജി ഗുജറാത്ത് ഹൈക്കോടതി തള്ളി. മോദി സമുദായത്തെ അപമാനിച്ചെന്ന കേസില് കുറ്റക്കാരനെന്ന വിധി സ്റ്റേ ചെയ്യണമെന്ന് ആവശ്യപ്പെട്ട് രാഹുല് ഗാന്ധി നല്കിയ അപ്പീലാണ് തള്ളിയത്.
വിധി എതിരായതോടെ രാഹുലിന്റെ അയോഗ്യത തുടരും. അപ്പീല് തള്ളിയതില് അതിശയമില്ലെന്നു കോണ്ഗ്രസ് പ്രതികരിച്ചു.
രാഹുല് കുറ്റക്കാരനെന്ന വിധി ഉചിതമാണെന്നും ശിക്ഷാവിധിയില് തെറ്റില്ലെന്നും ഇടപെടേണ്ട സാഹചര്യമില്ലെന്നും ജസ്റ്റിസ് ഹേമന്ദ്ര പ്രചകിന്റെ ബഞ്ച് വിധി പറഞ്ഞു. 10 ലേറെ ക്രിമിനല് കേസുകള് രാഹുലിനെതിരെയുണ്ടെന്നും രാഹുല് സ്ഥിരമായി തെറ്റ് ആവര്ത്തിക്കുന്നുവെന്നും കോടതി നിരീക്ഷിച്ചു.
2019 ലെ ലോക്സഭാ തെരഞ്ഞെടുപ്പ് പ്രചാരണ കാലത്ത് കര്ണാടകയിലെ കോലാറില് വച്ച് രാഹുല് നടത്തിയ പ്രസംഗമാണ് കേസിനാധാരം. എല്ലാ കള്ളന്മാരുടെ പേരിനൊപ്പവും മോദി എന്ന് ഉള്ളതെന്തുകൊണ്ടെന്ന രാഹുലിന്റെ പരിഹാസത്തിനെതിരെ ഗുജറാത്തിലെ മുന് മന്ത്രിയും എം എല് എയുമായ പൂര്ണേഷ് മോദിയാണ് കേസ് നല്കിയത്. മോദി സമുദായത്തെ അപമാനിച്ചെന്ന ഹര്ജിയില് സൂറത്തിലെ മജിസ്ട്രേറ്റ് കോടതി പരമാവധി ശിഷയായ രണ്ടു വര്ഷം തടവ് വിധിച്ചു. ഇതോടെ രാഹുല് എം പി സ്ഥാനത്ത് നിന്ന് അയോഗ്യനായി. ജില്ലാ കോടതിയെ സമീപിച്ചെങ്കിലും അപ്പീല് തള്ളിയതോടെയാണ് രാഹുല് ഹൈക്കോടതിയിലെത്തിയത്.