തിരുവനന്തപുരം: കേരളാ ക്രിക്കറ്റ് ലീഗിലെ ഇന്നലത്തെ ആദ്യ മത്സരത്തില്‍ കൊച്ചി ബ്ല്യൂ ടൈഗേഴ്‌സിനെതിരേ തൃശൂര്‍ ടൈറ്റന്‍സിന് നാലു വിക്കറ്റ് ജയം. 85 റണ്‍സ് വിജയലക്ഷ്യവുമായി ബാറ്റിംഗിനിറങ്ങിയ തൃശൂര്‍ 17.5 -ാം ഓവറില്‍ ആറുവിക്കറ്റിന് ലക്ഷ്യം കണ്ടു. തൃശൂരിനു വേണ്ടി 31 പന്തില്‍ പന്തില്‍ പുറത്താകാതെ പി.കെ മിഥുന്‍ 23 റണ്‍സ് നേടി. ഷോണ്‍ റോജറിന്റെ പന്ത് ബൗണ്ടറിലേക്ക് പായിച്ച് ഏദന്‍ ആപ്പിളാണ് വിജയ റണ്‍ നേടിയത്.
ടോസ് നഷ്ടപ്പെട്ട് ബാറ്റിംഗിനിറങ്ങിയ കൊച്ചിയുടെ മുന്‍ നിര മുതല്‍ വാലറ്റം വരെയുള്ള ബാറ്റ്‌സ്മാന്‍മാര്‍ തൃശൂരിന്റെ ബൗളര്‍മാര്‍ക്കു മുന്നില്‍ വേഗത്തില്‍ കീഴടങ്ങി. ഓപ്പണര്‍ ആനന്ദ കൃഷ്ണനു മാത്രമാണ് രണ്ടക്കം കടക്കാനായത്. 26 പന്തില്‍ 28 റണ്‍സ് സ്വന്തമാക്കിയ ആനന്ദിനെ അക്ഷയ് മനോഹറിന്റെ പന്തില്‍ അഹമ്മദ് ഇമ്രാന്‍ പിടിച്ചു പുറത്താക്കി. തൃശൂരിന്റെ മുഹമ്മദ് ഇഷാക്കിന്റെ പന്തുകള്‍ക്ക് മുന്നില്‍ കൊച്ചി അടി പതറുന്ന കാഴ്ച്ചയാണ് കാര്യവട്ടത്ത് കണ്ടത്. നാല് ഓവറില്‍ 12 റണ്‍സ് വിട്ടുകൊടുത്ത് നാലു വിക്കറ്റുകളാണ് ഇഷാക്ക്് പിഴുതത്. സ്‌കോര്‍ ബോര്‍ഡില്‍ രണ്ടു റണ്‍സുള്ളപ്പോള്‍ കൊച്ചിക്ക് ആദ്യവിക്കറ്റ് നഷ്ടമായി. മൂന്നു പന്ത് നേരിട്ട് റണ്‍സൊന്നുമെടുക്കാതെ അപ്പു പ്രകാശിനെ മോനു കൃഷ്ണന്‍ എല്‍ബിഡബ്ല്യുവില്‍ കുടുക്കി. തുടര്‍ന്ന് എത്തിയ ഒരു ബാറ്റ്‌സാമാനും രണ്ടക്കം കടക്കാന്‍ കഴിഞ്ഞില്ല. കെ.ബി അനന്ദു(ആറ്), ഷോണ്‍ റോജര്‍(അഞ്ച്), ജോബിന്‍ ജോബി(ഏഴ്), സിജോമോന്‍ ജോസഫ്(എട്ട്), നിഖില്‍ തോട്ടത്ത് (ഒന്‍പത്) ഷൈന്‍ ജോണ്‍ ജേക്കബ്(ആറ്)), ബേസില്‍ തമ്പി(പൂജ്യം), പി.എസ് .ജെറിന്‍(ഒന്ന്) എന്നിവര്‍ സ്വന്തം സ്‌കോര്‍ രണ്ടക്കത്തിലത്തിക്കാന്‍ കഴിയാതെ പുറത്തായി.
ഉണ്ണികൃഷ്ണന്‍ മനുകൃഷ്ണന്‍(ഏഴ്) പുറത്താകാതെ നിന്നു. 17 ഓവറില്‍ 84 റണ്‍സിസ് കൊച്ചിയുടെ ഇന്നിംഗ്‌സ് അവസാനിച്ചു.
85 റണ്‍സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ തൃശൂരിന് ആദ്യ ഓവറില്‍ രണ്ടു വിക്കറ്റുകള്‍ നഷ്ടമായി. ക്യാപ്റ്റന്‍ ബേസില്‍ തമ്പി എറിഞ്ഞ ഓവറിലെ നാലാം പന്തില്‍ വിഷ്ണു വിനോദിന്റെയും അഞ്ചാം പന്തില്‍ അനസ് നസീറിന്റെയും വിക്കറ്റുകള്‍ തൃശൂരിന് നഷ്ടമായി. ഒന്നാം ഓവര്‍ പൂര്‍ത്തിയായപ്പോള്‍ രണ്ട് വിക്കറ്റ് നഷ്ടത്തില്‍ നാലു റണ്‍സ് എന്ന നിലയിലായി തൃശൂര്‍. അഹമ്മദ് ഇമ്രാന്‍ വരുണ്‍ നായനാര്‍ കൂട്ടുകെട്ട് ടീം സ്‌കോര്‍ 17 ലെത്തിയപ്പോള്‍ പിരിഞ്ഞു. ഒന്‍പത് പന്തില്‍ നിന്ന് ഒന്‍പത് റണ്‍സെടുത്ത ക്യാപ്റ്റന്‍ വരുണ്‍ നായനാരെ സിജോമോന്‍ ജോസഫ് എല്‍ബിഡബ്ല്യുവില്‍ കുടുക്കി. അഞ്ച് ഓവര്‍ പൂര്‍ത്തിയായപ്പോള്‍ മൂന്നു വിക്കറ്റ് നഷ്ടത്തില്‍ 23 എന്ന നിലയിലായിരുന്നു തൃശൂര്‍.
എട്ടാം ഓവറിലെ ആദ്യപന്തില്‍ അക്ഷയ് മനോഹറെ പി.എസ് ജെറിന്‍ ബൗല്‍ഡാക്കി. 15 പന്ത് നേരിട്ട അക്ഷയ് ഒരു ബൗണ്ടറി ഉള്‍പ്പെടെ എട്ടു റണ്‍സുമായാണ് മടങ്ങിയത്. 10 ഓവറില്‍ നാലിന് 48 എന്ന സ്‌കോറിലായി തൃശൂര്‍. 12.5 -ാം ഓവറില്‍ അഹമ്മദ് ഇമ്രാന്‍ (24) റണ്ണൗട്ടായി. ഷൈന്‍ ജോണ്‍ ജേക്കബ എറിഞ്ഞ് 14-ാം ഓവറിലെ ആദ്യപന്തില്‍ അഭിഷേക് പ്രതാപിനെ സിജോമോന്‍ ജോസഫിന്റെ കൈകളിലെത്തിച്ചപ്പോള്‍ ആറു വിക്കറ്റ് നഷ്ടത്തില്‍ 61 എന്ന നിലയിലായി തൃശൂര്‍. തുടര്‍ന്ന് വിക്കറ്റുകള്‍ നഷ്ടമാകാതെ പി.മിഥുന്‍ ഏദന്‍ ആപ്പിള്‍ ടോം സഖ്യം തൃശൂരിനെ വിജയത്തിലെത്തിച്ചു.
