ടെഹ്‌റാൻ: പുതിയ ആണവ കരാറിനുള്ള അമേരിക്കയുടെ നിർദേശം നിരസിച്ച് ഇറാന്റെ പരമോന്നത നേതാവ് അലി ഖാംനഇ. ഇറാന്റെ സ്വാശ്രയ തത്വങ്ങൾക്ക് വിരുദ്ധമാണ് യുഎസ് വാഗ്ദാനം എന്ന് അലി ഖാംനഇ പറഞ്ഞു. ‘ടെഹ്‌റാനിൽ യുറേനിയം സമ്പുഷ്ടമാക്കാൻ കഴിയുമോ ഇല്ലയോ എന്ന് പറയാൻ നിങ്ങളാരാണ്? യുഎസ് നിർദേശം ഇറാന്റെ ദേശീയ സ്വാതന്ത്ര്യത്തിന് എതിരാണ്’ പ്രസിഡന്റ് ഡൊണാൾഡ് ട്രംപിനെ അഭിസംബോധന ചെയ്തുകൊണ്ട് അദ്ദേഹം പറഞ്ഞു.
ട്രംപ് ഭരണകൂടം ഇറാനുമായി ഒരു താൽക്കാലിക കരാർ നിർദേശിച്ചതായി ന്യൂയോർക്ക് ടൈംസ് ചൊവ്വാഴ്ച പ്രസിദ്ധീകരിച്ച ഒരു റിപ്പോർട്ടിനോടുള്ള പ്രതികരണമായാണ് അദ്ദേഹത്തിന്റെ പരാമർശങ്ങൾ. ഈ നിർദേശം ഇറാനെ കുറഞ്ഞ അളവിൽ യുറേനിയം സമ്പുഷ്ടമാക്കുന്നത് തുടരാൻ അനുവദിക്കും. അതേസമയം, മറ്റ് രാജ്യങ്ങളുമായി സഹകരിച്ച് ഇറാൻ ആണവായുധങ്ങൾ സ്വന്തമാക്കുന്നത് തടയാൻ യുഎസ് ഒരു ഏകോപിത പദ്ധതി വികസിപ്പിക്കും.
‘നമ്മുടെ രാജ്യത്തിന്റെ സ്വാതന്ത്ര്യത്തിലെ ഒരു പ്രധാന തത്വമായ ‘നമുക്ക് കഴിയും’ എന്ന മുദ്രാവാക്യത്തിന് പൂർണ്ണമായും വിരുദ്ധമാണ് ആണവ വിഷയത്തെക്കുറിച്ചുള്ള അമേരിക്കൻ നിർദ്ദേശം.’ അലി ഖാംനഇ തന്റെ പ്രസ്താവനയിൽ പറഞ്ഞു.
Iran rejects US proposal for new nuclear deal
