വിസി നിയമനം: സർക്കാർ പാനൽ രാജ്ഭവന് കൈമാറി; ഗവർണർ സുപ്രീം കോടതിയിലേക്ക് ?

തിരുവനന്തപുരം: ഡിജിറ്റൽ, സാങ്കേതിക സർവകലാശാലകളിലെ വൈസ് ചാൻസലർ (വിസി) നിയമനവുമായി ബന്ധപ്പെട്ട് സംസ്ഥാന സർക്കാർ മൂന്നംഗ പാനൽ രാജ്ഭവന് കൈമാറി. ഹൈക്കോടതി വിധിയുടെ അടിസ്ഥാനത്തിലാണ് സർക്കാർ ഈ നടപടി സ്വീകരിച്ചത്. എന്നാൽ, താൽക്കാലിക വിസി നിയമനവുമായി ബന്ധപ്പെട്ട് ഹൈക്കോടതി ഡിവിഷൻ ബെഞ്ചിൽ നിന്ന് തിരിച്ചടി നേരിട്ട സാഹചര്യത്തിൽ, ഗവർണർ രാജേന്ദ്ര ആർലേക്കർ സുപ്രീം കോടതിയെ സമീപിക്കാൻ ഒരുങ്ങുകയാണ്.

സർക്കാർ നൽകിയ പേരുകൾ:

പ്രൊഫ. ഡോ. ജപ്രകാശ്, ഇൻചാർജ് ഡയറക്ടർ ഓഫ് ടെക്‌നിക്കൽ എജ്യുക്കേഷൻ

പ്രൊഫ. ഡോ. എ പ്രവീൺ, ഡിപ്പാർട്ട്‌മെന്റ് ഓഫ് സിവിൽ എൻജിനിയറിങ്, സിഇടി, തിരുവനന്തപുരം

പ്രൊഫ. ഡോ. ആർ സജീബ്, ഡിപ്പാർട്ട്‌മെന്റ് സിവിൽ എൻജിനീയറിങ് ടികെഎം കോളജ് ഓഫ് എൻജിനീയറിങ്, കൊല്ലം

ഗവർണറുടെ നീക്കം: താൽക്കാലിക വിസി നിയമനം ഹൈക്കോടതി റദ്ദാക്കിയ സാഹചര്യത്തിൽ, അനുകൂല വിധി ലഭിക്കുമെന്ന നിയമോപദേശത്തിന്റെ അടിസ്ഥാനത്തിൽ ഗവർണർ രാജേന്ദ്ര ആർലേക്കർ നാളെ സുപ്രീം കോടതിയെ സമീപിക്കാൻ ശ്രമിക്കും. സുപ്രീം കോടതിയുടെ തീരുമാനം വരുന്നതുവരെ സാങ്കേതിക, ഡിജിറ്റൽ സർവകലാശാലകളിൽ വിസിമാരെ നിയമിക്കില്ലെന്നാണ് രാജ്ഭവന്റെ നിലപാട്. ഗവർണർ നിയമിച്ച രണ്ട് താൽക്കാലിക വിസിമാരുടെ നിയമനം സിംഗിൾ ബെഞ്ചും ഡിവിഷൻ ബെഞ്ചും റദ്ദാക്കിയിരുന്നു. ആദ്യഘട്ടത്തിൽ അപ്പീൽ വേണ്ടെന്ന് തീരുമാനിച്ചിരുന്നെങ്കിലും പിന്നീട് നിയമോപദേശം തേടിയ ശേഷമാണ് സുപ്രീം കോടതിയെ സമീപിക്കാൻ തീരുമാനിച്ചത്.

ഹൈക്കോടതിയുടെ നിരീക്ഷണങ്ങൾ: സർവകലാശാലകളിൽ വൈസ് ചാൻസലർമാർക്ക് സുപ്രധാന പങ്കുണ്ടെന്ന് ഹൈക്കോടതി കഴിഞ്ഞ ദിവസം ചൂണ്ടിക്കാട്ടിയിരുന്നു. വിസിമാർ സർവകലാശാലയുടെ താൽപ്പര്യം സംരക്ഷിക്കണം. താൽക്കാലിക വിസി നിയമനം ആറ് മാസത്തിൽ കൂടുതൽ പാടില്ലെന്നും, വിസി നിയമനം നീളുന്നത് വിദ്യാർത്ഥികളെ ബാധിക്കുമെന്നും ഹൈക്കോടതി വ്യക്തമാക്കി. സ്ഥിരം വിസി നിയമനത്തിൽ കാലതാമസം പാടില്ലെന്നും കോടതി ഓർമ്മിപ്പിച്ചു.

കൂടാതെ, താൽക്കാലിക വിസി നിയമനത്തിൽ ചാൻസലർക്ക് മറ്റ് വഴികളില്ലെന്നും, വിസി നിയമനം സർക്കാർ ശുപാർശ അനുസരിച്ച് തന്നെ നടത്തണമെന്നും ഹൈക്കോടതി പറഞ്ഞിരുന്നു. സർക്കാരിന്റെ ശുപാർശയില്ലാതെ നിയമനം നടത്തരുതെന്നാണ് 2022ലെ സിസ തോമസ് കേസിലെ വിധിയെന്നും ഹൈക്കോടതി ഗവർണറെ ഓർമ്മിപ്പിച്ചു. വിസി സ്ഥാനം ഒഴിഞ്ഞുകിടക്കുന്നത് സർവകലാശാലയുടെ താൽപ്പര്യമല്ലെന്നും വിസി സർവകലാശാലാ കാര്യങ്ങളിലെ കാവൽക്കാരനാണെന്നും കോടതി വിധിയിൽ വ്യക്തമാക്കിയിരുന്നു.

വിസി നിയമനം സർക്കാർ പാനലിൽ നിന്ന് വേണമെന്ന് സിംഗിൾ ബെഞ്ച് ഉത്തരവിട്ടിരുന്നു. ഇതിനെതിരെ ഗവർണർ രാജേന്ദ്ര ആർലേക്കർ ഡിവിഷൻ ബെഞ്ചിനെ സമീപിച്ചെങ്കിലും, ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് പി.വി. ബാലകൃഷ്ണൻ എന്നിവരടങ്ങുന്ന ഡിവിഷൻ ബെഞ്ച് സിംഗിൾ ബെഞ്ചിന്റെ ഉത്തരവ് ശരിവെക്കുകയും ഗവർണറുടെ അപ്പീൽ തള്ളുകയും ചെയ്തു.

VC appointment: Government panel handed over to Raj Bhavan; Governor to Supreme Court