തിരുവനന്തപുരം: സംസ്ഥാനത്ത് ജൂലൈയില് പകര്ച്ചപ്പനി വ്യാപനത്തിന് സാധ്യതയുള്ളതിനാല് പ്രതിരോധ പ്രവര്ത്തനങ്ങളും ജാഗ്രതയും ശക്തമാക്കണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. പകര്ച്ചപ്പനി പ്രതിരോധം ശക്തിപ്പെടുത്തുന്നതിന്റെ ഭാഗമായി ആരോഗ്യ മന്ത്രി വീണാ ജോര്ജ്, തദ്ദേശസ്വയംഭരണ വകുപ്പ് മന്ത്രി എം.ബി. രാജേഷ്, വിദ്യാഭ്യാസ വകുപ്പ് മന്ത്രി വി. ശിവന്കുട്ടി എന്നിവരുടെ നേതൃത്വത്തില് ആരോഗ്യം, തദ്ദേശസ്വയംഭരണം, വിദ്യാഭ്യാസം വകുപ്പുകളുടെ യോഗം ചേര്ന്നു.
ഗുരുതര രോഗികള് ഒരേ സമയം ആശുപത്രികളിലെത്തിയാല് ആശുപത്രി സംവിധാനത്തിന് താങ്ങാന് പറ്റില്ല. അത്തരമൊരു സാഹചര്യമുണ്ടാവാതിരിക്കാന് വകുപ്പുകള് ഏകോപിപ്പിച്ചുള്ള പ്രവര്ത്തനങ്ങള് നടത്തണം. കുട്ടികളില് ഇന്ഫ്ളുവന്സ കൂടി വരികയാണ്. ഈ സാഹചര്യത്തില് വകുപ്പുകളുടെ ഏകോപിച്ചുള്ള പ്രവര്ത്തനത്തിനും പൊതുവില് എടുക്കേണ്ട തീരുമാനങ്ങള് ചര്ച്ച ചെയ്യാനുമാണ് യോഗം വിളിച്ചതെന്നും മന്ത്രി പറഞ്ഞു.
ജില്ലാതലത്തില് കൂടാതെ തദ്ദേശ തലത്തില് രണ്ടാഴ്ചയിലൊരിക്കല് യോഗം വിളിക്കുമെന്ന് മന്ത്രി എം.ബി. രാജേഷ് പറഞ്ഞു.