ന്യൂഡൽഹി: ബിഹാറിൽ നിയമസഭാ തിരഞ്ഞെടുപ്പ് നടക്കാനിരിക്കെ, വോട്ടർ പട്ടിക പരിഷ്‌കരണത്തിന്റെ ഭാഗമായി 52 ലക്ഷം പേരെ ഒഴിവാക്കിയതായി കേന്ദ്ര തിരഞ്ഞെടുപ്പ് കമ്മിഷൻ അറിയിച്ചു. മരിച്ചവരോ, കുടിയേറിയവരോ, ഒന്നിലധികം സ്ഥലങ്ങളിൽ വോട്ട് രേഖപ്പെടുത്തിയവരോ ആയ വോട്ടർമാരെയാണ് ഒഴിവാക്കിയതെന്ന് തിരഞ്ഞെടുപ്പ് കമ്മിഷൻ വ്യക്തമാക്കി.
ഓഗസ്റ്റ് 1-ന് പ്രസിദ്ധീകരിക്കുന്ന കരട് വോട്ടർ പട്ടികയിൽ യോഗ്യരായ എല്ലാ വോട്ടർമാരെയും ഉൾപ്പെടുത്തിയിട്ടുണ്ടെന്ന് കമ്മിഷൻ ഉറപ്പുനൽകി. ബിഹാറിലെ നിയമസഭാ തിരഞ്ഞെടുപ്പിന് മുന്നോടിയായി നടത്തുന്ന സ്‌പെഷ്യൽ ഇന്റൻസീവ് റിവിഷൻ (SIR) ഭരണഘടന നിർദേശിക്കുന്ന കടമയുടെ ഭാഗമാണെന്നും, ഭരണഘടനയുടെ 324-ാം വകുപ്പ് പ്രകാരം നൽകപ്പെട്ട അധികാരങ്ങൾ ഉപയോഗിച്ചാണ് ഈ നടപടിയെന്നും തിരഞ്ഞെടുപ്പ് കമ്മിഷൻ കോടതിയിൽ വാദിച്ചു.
പ്രതിപക്ഷ പാർട്ടികൾ ഈ നീക്കത്തിനെതിരെ ശക്തമായ പ്രതിഷേധമുയർത്തിയിട്ടുണ്ട്. പാവപ്പെട്ടവരും ന്യൂനപക്ഷ വിഭാഗത്തിൽപ്പെട്ടവരുമായ യഥാർത്ഥ വോട്ടർമാരെ ഒഴിവാക്കാൻ ലക്ഷ്യമിട്ടുള്ള നീക്കമാണിതെന്ന് അവർ ആരോപിക്കുന്നു. ഈ വിഷയവുമായി ബന്ധപ്പെട്ട് സുപ്രീം കോടതിയിൽ ഹർജികളും സമർപ്പിക്കപ്പെട്ടിട്ടുണ്ട്.
തിരഞ്ഞെടുപ്പ് കമ്മിഷന്റെ കണക്കനുസരിച്ച്, ഒഴിവാക്കിയ 52 ലക്ഷം വോട്ടർമാരിൽ ഏകദേശം 18 ലക്ഷം പേർ മരിച്ചവരാണ്, 26 ലക്ഷം പേർ സ്ഥിരമായി താമസം മാറിയവരാണ്, 7 ലക്ഷം പേർ ഒന്നിലധികം സ്ഥലങ്ങളിൽ വോട്ട് രേഖപ്പെടുത്തിയവരാണ്.
പൊതുജനങ്ങൾക്ക് കരട് വോട്ടർ പട്ടികയിൽ കൂട്ടിച്ചേർക്കലുകൾ, തിരുത്തലുകൾ, ഒഴിവാക്കലുകൾ എന്നിവയുമായി ബന്ധപ്പെട്ട് ആഗസ്റ്റ് 1 മുതൽ സെപ്റ്റംബർ 1 വരെ പരാതികൾ സമർപ്പിക്കാൻ ഒരു മാസത്തെ സമയം നൽകുമെന്നും തിരഞ്ഞെടുപ്പ് കമ്മിഷൻ അറിയിച്ചു.
Bihar Voter List Revision: 52 lakh voters excluded, says Election Commission
