ന്യൂസിലൻഡിനെതിരെ സ്വന്തം തട്ടകത്തിൽ 3-0ന്റെ സമ്പൂർണ പരാജയം രുചിച്ച ടീം ഇന്ത്യയോട് ആത്മപരിശോധന നടത്തണമെന്ന് ആവശ്യപ്പെട്ട് ഇതിഹാസ താരം സച്ചിൻ ടെണ്ടുൽക്കർ. സമൂഹമാധ്യമമായ എക്സിൽ പങ്കുവച്ച പോസ്റ്റിലാണ് സച്ചിൻ വിമർശമുന്നയിച്ചത്. ‘സ്വന്തം നാട്ടിൽ 3-0ത്തിന് പരാജയപ്പെടുക എന്നുള്ളത് അംഗീകരിക്കാൻ പ്രയാസമുള്ള കാര്യമാണ്. ടീം ഇന്ത്യ ആത്മപരിശേധന നടത്തേണ്ടതായിട്ടുണ്ട്.മുന്നൊരുക്കത്തിൻ്റെ കുറവായിരുന്നോ, ഷോട്ട് സെലക്ഷൻ മോശമായിരുന്നോ, അതോ മാച്ച് പ്രാക്ടീസ് ഇല്ലായിരുന്നോ?’ സച്ചിൻ സമൂഹ മാധ്യമമായ എകിൽ കുറിച്ചു. ആദ്യ ഇന്നിംഗ്സിൽ ശുഭ്മാൻ ഗില്ലും രണ്ട് ഇന്നിംഗ്സുകളിലും റിഷഭ് പന്തും മികച്ച പ്രകടനം കാഴ്ചവച്ചു. ടെസ്റ്റ് സീരിസ് വിജയത്തിന്റെ മുഴുൻ ക്രെഡിറ്റും ന്യൂസിലൻഡ് ടീമിന്റെ സ്ഥിരതയാർന്ന പ്രകടനത്തിനാണെന്നും അദ്ദേഹം എക്സിൽ കുറിച്ചു.
അവസാനത്തെയും മൂന്നാമത്തെയും ടെസ്റ്റ് മത്സരത്തിൽ 25 റൺസിനാണ് ഇന്ത്യ പരാജയപ്പെട്ടത്. ന്യൂസിലൻഡ് ഉയർത്തിയ 147 എന്ന വിജയലക്ഷ്യം പിൻതുടർന്ന ഇന്ത്യ 121 ന് പുറത്താവുകയായിരുന്നു. സീരീസ് തോൽവിയോടെ ലോക ടെസ്റ്റ് ചാമ്പ്യൻഷിപ്പിന്റെ പോയിന്‍റ് പട്ടികയിൽ ഒന്നാം സ്ഥാനത്തായിരുന്ന ഇന്ത്യ രണ്ടാം സ്ഥാനത്തേക്ക് പിന്തള്ളപ്പെട്ടിരുന്നു. ഇന്ത്യയുടെ ചരിത്രത്തിൽ ആദ്യമായാണ് മൂന്ന് മത്സരങ്ങളുള്ള ടെസ്റ്റ് സീരിസിൽ ഹോം ഗ്രൌണ്ടിൽ സമ്പൂർണ തോൽവി വഴങ്ങുന്നത്. 1999/2000ൽ ദക്ഷിണാഫ്രിക്കയ്ക്കെതിരെ 2-0 ത്തിന് തോറ്റതാണ് ടീം ഇന്ത്യയുടം ഹോം ഗ്രൌണ്ടിലെ അവസാനത്തെ സമ്പൂർണ പരാജയം.
സീരിസിലെ ഇന്ത്യയുടെ 57 വിക്കറ്റുകളിൽ 37 എണ്ണവും നേടിയത് ന്യൂസിലൻഡ് സ്പിൻ ബൌളർമാരായിരുന്നു എന്നതാണ് മറ്റൊരു പ്രധാന കാര്യം. ഇക്കാര്യം മുൻ ഇന്ത്യൻ ഒപ്പണർ വിമർശന വിധേയമാക്കിയിരുന്നു. മുൻ ഇന്ത്യൻ താരങ്ങളായ ഇർഫാൻ പഠാനും ഹർഭജൻ സിംഗും തോൽവിയെക്കുറിച്ച് സമൂഹമാധ്യമങ്ങളിൽ വിമർശനം ഉയർത്തിയിരുന്നു.
