തുർക്കിയിൽ റഷ്യയും യുക്രൈനും തമ്മിൽ നടന്ന പുതിയ ചർച്ചകൾ നിർണായക തീരുമാനങ്ങൾ എടുക്കാതെ അവസാനിച്ചു. വെടിനിർത്തൽ കരാറിലേക്ക് എത്താൻ വീണ്ടും പരാജയപ്പെട്ടതായാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. ഇരുരാജ്യങ്ങൾക്കും ചർച്ചയിൽ അവതരിപ്പിച്ച ചില വ്യവസ്ഥകൾ അംഗീകരിക്കാൻ കഴിഞ്ഞില്ലെന്നതാണ് ചർച്ചകൾ പരാജയപ്പെടാൻ കാരണമായത്.
ബുധനാഴ്ച നടന്ന 40 മിനിറ്റ് ദൈർഘ്യമുള്ള ചർച്ചയിൽ പ്രധാനമായും യുദ്ധത്തടവുകാരെ കൈമാറുന്നതിന്റെയായിരുന്നു ചർച്ചാ വിഷയമെന്ന് യുക്രെയ്ൻ പ്രതിനിധി റസ്റ്റം ഉമെറോവ് വ്യക്തമാക്കി. ശത്രുത അവസാനിപ്പിക്കാൻ യാതൊരു പുരോഗതിയുമില്ലെന്നും അദ്ദേഹം കൂട്ടിച്ചേർത്തു.
ചർച്ചകൾക്ക് പുതിയ ഊർജം നൽകാൻ യുക്രെയ്ന്‍ പ്രസിഡന്റ് വോളോഡിമിർ സെലെൻസ്കിയും റഷ്യൻ പ്രസിഡന്റ് വ്‌ളാഡിമിർ പുട്ടിനും തമ്മിൽ ഓഗസ്റ്റ് അവസാനം നേരിട്ട് കൂടിക്കാഴ്ച നടത്തണമെന്ന നിർദേശം യുക്രെയ്ൻ മുന്നോട്ടുവച്ചിട്ടുണ്ട്. എന്നാൽ റഷ്യ ഇതുവരെ അതിന് സമ്മതം നൽകിയിട്ടില്ല. ഒരു ധാരണാപത്രത്തിലെത്തുക തന്നെ പ്രധാനമാണെന്ന് റഷ്യൻ പ്രതിനിധി വ്‌ളാഡിമിർ മെഡിൻസ്‌കി പ്രതികരിച്ചു.
ഈ പശ്ചാത്തലത്തിൽ, യു.എസ് പ്രസിഡന്റ് ഡൊണാൾഡ് ട്രംപ് ഉന്നയിച്ച ഉപരോധ ഭീഷണികൾ ചർച്ചക്ക് പശ്ചാത്തലമായതായും കരുതപ്പെടുന്നു. 50 ദിവസത്തിനുള്ളിൽ സമാധാന കരാറിൽ എത്താനായില്ലെങ്കിൽ റഷ്യയും അതുമായി വ്യാപാരം നടത്തുന്ന രാജ്യങ്ങളും കനത്ത സാമ്പത്തിക ഉപരോധങ്ങൾ നേരിടേണ്ടി വരുമെന്ന് ട്രംപ് മുന്നറിയിപ്പ് നൽകിയിരുന്നു.
റഷ്യൻ എണ്ണ ഇറക്കുമതി തുടരുന്നെങ്കിൽ ഇന്ത്യ, ചൈന, ബ്രസീൽ എന്നീ രാജ്യങ്ങൾക്കെതിരെ 500 ശതമാനം വരെ കസ്റ്റംസ് തീരുവ ഏർപ്പെടുത്താമെന്ന യു.എസ് സെനറ്ററുടെ വെല്ലുവിളിയും ഇതിനു പിന്നാലെയായിരുന്നു.
ഇരുരാജ്യങ്ങൾക്കും പരസ്പരം കൈമാറാനുള്ളത് കുറഞ്ഞത് 1,200 യുദ്ധത്തടവുകാരാണെന്ന് റിപ്പോർട്ടുകൾ സൂചിപ്പിക്കുന്നു. കൂടാതെ, സൈനിക ആശയവിനിമയങ്ങൾ വേഗത്തിലാക്കുന്നതിനുള്ള താത്പര്യവും ഇരുവശവും കാണിച്ചെന്നാണ് സൂചന.
Russia-Ukraine Talks in Turkey End Without Progress; Ceasefire Further Delayed
