ശബരിമല: സന്നിധാനത്ത് നവഗ്രഹങ്ങള്‍ക്കായി നിര്‍മ്മിക്കുന്ന പുതിയ ശ്രീകോവിലിന്റെ ഉത്തരം വയ്പ്പ് ചടങ്ങ് നടന്നു. ഇന്ന് ഉച്ചയ്ക്ക് 11.58 നും 12. 20 നും ഇടയിലുള്ള മുഹൂര്‍ത്തത്തില്‍ തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി.എസ് പ്രശാന്താണ് ഉത്തരംവയ്പ്പ് ചടങ്ങ് നിര്‍വഹിച്ചത്. മാളികപ്പുറത്തിന് സമീപമാണ് പുതിയ ശ്രീകോവില്‍ ഒരുങ്ങുന്നത്.
നേരത്തെ ഉണ്ടായിരുന്ന നവഗ്രഹങ്ങളുടെ ശ്രീകോവില്‍ കൂടുതല്‍ അഭികാമ്യമായ സ്ഥലത്തേക്ക് മാറ്റി സ്ഥാപിക്കണമെന്ന് ദേവപ്രശ്‌നവിധിയില്‍ തെളിഞ്ഞതിനെത്തുടര്‍ന്നാണ് പുതിയ ശ്രീ കോവില്‍ നിര്‍മ്മിക്കുന്നത്. ഇതിനോടകം 60 ശതമാനം നിര്‍മ്മാണ പ്രവര്‍ത്തനങ്ങള്‍ പൂര്‍ത്തിയായി. തേക്കിന്‍ തടിയും ചെമ്പ് തകിടും കല്ലും ഉപയോഗിച്ചാണ് ശ്രീ കോവില്‍ നിര്‍മ്മിക്കുന്നത്.
ചടങ്ങില്‍ ശബരിമല എക്‌സിക്യൂട്ടീവ് എഞ്ചിനീയര്‍ ശ്യാമപ്രസാദ്, ശബരിമല അഡ്മിനിസ്‌ട്രേറ്റ് ഓഫീസര്‍ ബിജു വി നാഥ്, അസി.എക്‌സിക്യൂട്ടീവ് ഓഫീസര്‍ ശ്രീനിവാസ്, അസി. എഞ്ചിനിയര്‍മാരായ മനോജ് കുമാര്‍ , സുനില്‍ കുമാര്‍, ക്ഷേത്ര ശില്‍പി മഹേഷ് പണിക്കര്‍ എന്നിവര്‍ പങ്കെടുത്തു.
Sabarimala new Navagraha Sreekovil construction
