തിരുവനന്തപുരം: പുതുക്കിപ്പണിതൊരു ടീമുമായി കെസിഎല്ലിന്റെ രണ്ടാം സീസണ് തയാറെടുക്കുകയാണ് ആലപ്പി റിപ്പിള്‍സ്. നിലനിര്‍ത്തിയ നാല് താരങ്ങളായ മൊഹമ്മദ് അസറുദ്ദീന്‍, അക്ഷയ് ചന്ദ്രന്‍, വിഘ്‌നേഷ് പുത്തൂര്‍,അക്ഷയ് ടി കെ എന്നിവരൊഴിച്ചാല്‍, താരതമ്യേന പുതിയൊരു ടീമാണ് ഇത്തവണ ആലപ്പി റിപ്പിള്‍സിന്റേത്. മൊഹമ്മദ് അസറുദ്ദീനാണ് ടീമിന്റെ ക്യാപ്റ്റന്‍.
ക്യാപ്റ്റന്‍ തന്നെയാണ് ടീമിന്റെ ബാറ്റിങ് നിരയുടെ പ്രധാന കരുത്ത്. കഴിഞ്ഞ സീസണില്‍, നാല് അര്‍ദ്ധ സെഞ്ച്വറികളടക്കം 410 റണ്‍സായിരുന്നു അസറുദ്ദീന്‍ അടിച്ചു കൂട്ടിയത്. തുടര്‍ന്ന് രഞ്ജി രഞ്ജി ട്രോഫിയിലടക്കം സീസണിലാകെ മികച്ച പ്രകടനം കാഴ്ച വച്ച അസറുദ്ദീന്‍, കെസിഎല്ലിലും ഇതാവര്‍ത്തിക്കുമെന്ന പ്രതീക്ഷയിലാണ് ടീം മാനേജ്‌മെന്റ്. വമ്പന്‍ തുകയ്ക്ക് ടീമിലെത്തിച്ച ജലജ് സക്‌സേനയാണ് ടീമിന്റെ മറ്റൊരു പ്രതീക്ഷ. ശക്തമായ ലേലത്തിനൊടുവില്‍ 12.40 ലക്ഷത്തിനായിരുന്നു ജലജ് സക്‌സേനയെ ആലപ്പി റിപ്പിള്‍സ് ടീമിലെത്തിച്ചത്. ജലജിന്റെ ആദ്യ കെസിഎല്‍ സീസണ് ആണ് ഇത്തവണത്തേത്. എങ്കിലും ആഭ്യന്തര ക്രിക്കറ്റിലെ വര്‍ഷങ്ങളുടെ പരിചയസമ്പത്ത് ടീമിന് വലിയ മുതല്‍ക്കൂട്ടാവും.
അസറുദ്ദീന്‍ കഴിഞ്ഞാല്‍ കഴിഞ്ഞ സീസണില്‍ ടീമിനായി ഏറ്റവും കൂടുതല്‍ റണ്‍സ് നേടിയ അക്ഷയ് ടി കെ ഇത്തവണയും ടീമിനൊപ്പമുണ്ട്. ഇത് കൂടാതെ യുവതാരങ്ങളായ അനൂജ് ജോതിന്‍, അരുണ്‍ കെ എ, അര്‍ജുന്‍ നമ്പ്യാര്‍ എന്നിവരാണ് ബാറ്റര്‍മാരായി ടീമിലുള്ളത്. കഴിഞ്ഞ എന്‍എസ്‌കെ ട്രോഫിയിലടക്കം കൂറ്റന്‍ ഷോട്ടുകളുമായി തിളങ്ങിയ താരമാണ് അരുണ്‍ കെ എ. മുഹമ്മദ് അസറുദ്ദീനൊപ്പം വിക്കറ്റ് കീപ്പറായി ടീമിലുള്ള ആകാശ് പിള്ള, മുഹമ്മദ് കൈഫ് എന്നിവരും ബാറ്റിങ്ങില്‍ മികവ് തെളിയിച്ചിട്ടുള്ളവരാണ്.
ജലജ് സക്‌സേനയും അക്ഷയ് ചന്ദ്രനും അക്ഷയ് ടി കെയും അടങ്ങുന്ന ഓള്‍ റൌണ്ടര്‍മാരാണ് ടീമിന്റെ മറ്റൊരു കരുത്ത്. ഒരു പതിറ്റാണ്ടോളമായി കേരള ടീമിലെ സ്ഥിര സാന്നിധ്യമായ അക്ഷയ് ചന്ദ്രന്‍ കഴിഞ്ഞ സീസണില്‍ ടീമിനായി ഭേദപ്പെട്ട പ്രകടനം കാഴ്ച വച്ചിരുന്നു. ബാറ്റിങ്ങിനൊപ്പം ഇടംകയ്യന്‍ സ്പിന്നറെന്ന നിലയിലും ടീമിന് മുതല്‍ക്കൂട്ടാണ് അക്ഷയ്. യുവ താരങ്ങളായ ശ്രീരൂപ്, അഭിഷേക് പ്രതാപ്, ബാലു ബാബു എന്നിവരാണ് ടീമിലെ മറ്റ് ഓള്‍ റൌണ്ടര്‍മാര്‍.
ഫോമിലുള്ള ബേസില്‍ എന്‍ പി ആയിരിക്കും ഇത്തവണ ആലപ്പിയുടെ ബൌളിങ് നിരയെ നയിക്കുക. കഴിഞ്ഞ സീസണില്‍ കൊല്ലത്തിന് വേണ്ടി മികച്ച പ്രകടനം കാഴ്ച വച്ച ബേസില്‍ രഞ്ജി ട്രോഫിയിലടക്കം തിളങ്ങിയിരുന്നു. ബേസിലിനൊപ്പം രാഹുല്‍ ചന്ദ്രനും മൊഹമ്മദ് നസീലും ആദിത്യ ബൈജുവുമാണ് മറ്റ് പേസര്‍മാര്‍. കേരളത്തിന്റെ ഭാവി വാഗ്ദാനമെന്ന് വാഴ്ചത്തപ്പെടുന്ന ആദിത്യ എംആര്‍എഫ് പേസ് ഫൌണ്ടേഷനില്‍ പരിശീലനം നേടിയ താരമാണ്. വിനു മങ്കാദ് ട്രോഫിയില്‍ ഉത്തരാഖണ്ഡിന് എതിരെ ഏഴ് വിക്കറ്റ് വീഴ്ത്തി ശ്രദ്ധേയ പ്രകടനവും കാഴ്ച വച്ചിരുന്നു. കഴിഞ്ഞ കെസിഎ പ്രസിഡന്‍സ് കപ്പിലടക്കം തിളങ്ങിയ താരമാണ് രാഹുല്‍ ചന്ദ്രന്‍. ഐപിഎല്ലില്‍ മുംബൈയ്ക്കായി തിളങ്ങിയ വിഘ്‌നേഷ് പുത്തൂരും ശ്രീഹരി നായരുമാണ് സ്പിന്നര്‍മാര്‍.3.75 ലക്ഷത്തിനാണ് വിഘ്‌നേഷിനെ ആലപ്പി നിലനിര്‍ത്തിയത്.
കേരളത്തിന്റെ മുന്‍ രഞ്ജി ക്യാപ്റ്റനും ഓള്‍ റൌണ്ടറുമായ സോണി ചെറുവത്തൂരാണ് ടീമിന്റെ ഹെഡ് കോച്ച്. സൂരജ് കെ എസ് അസിസ്റ്റന്റ് കോച്ചും കാര്‍ത്തിക് രാജന്‍ ബാറ്റിങ് കോച്ചും എച്ച് അഭിറാം ഫീല്‍ഡിങ് കോച്ചുമായി ടീമിനൊപ്പമുണ്ട്. ഫര്‍സീന്‍ ആണ് ടീമിന്റെ മാനേജര്‍. ശ്രീജിത് (ഫിസിയോ തെറാപ്പിസ്റ്റ്) അര്‍ജുന്‍ അനില്‍ (സ്ര്‌ടെങ്ത് ആന്റ് കണ്ടീഷനിംഗ് കോച്ച്), ശ്രീവത്സന്‍ (പെര്‍ഫോമന്‍സ് അനലിസ്റ്റ്), വിജയ് ശ്രീനിവാസന്‍ (അനലിസ്റ്റ്) എന്നിവരും അടങ്ങുന്നതാണ് സപ്പോര്‍ട്ട് സ്റ്റാഫ്.
ടീം അംഗങ്ങള്‍
ബാറ്റര്‍മാര്‍ – അനുജ് ജോതിന്‍, അരുണ്‍ കെ എ, അര്‍ജുന്‍ സുരേഷ് നമ്പ്യാര്‍.
വിക്കറ്റ് കീപ്പര്‍ ബാറ്റര്‍ – മൊഹമ്മദ് അസറുദ്ദീന്‍, ആകാശ് പിള്ള, മൊഹമ്മദ് കൈഫ്.
ഓള്‍ റൌണ്ടര്‍മാര്‍ – ജലജ് സക്‌സേന, അക്ഷയ് ചന്ദ്രന്‍, ശ്രീരൂപ് എം പി , അഭിഷേക് പ്രതാപ്,ബാലു ബാബു, അക്ഷയ് ടി കെ.
ബൌളര്‍മാര്‍ – ബേസില്‍ എന്‍ പി, രാഹുല്‍ ചന്ദ്രന്‍, ശ്രീഹരി നായര്‍, മൊഹമ്മദ് നസീല്‍, ആദിത്യ ബൈജു, വിഘ്‌നേഷ് പുത്തൂര്‍.
Alleppey Ripples prepare for second season with new lineup
