കൊച്ചി: കൊച്ചി ശാസ്ത്ര സാങ്കേതിക സർവകലാശാല (കുസാറ്റ്) ക്യാമ്പസ് അഞ്ച് ദിവസത്തേക്ക് അടച്ചിടാൻ തീരുമാനിച്ചു. വിദ്യാർത്ഥികൾക്കിടയിൽ പകർച്ചവ്യാധി പടർന്നുപിടിച്ചതോടെയാണ് തീരുമാനം. ഇവരിൽ പലർക്കും എച്ച്1എൻ1 രോഗലക്ഷണങ്ങൾ കണ്ടെത്തിയതോടെയാണ് ക്യാമ്പസ് അടച്ചിടാൻ തന്നെ തീരുമാനിച്ചത്. ക്യാമ്പസിലെ ചില ഹോസ്റ്റലുകളിൽ രോഗബാധ സ്ഥിരീകരിച്ച സാഹചര്യത്തിൽ, നാളെ മുതൽ എല്ലാ ക്ലാസുകളും ഓൺലൈൻ വഴി നടത്തുമെന്ന് അധികൃതർ അറിയിച്ചു. രോഗവ്യാപനം തടയുന്നതിന്റെ ഭാഗമായി കർശനമായ മുൻകരുതലുകൾ സ്വീകരിക്കുകയാണ്.
കേരളത്തിന് പുറത്തുള്ള വിദ്യാർത്ഥികൾ ഒഴികെ, മറ്റെല്ലാ വിദ്യാർത്ഥികളും ഹോസ്റ്റൽ മുറികൾ ഒഴിയണമെന്ന് സർവകലാശാല നിർദേശിച്ചിട്ടുണ്ട്. രോഗലക്ഷണങ്ങൾ പ്രകടിപ്പിക്കുന്നവർക്ക് വൈദ്യസഹായം ഉറപ്പാക്കാനും ആരോഗ്യ വകുപ്പുമായി സഹകരിച്ച് പ്രതിരോധ നടപടികൾ ശക്തമാക്കാനും തീരുമാനിച്ചിട്ടുണ്ട്. ക്യാമ്പസിന്റെ പ്രവർത്തനം താത്കാലികമായി ഓൺലൈനിലേക്ക് മാറ്റുന്നതോടെ, വിദ്യാർത്ഥികളുടെ സുരക്ഷ ഉറപ്പാക്കുകയാണ് ലക്ഷ്യം.
