ബംഗളൂരു: തീവ്രവാദക്കേസിൽ ജയിലിൽ കഴിയുന്ന തടിയന്റവിട നസീറിന് സഹായം നൽകിയ മൂന്ന് പേരെ എൻ.ഐ.എ. (ദേശീയ അന്വേഷണ ഏജൻസി) അറസ്റ്റ് ചെയ്തു. ജയിലിലേക്ക് ഫോൺ എത്തിച്ചുനൽകിയ ഡോക്ടർ, വിവരങ്ങൾ കൈമാറിയ എ.എസ്.ഐ., പണം എത്തിച്ചുനൽകിയ യുവതി എന്നിവരാണ് കസ്റ്റഡിയിലായത്.
അറസ്റ്റിലായവർ:
- ഡോ. നാഗരാജ്: പരപ്പന അഗ്രഹാര ജയിലിലെ മനോരോഗ വിദഗ്ധനാണ് ഇദ്ദേഹം. തടിയന്റവിട നസീറിന് ജയിലിലേക്ക് ഫോൺ ഒളിച്ചുകടത്തി നൽകിയതിനാണ് അറസ്റ്റ്.
- ചാന്ദ് പാഷ: സിറ്റി ആംഡ് റിസർവിലെ എ.എസ്.ഐ. ആയ ഇദ്ദേഹം, നസീറിനെ വിവിധ കോടതികളിലേക്ക് എത്തിക്കുമ്പോൾ വിവരങ്ങൾ കൈമാറിയതായി കണ്ടെത്തി.
- അനീസ ഫാത്തിമ: തീവ്രവാദക്കേസിലെ പ്രതികളിലൊരാളായ ജുനൈദ് അഹമ്മദിന്റെ അമ്മയാണ് അനീസ ഫാത്തിമ. തടിയന്റവിട നസീറിന് വിവരങ്ങൾ കൈമാറുകയും പണം ജയിലിൽ എത്തിച്ചുനൽകുകയും ചെയ്തതിനാണ് ഇവരെ അറസ്റ്റ് ചെയ്തത്.
2023-ൽ ബംഗളൂരു പരപ്പന അഗ്രഹാര സെൻട്രൽ ജയിൽ കേന്ദ്രീകരിച്ച് ലഷ്‌കർ-ഇ-ത്വയ്ബയുടെ സ്ലീപ്പർ സെൽ നഗരത്തിൽ സ്ഫോടനങ്ങൾ നടത്താൻ പദ്ധതിയിട്ടിരുന്നതായി പോലീസ് കണ്ടെത്തിയിരുന്നു. തടിയന്റവിട നസീറിന്റെ നേതൃത്വത്തിലായിരുന്നു ഈ നീക്കങ്ങളെന്നും വ്യക്തമായിരുന്നു. ഈ കേസിൽ നേരത്തെ എട്ട് പേർ അറസ്റ്റിലായിരുന്നു. നിലവിൽ കേസ് എൻ.ഐ.എ.യുടെ അന്വേഷണ പരിധിയിലാണ്.
ബംഗളൂരു, കോലാർ ഉൾപ്പെടെ അഞ്ച് സ്ഥലങ്ങളിൽ നടത്തിയ റെയ്ഡിലാണ് ഈ മൂന്ന് പേരെയും എൻ.ഐ.എ. അറസ്റ്റ് ചെയ്തത്. കേസിലെ മറ്റ് പ്രതികൾക്കായുള്ള അന്വേഷണം തുടരുകയാണ്.
Three people, including a doctor, who helped Thadiyantavida Nazir, who is in prison on a terrorism charge, have been arrested.
