ന്യൂയോര്‍ക്ക് : രസതന്ത്ര നൊബേല്‍ ജേതാവും ലിഥിയം അയേണ്‍ ബാറ്ററി വികസിപ്പിക്കുന്നതില്‍ പങ്കാളിയുമായ ജോണ്‍ ഗുഡിനെഫ് (100) അന്തരിച്ചു. റീചാര്‍ജ് ചെയ്യാന്‍ കഴിയുന്ന ലിഥിയം അയോണ്‍ ബാറ്ററികള്‍ വികസിപ്പിച്ചെടുത്ത കണ്ടെത്തലിന് 2019 ലാണ് ബ്രിട്ടിഷ്, ജപ്പാന്‍ ശാസ്ത്രജ്ഞരുമായി ഇദ്ദേഹം നൊബേല്‍ പുരസ്‌കാരം പങ്കിട്ടത്.
ജര്‍മനിയിലെ ജിനെയില്‍ അമേരിക്കന്‍ സ്വദേശികളുടെ മകനായി പിറന്ന ജോണ്‍ ഗുഡിനെഫ് യേല്‍ യൂണിവേഴ്‌സിറ്റിയില്‍നിന്ന് ഗണിതപഠനം പൂര്‍ത്തിയാക്കി യുഎസ് സേനയില്‍ ചേര്‍ന്നു. രണ്ടാം ലോകയുദ്ധകാലത്ത് സേനയില്‍ മെറ്റിരിയോളജിസ്റ്റായി പ്രവര്‍ത്തിച്ചു. 1952 ല്‍ ഷിക്കാഗോ സര്‍വകലാശാലയില്‍ നിന്ന് പിഎച്ച്ഡി നേടിയ അദ്ദേഹം മാസച്യുസിറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി, യുകെയിലെ ഓക്‌സ്ഫഡ് യൂണിവേഴ്‌സിറ്റി എന്നിവിടങ്ങളിലും പ്രവര്‍ത്തിച്ചു.
കംപ്യൂട്ടര്‍ റാം (റാന്‍ഡം ആക്‌സസ് മെമ്മറി) വികസിപ്പിക്കുന്നതിലും ഇദ്ദേഹം പങ്കാളിയായി.
