ന്യൂഡൽഹി: രണ്ടാം തവണയും ഓസ്‌ട്രേലിയൻ പ്രധാനമന്ത്രിയായി തിര‍ഞ്ഞെടുക്കപ്പെട്ട ആന്തണി ആൽബനീസിന് അഭിനന്ദനം അറിയിച്ച് പ്രധാനമന്ത്രി നരേന്ദ്ര മോദി. സമൂഹമാധ്യമമായ എക്സിലൂടെയാണ് ആന്തണിയുടെ ഉജ്ജ്വല വിജയത്തെയും അധികാര തുടർച്ചയെയും മോദി അഭിനന്ദിച്ചത്. ഓസ്‌ട്രേലിയൻ ജനതയ്ക്ക് ആന്തണിയുടെ നേതൃത്വത്തിലുള്ള വിശ്വാസത്തെ സൂചിപ്പിക്കുന്നതാണ് ഈ വിജയമെന്നും മോദി പറഞ്ഞു. ഇരുപത്തിയൊന്നു വർഷങ്ങൾക്കിടെ തുടർച്ചയായി രണ്ട് തവണ അധികാരത്തിലെത്തുന്ന ആദ്യത്തെ ഓസ്‌ട്രേലിയൻ പ്രധാനമന്ത്രിയാണ് ആന്തണി ആൽബനീസ്.
ഇന്ത്യയും ഓസ്‌ട്രേലിയയും തമ്മിലുള്ള തന്ത്രപരമായ പങ്കാളിത്തം കൂടുതൽ ആഴത്തിലാക്കാനും ഇന്തോ-പസഫിക്ക് ഭാഗത്തെ സമാധാനം, സ്ഥിരത, സമൃദ്ധി എന്നിവയ്‌ക്കായി ഇരു രാജ്യങ്ങൾക്കുമുള്ള കാഴ്ചപ്പാടുകൾ മുന്നോട്ട് കൊണ്ടുപോകാനും ഒരുമിച്ചു പ്രവർത്തിക്കാൻ ആഗ്രഹിക്കുന്നതായും മോദി പറഞ്ഞു.
