ന്യൂയോർക്ക്: വിദേശ രാജ്യങ്ങൾക്ക് മേൽ യുഎസ് ഏർപ്പെടുത്തിയ പുതിയ താരിഫ് നടപടികളെക്കുറിച്ച് വിശദീകരണവുമായി യുഎസ് പ്രസിഡന്റ് ഡൊണാൾഡ് ട്രംപ് രംഗത്ത്. യുഎസ് ഭരണകൂടം സാമാന്യബുദ്ധിയുടെയും വസ്തുതകളുടെയും അടിസ്ഥാനത്തിലാണ് ഈ തീരുമാനം എടുത്തതെന്ന് അദ്ദേഹം പറഞ്ഞു. മറ്റ് രാജ്യങ്ങൾ വർഷങ്ങളായി യുഎസിനോട് കാണിക്കുന്ന സമീപനങ്ങളും, അവർ യുഎസിനോട് ചെയ്യുന്ന അനീതികളും ഈ നടപടിക്ക് പിന്നിലുണ്ടെന്ന് വാർത്താസമ്മേളനത്തിൽ ട്രംപ് വ്യക്തമാക്കി.
പുതിയ താരിഫ് നടപടികൾ മുൻകാല വസ്തുതകളെയും, യുഎസിനോടുള്ള മറ്റ് രാജ്യങ്ങളുടെ നിലപാടിനെയും അടിസ്ഥാനമാക്കിയുള്ളതാണ്. താൻ അധികാരത്തിൽ വരുന്നതിന് മുമ്പ് ഭരിച്ചവർ ഇതിനെക്കുറിച്ചുള്ള കണക്കുകളിൽ ശ്രദ്ധ പുലർത്തിയിരുന്നില്ലെന്നും ട്രംപ് കൂട്ടിച്ചേർത്തു.
പ്രധാന താരിഫ് പ്രഖ്യാപനങ്ങൾ:
- ബ്രസീലിന് 50% തീരുവയാണ് ഏർപ്പെടുത്തിയിരിക്കുന്നത്.
- നോർത്ത് കൊറിയ, ജപ്പാൻ ഉൾപ്പെടെ നിരവധി രാജ്യങ്ങൾക്ക് മേൽ ട്രംപ് താരിഫ് ചുമത്തിയിട്ടുണ്ട്.
- ഫിലിപ്പീൻസ്, ബ്രൂണൈ, മൊൾഡോവ, അൾജീരിയ, ലിബിയ, ഇറാഖ്, ശ്രീലങ്ക എന്നീ രാജ്യങ്ങൾക്ക് 20% മുതൽ 30% വരെ താരിഫ് ചുമത്തിയിട്ടുണ്ട്.
- തിങ്കളാഴ്ച ജപ്പാൻ, ദക്ഷിണ കൊറിയ, ദക്ഷിണാഫ്രിക്ക എന്നിവയുൾപ്പെടെ 14 രാജ്യങ്ങൾക്ക് 25% മുതൽ 40% വരെ തീരുവ ചുമത്തുമെന്ന് യുഎസ് കത്ത് മുഖേന അറിയിച്ചിരുന്നു.
- യുഎസ് മറ്റ് രാജ്യങ്ങൾക്ക് മേൽ ചുമത്തിയിരിക്കുന്ന താരിഫുകൾ 2025 ഓഗസ്റ്റ് 1 മുതൽ പ്രാബല്യത്തിൽ വരും.
വ്യാപാരക്കരാർ: ട്രംപിന് തിരിച്ചടി, ഇന്ത്യക്ക് നിർണ്ണായകം
യുഎസ് പ്രസിഡന്റായി വീണ്ടും സ്ഥാനമേറ്റ ശേഷമുള്ള തന്റെ സർക്കാരിന്റെ നൂറാം ദിനാഘോഷ വേളയിൽ നൽകിയ വാക്ക് പാലിക്കാൻ ട്രംപിന് കഴിഞ്ഞില്ലെന്ന ആക്ഷേപം ഉയർന്നിട്ടുണ്ട്. ലോകത്തെ എല്ലാ രാജ്യങ്ങൾക്കും മേൽ പകരം തീരുവ പ്രഖ്യാപിച്ചുകൊണ്ട്, 200 രാജ്യങ്ങളുമായി വ്യാപാരക്കരാറിൽ ഏകദേശ ധാരണയായെന്ന് ട്രംപ് പറഞ്ഞിരുന്നു. തുടർന്ന് കൂടുതൽ ചർച്ചകൾക്കായി ജൂലൈ 9 വരെ തീരുവ നടപ്പാക്കുന്നത് അദ്ദേഹം മരവിപ്പിക്കുകയും ചെയ്തിരുന്നു.
എന്നാൽ, പറഞ്ഞ സമയം കഴിഞ്ഞിട്ടും യുകെ, ചൈന, വിയറ്റ്‌നാം എന്നീ മൂന്ന് രാജ്യങ്ങളുമായി മാത്രമേ ട്രംപിന് വ്യാപാരക്കരാറിൽ എത്താൻ കഴിഞ്ഞിട്ടുള്ളൂ. ഇതിൽ യുകെ, ചൈന എന്നിവയുമായി ‘സമ്പൂർണ്ണ’ വ്യാപാരക്കരാറല്ല ഒപ്പുവെച്ചിട്ടുള്ളത്. നിലവിൽ യുഎസുമായി ഉടൻ വ്യാപാരക്കരാറിൽ എത്തുമെന്ന് കരുതുന്ന രാജ്യം ഇന്ത്യയാണ്. എന്നാൽ ഇന്ത്യയുമായും സമ്പൂർണ്ണ കരാറിന് പകരം ‘താത്കാലിക’ കരാറാണ് (മിനി ട്രേഡ് ഡീൽ) ചർച്ച ചെയ്യുന്നത്.
ഇന്ത്യയുമായും വിവിധ വിഷയങ്ങളിൽ ഇപ്പോഴും സമവായമായിട്ടില്ല. ഇന്ത്യയുടെ കാർഷികോൽപ്പന്ന വിപണിയിലേക്ക് കുറഞ്ഞ തീരുവ ആനുകൂല്യത്തോടെ കടന്നുകയറാനുള്ള ശ്രമമാണ് യുഎസിന്റേത്. ഒട്ടേറെ യുഎസ് കാർഷിക ഉൽപ്പന്നങ്ങൾക്ക് ഇന്ത്യ തീരുവ ഒഴിവാക്കിയെന്ന് ട്രംപ് പറയുന്നുണ്ടെങ്കിലും കേന്ദ്രസർക്കാരോ പ്രധാനമന്ത്രി നരേന്ദ്ര മോദിയോ ഇക്കാര്യത്തിൽ പ്രതികരിച്ചിട്ടില്ല. ട്രംപ് മുന്നോട്ടുവെച്ച ആവശ്യങ്ങളിന്മേൽ കേന്ദ്രവും മോദിയും വഴങ്ങുമോ എന്നാണ് ഏവരും ഉറ്റുനോക്കുന്നത്.
US President Donald Trump explains new tariff measures imposed by the US
