ഗുരുപൂജ ഇന്ത്യയുടെ സംസ്കാരത്തിന്റെ ഭാഗമാണെന്നും അതിൽ തെറ്റൊന്നുമില്ലെന്നുമാണ് കേരള ഗവർണർ രാജേന്ദ്ര ആർലേക്കറുടെ പ്രതികരണം. ഗുരുപൂര്ണിമ ദിനത്തിൽ കുട്ടികളെക്കൊണ്ട് വിരമിച്ച അധ്യാപകരുടെ പാദപൂജ നടത്തിപ്പിച്ചതിനെ ചൊല്ലിയുള്ള വിവാദത്തിനിടെ അദ്ദേഹം പ്രതികരിക്കുകയായിരുന്നു.
ബാലഗോകുലം സംഘടിപ്പിച്ച പരിപാടിയിൽ സംസാരിക്കുകയായിരുന്നു ഗവർണർ. “ഗുരുവിനെ ആദരിക്കുന്നത് സംസ്കാരത്തിന്റെ ഭാഗമാണ്. കുട്ടികൾ സനാതനധർമ്മവും പൂജയും പൈതൃകവും പഠിക്കുന്നതിൽ എന്താണ് തെറ്റ്?” എന്നാണ് ആർലേക്കറുടെ ചോദ്യം. ഗുരുപൂജയെ എതിർക്കുന്നവർ സംസ്കാരവും പൈതൃകവും കുട്ടികളിലേക്കു കൈമാറാത്തവരാണെന്നും അദ്ദേഹം വിമർശിച്ചു.
അധ്യാപകരുടെ പാദപൂജ വിവാദമായതിനെ തുടർന്ന് വിദ്യാർത്ഥി സംഘടനകളും രാഷ്ട്രീയ പാർട്ടികളും പ്രതിഷേധവുമായി രംഗത്തുവന്നിരുന്നു. ഈ വിഷയത്തിൽ വിശദീകരണം ആവശ്യപ്പെട്ട് വിദ്യാഭ്യാസ വകുപ്പ് റിപ്പോർട്ട് തേടും എന്ന് മന്ത്രി വി. ശിവൻകുട്ടി അറിയിച്ചു.
ഇതിന് പിന്നാലെയാണ് ഗവർണർ ഗുരുപൂജയെ അനുസ്മരിപ്പിക്കുകയും സംസ്കാരപരമായി അത് ശരിയാണെന്നും വ്യക്തമാക്കുകയും ചെയ്തത്.
Teach Heritage and Culture; Guru Pooja Is Not Wrong: Governor
