ന്യൂഡൽഹി: ഇന്ത്യയും അമേരിക്കയും തമ്മിലുള്ള ദീർഘകാല ചർച്ചകൾക്കൊടുവിൽ ഒരു ‘മിനി ട്രേഡ് ഡീൽ’ ഇന്ന് പ്രഖ്യാപിക്കാൻ സാധ്യതയുണ്ടെന്ന് സർക്കാർ വൃത്തങ്ങൾ അറിയിച്ചു. ഉഭയകക്ഷി താരിഫുകൾക്കുള്ള സമയപരിധി ഇന്ന് (JULY 8) അവസാനിക്കുന്നതിന് മുന്നോടിയായാണ് ഈ പ്രഖ്യാപനം പ്രതീക്ഷിക്കുന്നത്. അനുകൂലമായ ഒരു കരാർ സാധ്യമാകുമെന്ന ശുഭാപ്തിവിശ്വാസത്തിലാണ് ഉദ്യോഗസ്ഥർ.
പുതിയ കരാറിൽ പാൽ ഉൽപ്പന്നങ്ങൾ, നിരവധി കാർഷികോൽപ്പന്നങ്ങൾ എന്നിവയുൾപ്പെടെയുള്ള പ്രധാന മേഖലകളെ ഒഴിവാക്കാനാണ് സാധ്യത. എന്നിരുന്നാലും, ധാന്യങ്ങൾക്കും ചില പഴങ്ങൾക്കും കൂടുതൽ വിപണി പ്രവേശനം നൽകണമെന്ന യുഎസ് ആവശ്യങ്ങളിൽ ചിലത് ഇന്ത്യ അംഗീകരിച്ചേക്കും.
ഇന്ത്യയുടെ നിലപാട്:
ഗോതമ്പ്, ചോളം, പാൽ ഉൽപ്പന്നങ്ങൾ, ജനിതകമാറ്റം വരുത്തിയ വിളകൾ എന്നിവയുടെ കാര്യത്തിൽ ഇന്ത്യ ശക്തമായ നിലപാടാണ് സ്വീകരിക്കുന്നത്. ഭക്ഷ്യസുരക്ഷയ്ക്കും ആഭ്യന്തര കർഷകരെ സംരക്ഷിക്കുന്നതിനും ഇന്ത്യ മുൻഗണന നൽകുന്നു. തങ്ങളുടെ കാർഷികോൽപ്പന്നങ്ങൾക്ക് വിപണി പ്രവേശനം നേടാനാണ് അമേരിക്ക ശ്രമിക്കുന്നതെങ്കിലും, രാജ്യത്തിന്റെ ഭക്ഷ്യസുരക്ഷ ഉറപ്പാക്കാനാണ് ഇന്ത്യ ശ്രദ്ധ കേന്ദ്രീകരിക്കുന്നത്. ഈ വ്യത്യാസങ്ങൾക്കിടയിലും, തുണിത്തരങ്ങൾ, തുകൽ, മരുന്നുകൾ എന്നിവയുടെ തീരുവ കുറയ്ക്കാൻ ഇന്ത്യ സന്നദ്ധത പ്രകടിപ്പിച്ചിട്ടുണ്ട്.
യുഎസ് പ്രസിഡന്റ് ട്രംപിന്റെ പ്രതികരണം:
വ്യാപാരക്കമ്മി ഇല്ലാതാക്കുന്നതിനും താരിഫുകളിലൂടെ യുഎസിന്റെ സ്വാധീനം ഉറപ്പിക്കുന്നതിനും വേണ്ടിയുള്ള ശ്രമങ്ങളുടെ ഭാഗമായി ഇന്ത്യയുമായി ഒരു വ്യാപാര കരാറിലേക്ക് അമേരിക്ക അടുക്കുകയാണെന്ന് യുഎസ് പ്രസിഡന്റ് ഡൊണാൾഡ് ട്രംപ് നേരത്തെ പ്രഖ്യാപിച്ചിരുന്നു. “ഇന്ത്യയുമായി ഒരു കരാറിൽ ഏർപ്പെടുന്നതിന് ഞങ്ങൾ അടുത്തു,” ഇസ്രായേൽ പ്രസിഡന്റ് ബെഞ്ചമിൻ നെതന്യാഹുവുമായുള്ള കൂടിക്കാഴ്ചയ്ക്കിടെ ട്രംപ് മാധ്യമങ്ങളോട് പറഞ്ഞു. “യുണൈറ്റഡ് കിംഗ്ഡവുമായി ഞങ്ങൾ ഒരു കരാറിൽ ഏർപ്പെട്ടു. ചൈനയുമായി ഞങ്ങൾ ഒരു കരാറിൽ ഏർപ്പെട്ടു.” ഇന്ത്യയുമായുള്ള ഈ സാധ്യതയുള്ള കരാറിന്റെ ഘടനയെക്കുറിച്ചോ വ്യാപ്തിയെക്കുറിച്ചോ ട്രംപ് വിശദാംശങ്ങൾ നൽകിയില്ലെങ്കിലും, ന്യായമായ ആശങ്കകളുള്ള രാജ്യങ്ങൾക്ക് വഴക്കം നൽകുമെന്നും അദ്ദേഹം സൂചിപ്പിച്ചു.
India-US trade deal likely to be announced today
